ރައީސް ޔާމީންގެ ކެންޑިޑެސީ ފޯމުގައި ސޮއިކުރެވޭނެ އިންތިޒާމް ހަމަޖައްސައިދޭން ކަރެކްޝަނުން އެހީ ވަނީ
ރައީސް ޔާމީންގެ ކެންޑިޑެސީ ފޯމުގައި އެމަނިކުފާނަށް ސޮއިކުރެވޭނެ އިންތިޒާމް ހަމަޖައްސައިދޭން މޯލްޑިވްސް ކަރެކްޝަނަލް ސާވިސްގައި މިއަދު އިދިކޮޅުން ވަނީ އެދިފައެވެ.
މިކަމާއި ގުޅިގެން ކަރެކްޝަނަލް ސާވިސްގެ އިސް އޮފިޝަލަކު މިއަދު ވިދާޅުވީ ސިޓީގައި އެދުނު ގޮތަށް ޔާމީނަށް ސޮއިކުރެވޭނެ އިންތިޒާމް ހަމަޖައްސައިދޭން ނިންމާފައިވާ ކަމަށެވެ.
ކަރެކްޝަނުން މިފަދައިން ވިދާޅުވެފައިވާއިރު ރައީސް ޔާމިން ސުޕްރީމް ކޯޓަށް ހުށަހެޅުއްވި މައްސަލައިގައި އެމަނުކުފާނާ ބައްދަލުކުރަން ދިޔަ ގާނޫނީ ވަކީލުންނަށް ހުރަސްއެޅިކަމަށް ބުނެ އެ މަނުކުފާނުގެ ގާނޫނީ ވަކީލުންގެ ޓީމު ލީޑު ކުރައްވާ ޑރ. މުހައްމަދު ޖަމީލް އަހުމަދު ވަނީ ކަރެކްޝަނަށާއި ހޯމް މިނިސްޓަރު އިމްރާން އަބްދުﷲ އަށް ފާޑުވިދާޅުވެފައެވެ.
މިކަމާ ގުޅިގެން ރައީސް ޔާމީނުގެ ވަކީލުން ހިތްހަމަނުޖެހުން ފާޅުކޮށްފައިވާއިރު، ޕީޕީއެމްގެ ތަރުޖަމާން، ހީނާ ވަލީދު މީޑިއާތަކަށް ފޮނުއްވި މެސެޖުގައި ވިދާޅުވީ ޔާމީންއާ ބައްދަލުކުރަން ވަކީލުންނަށް މިއަދު އޮތީ ވަގުތު ދީފައި ކަަމަށާއި އެކަމަކު މާފުއްޓަށް ވަކީލުން ވަޑައިގަތް ފަހުން އެ ބައްދަލުވުން ކުރިއަށް ގެންދަން ހުރަސްއަޅާފައިވާ ކަމަށެވެ.
ޕީޕީއެމުން ތުހުމަތު ކުރި ގޮތުގައި މިކަން މިހެން ހިނގާފައިވަނީ ހޯމް މިނިސްޓަރު އިމްރާން އަބްދުﷲގެ އެންގެވުމަށެވެ.
Ads by STO
