ލޯނު ދެއްކޭވަރަށްވުރެ ބޮޑަށް ދައުލަތް އޮތީ ދަރާފައި: ޑރ. ޖިހާދު
ދިވެހި ދައުލަތުން ކޮށްފައިވާ ޚަރަދުތަކަށް ބަލާލުމުން ދައުލަތް އޮތީ ދަރާފައި ކަމަށާއި ލޯނު ދައްކާ ވަރަށް ދައުލަތަށް ފައިސާ ނުލިބޭކަމަށް ޖުމްހޫރީ ޕާޓީގެ ރިޔާސީ ކެންޑިޑޭޓު ގާސިމް އިބްރާހިމްގެ އެޑްވައިޒަރު އަދި ކުރީގެ ނައިބު ޑރ. އަބްދުﷲ ޖިހާދު ވިދާޅުވެއްޖެ އެވެ.
ޖުމްހޫރީ ޕާޓީގެ ހަރުގޭގައި ރޭ ބޭއްވި ޖަލްސާއެއްގައި ވާހަކަފުޅު ދައްކަވަމުން ޖިހާދު ވިދާޅުވީ، ކުރިއަށް އޮރް ރިޔާސީ އިންތިޚާބުގައި ކޮންމެ ބޭފުޅަކު އިންތިޚާބުވެޑައިގެންނެވި ނަމަވެސް އެއް ބިލިއަން ޑޮލަރު 2026 ގައި ދައްކަވަންޖެހޭނެކަމަށެވެ. އަދި ދައުލަތަކަށް އާމްދަނީގެ ގޮތުގައި ލިބެނީ 900 މިލިއަނެއްހާ ފައިސާއަށްވާއިރު ލޯނުތައް ދެއްކޭނެގޮތެއް ނެތްކަމަށް ޖިހާދު ވިދާޅުވިއެވެ.
"އެއް ބިލިއަން ޑޮލަރު 2026 ގައި ދައްކަން އެބަޖެހޭ. ރިޔާސީ އިންތިހާބު ކާމިޔާބު ކުރާނީ ކޮންމެ ބޭފުޅަކު ކަމުގައިވި ނަމަވެސް އެއް ބިލިއަން ޑޮލަރު އެބަ ދައްކަންޖެހެ 2026 ގައި. ދައުލަތަށް ލިބޭ ޑޮލަރު އާމްދަނީ މި އުޅެނީ 900 މިލިއަނާ ގާތުގައި. ކިހިނެއް އެއް ބިލިއަން ޑޮލަރު ދައްކާނީ 900 މިލިއަން އާމްދަނީއަށް ލިބިގެން. އަދި ދައުލަތުން ކުރަންޖެހޭ އެހެން ހަރަދުތައް ވެސް ހުންނާނެ،" ޖިހާދު ވިދާޅުވި އެވެ.
ޑރ. ޖިހާދު ވިދާޅުވީ މިއީ މަތިބަރު ސަރުކާރެއް ކަމަށާއި ކުރާ ހަރަދާ އެއްވަރަށް ވެއެތުވެދިޔަ ފަސް އަހަރުގެ ތެރެއިން އެއްވެސް އަހަރަކު އާމްދަނީ ނުލިބޭ ކަމަށެވެ. އެގޮތުން މިދިޔަ ފަސް އަހަރުގެ ޖުމްލަ ބަޖެޓް ޑެފިސިޓް 60 މިލިއަނަށް އަރާ ކަމަށް ޖިހާދު ވިދާޅުވި އެވެ.
މީގެ އިތުރުން، ޖިހާދު ވިދާޅުވީ ރައްޔިތުން ތިބާ ހާސްކަންމަތީގައި ދަރަނިވެރިވެފައިކަމަށާއި، މީގައި ވަކި ބަޔަކު އިސްތިސްނާ ނުވާކަމަށެވެ. އެގޮތުން ކުދި އަދި މެދުފަންތީގެ ވިޔަފާރިން ފެށިގެން ހުރިހާ އެންމެންވެސް މިތިބީ "ކްރެޑިޓް ކްރަންޗެއްގައި" ނުވަތަ ދަރަނިވެރިވެފައިކަމަށް ޖިހާދު ވިދާޅުވިއެވެ.
"އަޅުގަނޑު ބަޖެޓު ފޮތް ބެލިއިރު މިއަހަރުގެ އާމްދަނީ މި ލިބެނީ 30 ބިލިއަން. ބަޖެޓު ހަރަދު އެބައިން 42 ބިލިއަން. އެހެންވީމާ 12 ބިލިއަން ރުފިޔާ ޑެފިސިޓް ބަޖެޓެއް މިއީ. ދެން ބެލީ މިދިޔަ އަހަރުގެ ހަރަދު. މިދިޔަ އަހަރުގެ ހަރަދު އެބައިން ހަމަ 4 ބިލިއަަން. ލިބުނީ ގާތްގަނޑަކަށް 38 ބިލިއަން. އެހެންވީމާ އެބަ އުޅޭ 14 ބިލިއަން ޑެފިސިޓް. ދެން މި ހުރިހާ އަހަރެއް ބެލިއިރު މި ފަސް އަހަރު ބަޖެޓް ޑެފިސިޓް އެބަ އަރާ 62 ބިލިއަން،" ޖިހާދު ވިދާޅުވި އެވެ.
ޑރ. ޖިހާދަކީ ފިނޭންސް މިނިސްޓްރީގެ މަގާމު ތިން ފަހަރެއްގެ މަތިން ކުރައްވާފައިވާ ބޭފުޅަކަށްވާއިރު، ގަވަރުނަރުގެ މަގާމުގައި ވެސް އެބޭފުޅާ ހުންނެވި އެވެ.
