އިންތިޚާބުގައި ގުޅިގެން މަސައްކަތްކުރުމަށް އަނެއްކާވެސް ޖޭޕީންނާއި ޑިމޮކްރެޓްސްއިން މަޝްވަރާކުރަން ފަށައިފި

ކުރިއަށް އޮތް ރިޔާސީ އިންތިޚާބުގައި ގުޅިގެން މަސައްކަތްކުރުމަށް ޖުމްހޫރީ ޕާޓީ (ޖޭޕީ) އަދި ދަ ޑިމޮކްރެޓްސްއިން އަނެއްކާވެސް މަޝްވަރާތަކެއް ފަށައިފިއެވެ.

Ads by Sosun Fihaara

މައުލޫމާތުލިބޭ ގޮތުގައި މި ދެ ޕާޓީން ގުޅިގެން ކެންޑީޑޭޓެއް ނެރުމާގުޅޭ މަޝްވަރާ ބައްދަލުވުމެއް މިއަދު ކުނޫޒުގައި ކުރިއަށް ގެންގޮސްފައިވެއެވެ. އެ ބައްދަލުވުމުގައި ކުރީގެ ރައީސް އަދި އެމްޑީޕީގެ ކުރީގެ ރައީސް މުހައްމަދު ނަޝީދު އިސްދައުރެއް އަދާކުރައްވާ ޑިމޮކްރެޓްސްގެ އިސް ބައެއް ބޭފުޅުންނާ ޖޭޕީގެ ލީޑަރު އަދި ރިޔާސީ ކެންޑިޑޭޓް ގާސިމް އިބްރާހިމް ބައިވެރިވެވަޑައިގެންނެވިކަމަށް މައުލޫމާތު ލިބެއެވެ.

ދަ ޑިމޮކްރެޓްސްގެ ފަރާތުން މި ބައްދަލުވުމުގައި ބައިވެރިވެވަޑައިގެންނެވީ އެމްޑީޕީގެ ކުރީގެ ނައިބު ރައީސް މުހައްމަދު ޝިފާޒާއި މެދުހެންވޭރު ދާއިރާގެ މެމްބަރު އަލީ އާޒިމް އަދި އެސްޓީއޯގެ ކުރީގެ މެނޭޖިން ޑިރެކްޓަރު ހުސައިން އަމްރެވެ.

މި ބައްދަލުވުމާއި ގުޅޭ މާބޮޑޫ ތަފްޞީލެއް އަދި ލިބިފައިނުވިޔަސް، ޑިމޮކްރެޓްސް އުފެދުމުގެ ކުރިން ވެސް ރައީސް ނަޝީދަށް ތާއީދުކުރައްވާ އިސްބޭފުޅުން ޖޭޕީއާ ގުޅިގެން އިންތިޚާބުގައި ކުރިއަށް ދިއުމުގެ މަޝްވަރާތައް ކޮށްފައި ވެ އެވެ. ނަމަވެސް، އެ މަޝްވަރާތައް ވަކި ހިސާބަކުން މެދުކެނޑިފައިވާއިރު އެއްކެންޑިޑޭޓަކު ނެރުމުގެ މަޝްވަރާ ބައްދަލުވުމެއް ގާސިމް އިސްނަންގަވައިގެން މީގެ ދެ ހަފުތާއެއްހާ ދުވަސް ކުރިން ޑިމޮކްރެޓްސް އާއި އެމްއެންޕީ އަދި ޖޭޕީން ކުރިއަށް ގެންދިޔައެވެ. އެހެންނަމަވެސް އެ ބައްދަލުވުމުގެ ފަހުން އެ ވާހަކަތައްވެސް ހިނދިގެން ދިޔައީއެވެ.

ޖޭޕީއާ އާއި ޑިމޮކްރެޓްސް ގުޅިގެން މިފަދަ މަޝްވަރާތައް ފެށިއިރު، އެ ދެ ޕާޓީންވެސް ވަނީ ރިޔާސީ ކެންޑިޑޭޓަން ކަނޑައަޅައި ކެމްޕޭންތައްވެސް ފަށާފައެވެ. އެގޮތުން، ޑިމޮކްރެޓްސްގެ ކެންޑިޑޭޓަކީ ހުޅުދޫ ދާއިރާގެ މެމްވަރު އިލްޔާސް ލަބީބެވެ. މި ދެ ޕާޓީން ވެސް ރަނިންމޭޓް ރަސްމީކޮށް އިއުލާނުކޮށްފައިނެތް ނަމަވެސް އިލްޔާސްގެ ރަނިންމޭޓަކަށް ހަމަޖައްސަން ނިންމީ ރައްޔިތުންގެ މަޖިލިހުގެ ނައިބު ރައީސް އީވާ އަބްދުﷲ ކަމަށް މައުލޫމާތުލިބެއެވެ.