ކުރީގެ އެޑިއުކޭޝަން މިނިސްޓަރު ޝައުޤީ ޖޭޕީއަށް
ކުރީގެ ރައީސް މައުމޫން ޢަބްދުލްޤައްޔޫމްގެ ވެރިކަމުގައި، އެޑިއުކޭޝަން މިނިސްޓަރުކަން ކުރައްވައިފައިވާ ޑރ. މަހްމޫދު ޝައުޤީ، ޖުމްހޫރީ ޕާޓީ އާއި ގުޅިވަޑައިގަންނަވައިފިއެވެ.
ޑރ ޝައުގީ ޖޭޕީއަށް ސޮއިކުރައްވައިފައިވަނީ މިއަދު އެކަމަށްޓަކައި ޖުމްހޫރީ ޕާޓީގެ މައި އޮފީސް، މ. ކުނޫޒްގައި އޮތް ނޫސްވެރިންގެ ބައްދަލުވުމެއްގައެވެ.
މަޢުލޫމާތު ލިބިފައިވާ ގޮތުގައި ޝައުގީ ޖޭޕީއަށް ގުޅިވަޑައިގެންފައި ވަނީ ގާސިމްގެ ރަނިން މޭޓަކަށް ވެވަަޑައިގަތުމަށެވެ.
މި ރަސްމިއްޔާތުގައި ވާހަކަ ދައްކަވަމުން ޖޭޕީގެ ލީޑަރު ޤާސިމް އިބްރާހިމް ވިދާޅުވީ، އެ ޕާޓީއާއި ގުޅިވަޑައިގަންނަވާ ކޮންމެ ބޭފުޅަކީވެެސް ނުހަނު އަމާނާތްތެރި ތެދުވެރި އަދި މުރުއްވަތްތެރި ބޭފުޅެއް ކަމުގައިވުމުން އެކަމާ ވަރަށް ބޮޑަށް އުފާ ކުރައްވާކަމުގައެވެ.
އަދި ޝައުޤީ އަކީ، ޤާސިމާއެކުގައި، ކެބިނެޓްގައިވެސް މަސައްކަތް ކުރެއްވި ގާތްބޭފުޅެއްގެ ގޮތުގައި ފާހަގަކުރައްވަމުން އޭނާ ވިދާޅުވީ، ޝައުޤީ އަކީ ހަވާލުކުރެއްވި ކޮންމެ މަސައްކަތްޕުޅެއް ވެސް ނުހަނު ފުރިހަމަ ކަމާއެކު އަދާކުރައްވާ ބޭފުޅެއް ކަމުގައެވެ.
