ހުޅުޖެހީ އިންތިޚާބު ކާމިޔާބުކުރާނެ ތަން ފެނުނީމަ އެކަން ހުއްޓުވަައި ފޯކަސް ގެއްލުވާލަން : ރައީސް ޞާލިޙް

ގދ. މަޑަވެލީގައި އެމްޑީޕީން ކެމްޕޭން ޖަލްސާ ބާއްވަން ތައްޔާރުކުރިތަނުގައި ހުޅުޖަހާ ރޯ ކޮށްލީ ކުރިއަށް އޮތް ރިޔާސީ އިންތިޚާބު އެމްޑީޕީން ކާމިޔާބުކުރާނެތަން ފެނުނީމައި އެކަން ހުއްޓުވައި އެމްޑީޕީގެ ފޯކަސް ގެއްލުވާލަން ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙް ވިދާޅުވެއްޖެއެވެ.

Ads by Hajj Corporation

ރައީސް ޞާލިޙް މިހެން ވިދާޅުވީ އެމަނިކުފާނުގެ ކެމްޕޭނާއި ގުޅިގެން ރަށްރަށަށް ކުރައްވަމުން ގެންދަވާ ދަތުރުފުޅުތަކުގައި ގދ. މަޑަވެއްޔަށް ވަޑައިގެން އެމަނިކުފާނަށް ތާއީދުކުރައްވާ މެމްބަރުންނާއެކު ބޭއްވި ޖަލްސާއެއްގައެވެ.

ރައީސް ޞާލިޙް ވިދާޅުވީ އެކަން ކުރި ބައެއްގެ މަގުސަދަކީ އެމްޑީޕީގެ ފޯކަސް ގެއްލުވާލައި ހަމަޖެހުން ނަގާލުން ކަމަށާއި، އެކަމާ ކަންބޮޑުނުވުމަށާއި އެ މީހުންނަށް ޖަވާބެއްވެސް ދޭނެކަމެއްނެތް ކަމަށެވެ. އަދި މަސައްކަތްކުރަންވީ އެމްޑީޕީއަށް ރިޔާސީ އިންތިޚާބުގައި ކާމިޔާބު ހޯއްދަވައިދެއްވުމަށް ކަމަށާއި، އެކަން ކުރެވޭނީ ރިޔާސީ އިންތިޚާބުގައި ވޯޓު ދީގެންކަމަށެވެ.

"މި ރާއްޖޭގައި ހަމަނުޖެހުމާއި ތަޅާފޮޅުމާއި ސުލްޙަވެރިކަން ނައްތާލައިގެން ކާމިޔާބުކުރެވޭނެ ކަމެއް ނޯންނާނެ. އިރާދުުރެއްވިއްޔާ އަޅުގަނޑުމެންނެއް ނެތިން އެއަކަށް ދެން ބައިވެރިވެގެނެއް ކުރިއަށްދާކަށެއް. އެ ހަމަނުޖެހުމުގެ ތެރެއަށް ދާކަށެއް"

މި އިންތިހާބު ކާމިޔާބުކުރައްވައި ރާއްޖޭގައި މީހުން ދިިރިއުޅޭ ކޮންމެ ރަށަކަށް އުފާވެރި އަމާން ރާއްޖެއެއް ހޯދައިދެއްވާނެކަމަށް ފާހަގަކުރައްވަމުން ރައީސް ޞާލިޙް ވިދާޅުވީ، ވޭތވެދިޔަ 5 އަހަރު ތެރޭގައި އަމާންކަން ގާއިމުކުރުމުގެ މަސައްކަތައް ކުރެވިގެންދާ ކަމަށާއި އެކަންކަން ހުއްޓުވަންވެސް ބަޔަކު މަސައްކަތްކުރާ ކަމަށެވެ. އެހެންނަމަވެސް އެކަމަށްވެސް ދޭނެ ތަރުހީބެއް ނެތްކަމަށް އެމަނިކުފާނު ވިދާޅުވިއެވެ.

ކުރިއަށް އޮތް ދަުއުގައި މަޑަވެއްޔަށް ކޮށްދެއްވާނެކަންތައްތައް ރައީސް ޞާލިޙްވަނީ ވިދާޅުވެދެއްވާފައެވެ. އެގޮތުން، އެ ރަށަށް ކުރިމަތިވެފައިވާ ބޯހިޔާވަހިކަމަށުގެ މައްސަލަ ހައްލުކުރުމަށް ބިންހިއްކައި އެތަނުން ގޯތި ދޫކޮށް ރޯހައުސްއާއި ފްލެޓް އަޅާއިދޭނެކަމަށާއި، އައިސް ޕްލާންޓުގެ މަސައްކަތް ވީހާވެސް އަވަހަކަށް ފަށައި ހިދުމަތްދެވޭ ގޮތް ހަދައި،އޭޓީއެމްގެ ޚިދުމަތް ފަށައިދީ އަދި މަޑަވެލީގެ ބިންހިއްކާއިރު ވާދޫއާއި މަޑަވެލި ގުޅުވާލަދެއްވާނެކަމަށް ރައީސް ޞާލިޙް ވިދާޅުވިއެވެ.

އެއްވެސް ރަށެއް ތަފާތުނުކޮށް، ސިޔާސީ ވިސްނުމަކީ ރާއްޖޭގެ ތަރައްޤީއަށް އޮތް ހުރަހެއްކަމަށް ނުބައްލައި ހުރިހާ ރައްޔިތުންނަށްވެސް ހުރިހާ ރަށަކަށްވެސް ތަފާތުކުރުމެއްނެތި އަސާސީ ޚިދުމަތްތައް ފޯރުކޮށްދެއްވާނެކަމަށް ފާހަގަކުރައްވަމުން ރައީސް ޞާލިޙް ވިދާޅުވީ ކުރިއަށް އޮތް ދައުރަކީ މުޅި ރާއްޖެއަށް އުފާވެރި އަމާން ރާއްޖެއަކަށް ވެގެންދާނެކަމަށްެވެ. އަދި ރައްޔިތުން ބޭނުންވާ ޚިދުމަތްތައް ފޯރުކޮށްދެއްވުމުގައި ދެމިހުންނަވާނެކަމަށްވެސް އެމަނިކުފާނު ވިދާޅުވިއެވެ.