އަޅުގަނޑުގެ ވެރިކަމެއްގައި ރާއްޖެއިން ބޭރަށް ކިޔަވަންދާ ކުދިންގެ ލޯނު މާފުކޮށްދޭނަން: ނާޒިމް
މޯލްޑިވްސް ނޭޝަލަން ޕާޓީ (އެމްއެންޕީ) ގެ ރިޔާސީ ކެނޑިޑޭޓް މުޙައްމަދު ނާޒިމްގެ ވެރިކަމެއްގައި ރާއްޖެއިން ބޭރަށް ކިޔަވަންދާ ކުދިންގެ ލޯނު މާފުކޮށްދެއްވާނެކަމަށް ވިދާޅުވެއްޖެއެވެ.
"އުޖާލާ ޒަމާން"ގެ ނަމުގައި ކުރިއަށްގެންދާ ކެމްޕެއިންގައި ރ. ދުވާފަރުގައި ބޭއްވި ޖަލްސާގައި ވާހަކަދައްކަވަމުން ވާޒިމް ވިދާޅުވީ ތަޢުލީމު އުނގެނުމަށްޓަކައި މިހާރުވެސް ސަލާންޖަހާކަމަށާއި، ސަލާންޖެހުމުގެ މި ސަޤާފަތް ބަދަލުކުރަންޖެހޭކަމަށެވެ.
"މިހާރު ރާއްޖޭގައި ތަޢުލީމު ހޯދުމަށްޓަކައި ސަލާންޖެހުމުގެ ސަޤާފަތް އަދިވެސް ހަމަ ނިމުމަކަށް ނާދޭ. 10 އަކާ ހަމައަށް ކިޔެވުނީމަ ނިމުނީއެއް ނޫން، އޭލެވެލް އަށް ކިޔެވުމަށްޓަކައި މާލޭގައި ގޮސް ކުރަންޖެހޭ ޚަރަދާއި، ޑިގްރީއަށް ކުރަންޖެހޭ ޚަރަދާއި، އެއައްވުރެ މައްޗައް ކުރަންޖެހޭ ޚަރަދު، އަޅުގަނޑު ނިންމާފައި އޮތީ ޕްރައިމެރީ އެޑިއުކޭޝަންއިން ފެށިގެން ޕީއެޗްޑީއާ ހަމައަށް އިރާދަކުރެއްވިއްޔާ އަޅުގަނޑުގެ ސަރުކާރެއްގައި ދިވެހިން ތިބޭނީ ހިލޭ ކިޔަވާބައެއްގެ ގޮތުގައި"
"އަދި ރާއްޖެއިން ބޭރަށް ފުރުޞަތު ލިބިގެން ލޯނު ނަގައިގެންދާ ކުދިން، އެނބުރި މާލެ އައިސް، ކޮންމެ ތަނަކަށް ޚިދުމަތްކުރިޔަސް، އިރާދަކުރެއްވިއްޔާ އެ ލޯނެއްވެސް އަޅުގަނޑު މާފުކޮށްދޭނަން"
"އަޅުގަނޑާ ވަރަށް ގިނަ މީހުން އެބަ ސުވާލު ކުރޭ، ކީއްވެގެންހޭ ތި ހިލޭ ވާހަކަ އަބަދު ދައްކަނީ. އަޅުގަނޑު ދަންނަވަން އޮތް ވާހަކައަކީ އަޅުގަނޑުމެން މި ގެންގުޅެނީ ރައްޔިތުންގެ ލާރިއޭ. އަޅުގަނޑުގެ ޖީބުގައި ގެންގުޅޭ ލާރިއެއް ނޫން، ނާޒިމް ވިދާޅުވި އެވެ.
"މި ލާރިއަކީ ދިވެހި ރައްޔިތުން ހޯދާ ލާރި. އެހެންވީމަ އެ ލާރި ރައްޔިތުންނަށް ދޭން ކަންބޮޑުވާން ޖެހޭ ސަބަބެއް ނެތް." ނާޒިމް ވިދާޅުވިއެވެ.
މިހާރުވެސް ސަރުކާރުން ރޯދަ އިނާޔަތުގެ ގޮތުގައި ދެމުންގެންދާ ތިންހާސް ރުފިޔާގެ ވާހަކަ ދައްކަވަމުން ނާޒިމް ވިދާޅުވީ، އޭނާގެ ސަރުކާރެއްގައި ވަޒީފާ އަދާކުރާ މީހުންނަށް ރޯދަ އިނާޔަތް ދިނުމުގެ އިތުރުން ވަޒީފާ އަދާނުކުރާ ކޮންމެ މީހަކަށްވެސް ތިންހާސް ރުފިޔާ ދެއްވާނެކަމަށެވެ.
"ވަޒީފާގެ ޤާނޫނު އެބަބުނޭ ވަޒީފާގައި ހުންނަ ކޮންމެ މީހަކަށް ތިންހާސް ރުފިޔާ ދޭންޖެހޭނެކަމަށް، އޭގެ އިތުރުން، ގޭގައިހުންނަ މާމައާ ކާފައާ ދަރިފުޅާ ވަޒީފާ ނެތް މީހާއާ، އޭނަވެސް ކައިބޮއިގެން އުޅެންޖެހޭނީ ރަމްޟާން މަހު، އެހެންވެއްޖެޔާ ހަމަހަމަކަން ގެންގުޅެން އެބަޖެހޭ"
"އެހެންވީމަ ވަޒީފާތަކުގައި ނޫޅޭ ކޮންމެ މީހަކަށް އިރާދަކުރެއްވިއްޔާ ތިންހާސް ރުފިޔާ ދޭނަން"
ދަގެނތީ ދާއިރާގެ މެންބަރުކަން ވެސް ކުރައްވަމުން ގެންދަވާ ނާޒިމް ވިދާޅުވި ގޮތުގައި އޭނާ އިންތިހާބަށް ނުކުމެވަޑައިގަތީ ތެދުވެރިކަމާއި އިހުލާސްތެރިކަމާއެކު ކަމަށާއި، ރާއްޖެއަށް އިޤްތިޞާދީ އިންޤިލާބެއް ގެނައުމަށް ކަމަށެވެ. އަދި ރައްޔިތުންގެ ޖީބަށް ފައިސާ ވަންނާނެ ގޮތް ހައްދަވައިދެއްވާނެކަމަށް ވިދާޅުވެފައިވެއެވެ.
"މި ގައުމު ބަދަލުކޮށްލަން ޖެހޭ ދުވަސް އެއީ. މި ގައުމުގަ މިފަދަ ނިކަމެތި ހާލަތެއްގައި އަޅުގަނޑުމެން ތިބޭނީތޯ ނޫނީ އަޅުގަނޑުމެން އެހެން އުޖާލާ ޒަމާނެއްގެ އުފާވެރިކަމުގައި ތިބޭނީތޯ؟ އުޖާލާ ޒަމާނެއް ބޭނުން ކަމަށްވާ ނަމަ ނަންބަރު 8 އަށް ރަނގަޅު ފާހަގަލައްވާ،" ނާޒިމް ވިދާޅުވި އެވެ.
Ads by STO
