ބޯހިޔާވަހި ކަމަކީ ރައްޔިތުން އެދޭ އެންމް މުހިންމު ކަން ފާހަގަކުރައްވަމުން ރައީސް ޞާލިޙް ވިދާޅުވީ، ބޯހިޔާވަހިކަމުގެ ދަތިތައް އެންމެ ބޮޑަށް ދިމާވެފައިވަނީ މާލެއަށްކަމަށެވެ. އެގޮތުން މި ސަރުކާރުން ކުރި ދިރާސާއަކުން 18،000 އާއި 20،000 އާ ދެމެދު މީހުން ފުލެޓު ބޭނުންވާކަމަށް ދެއްކި ކަމަށާއި ފްލެޓަށް ހުޅުވާލުމުން ގާތްގަނޑަކަށް އެއަދަދަށްވާ ވަރަށް މީހުން ފޯމު ހުށަހަޅާފައިވާކަމަށް ރައީސް ޞާލިޙް ވިދާޅުވިއެވެ.
އެގޮތުން 19،000 މީހުން ފުލެޓަށް އެދި ފޯމު ހުށަހަޅާފައިވާކަމަށާއި މި ސަރުކާރުން މަޝްރޫއުތައް ކުރިއަށް ގެންދަނީ އާންމުކޮށް ދިމާވާ ބޮޑެތި މައްސަލަތައް ދެނެގަނެ އެކަމުގައި ބަލަންޖެހޭ ކަންތައްތައް ބަލައި ރަނގަޅަށް ޕްލޭންކޮށްގެންކަމަށް ރައީސް ޞާލިޙް ވިދާޅުވިއެވެ.
ފްލެޓަށް ހުށަހެޅި ޝާރުތުހަމަވާ ކޮންމެ މީހަކަށް ދެން އަންނަ ދައުރެއް ނިމުމުގެ ކުރިން ދެއްވާނެކަމަށާއި، ކޮންމެ ދުވަހަކު ކޮންމެވެސް އާއިލާއަކަށް ގޯތި ލިބެމުންދާތަން ރައްޔިތުންނަށް ފެންނާނެކަމަށާއި މި ފެށޭ ހަފްތާގެ އަންގާރަ ދުވަހު ބިންވެރިޔާ ސްކީމުގެ ދަށުން މި ސަރުކާރުން މާލޭގެ ރައްޔިތުންނަށް ދޫކުރަން ނިންމާފައިވާ ގޯތިތައް ދޫކުރަން ފަށާނެކަމަށްވެސް ރައީސް ޞާލިޙް ވިދާޅުވިއެވެ.
