ރ. ފައިނުގައި އެއާޕޯޓެއް އަޅައިދޭނަން: ނާޒިމް
މޯލްޑިވްސް ނޭޝަނަލް ޕާޓީ (އެމްއެންޕީ) ގެ ވެރިކަމެއްގައި ރ. ފައިނުގައި އެއާޕޯޓެއް އަޅައިދެއްވާނެކަމަށް އެޕާޓީގެ ރިޔާސީ ކެންޑިޑޭޓް މުޙައްމަދު ނާޒިމް ވިދާޅުވެއްޖެއެވެ.
"އުޖާލާ ޒަމާން"ގެ ނަމުގައި ކުރިއަށްގެންދާ ކެމްޕެއިންގައި ރ. ދުވާފަރުގައި ބޭއްވި ޖަލްސާގައި ވާހަކަދައްކަވަމުން ނާޒިމް ވިދާޅުވީ ފައިނުގައި އެއާޕޯޓެއް އެޅުމަކީ އެސަރަހައްދުގެ ހުރިހާ ރަށަކަށްވެސް ވަރަށް މުހިއްމު ކަމެކަމަށެވެ. އަދި އެކަން އޭނާގެ ވެރިކަމެއްގައި ކުރައްވާނެކަމަށެވެ.
ކުރިގެ ރައީސް ޢަބްދުﷲ ޔާމީން ޢަބްދުލްޤައްޔޫމްގެ ވެރިކަމުގައިވެސް ފައިނުގައި އެއާޕޯޓެއް އެޅުމަށް ނިންމެވިއެވެ. ނާޒިމް އޭރު ހުންނެވީ މިނިސްޓްރީ އޮފް ޑިފެންސް އެންޑް ނޭޝަނަލް ސެކިއުރިޓީގެ މިނިސްޓަރުގެ މަޤާމުގައެވެ. ރައީސް ޔާމީންގެ ވެރިކަމުގައި ފައިނުގައި އެއާޕޯޓު އެޅުމަށް ނިންމި ނަމަވެސް، އެ ރަށުގެ ރައްޔިތުން އެއާޕޯޓު އެޅުމާއި ދެކޮޅަށް އިޙްތިޖާޖުކުރުމާއި ގުޅިގެން ފަހުން ވަނީ އެއާޕޯޓު ނާޅަން ނިންމާފައެވެ.
ރ އަަތޮޅަށް ކުރައްވަމުން ގެންދަވާ ކެންޕެއިން ދަތުރުގެ ތެރެއިން ދުވާފަރުގައި ރޭ ބޭއްވި ޖަލްސާގައި އިތުރަށް ވާހަކަ ދައްކަވަމުން ނާޒިމް ވިދާޅުވީ ދުވާފަރު ރައްޔިތުން އުޅެމުންދާ ނިކަމެތި ހާޅު ވަރަށް ގާތުން ފެނިއްޖެކަމަށާއި މިއީ މިރަށުގެ ރައްޔިތުންނަށް ޙައްޤު މިންވަރު ނޫންކަމަށެވެ.
ސުނާމީގައި ގެއްލުން ލިބުނު އާއިލާތަކަށް ސަރުކާރުން ދީފައިވާ ގެދޮރުގައި ރައްޔިތުން ދިރިއުޅެނީ ވަރަށް ދަތި ހާލުގައިކަމަށާއި، ދުވާފަރުގެ ހިއްކާފައިވާ ބިމުން މިއަދާހަމައަށް ވެސް ގޯތޮ ދީފައިނުވާކަމަށް ނާޒިމް ވިދާޅުވިއެވެ. އަދި މިކަމުގެ ޒިންމާ ދުވާފަރުގެ ކައުންސިލުން ނަގަންޖެހޭނެކަމަށް ވިދާޅުވިއެވެ.
"މިރަށު ކައުންސިލް ތެރޭގައި ތަޅާފޮޅުމާއި، ކައުންސިލް ތެރޭގައި ހިނގާދިޔަ ހަމަނުޖެހުމުގެ ތެރޭގައި، މިއަށް މިވަނީ ތާށިވެފައި"
"މިއަދު ދުވާފަރު ރައްޔިތުންނަށް އެ އުފަލެއް ނެތް. ދުވާފަރު ރައްޔިތުން އެބަ ޖެހޭ މި ސަރުކާރަށް ނޫނެކޭ ބުނެ ބަދަލުކުރަން،" ނާޒިމް ވިދާޅުވިއެވެ.
މި އަންނަ މަހު 9 ވަނަ ދުވަހު ބޭއްވުމަށް ހަމަޖެހިފައިވާ ރިޔާސީ އިންތިހާބުގައި ވާދަކުރައްވާ ނާޒިމް ވަނީ ކެންޕެއިން ދަތުރުތަކުގައި އެބޭފުޅާގެ ރިޔާސީ މެނިފެސްޓޯގައި ހިމެނޭ ވަޢުދުތައް އިޢުލާންކުރައްވާފައެވެ. މީގެ ތެރޭގައި ޕީއެޗްޑީއާ ހަމައަށް ހިލޭ ކިޔަވައިދިނުމާއި، ރާއްޖެއިން ބޭރަށް ކިޔަވަންދާ ކުދިންގެ ލޯނު މާފުކޮށްދިނުމާއި، ރ އަތޮޅަށް ޚާއްސަ އިންވެސްޓްމަންޓް ބޭންކެއް ތަޢާރަފްކުރުމާއި ގެދޮރުހަދަން ބޭނުންވާ މީހުންނަށް ސޮވެރިން ގެރެންޓީ ދިނުން ހިމެނެއެވެ.
