ޓީ ވިތް އިބޫގެ ނަމުގައި އަންހެން ކަނބަލުންނަށް ޚާއްސަ އިވެންޓެއް އެމްޑީޕީން ބާއްވަނީ
"ޓި ވިތް އިބޫ" ގެ ނަމުގައި އަންހެން ކަނބަލުންނަށް ޚާއްސަ އިވެންޓެއް އެމްޑީޕީގެ ފަރާތުން ކުރިއަށް ގެންދަން ނިންމައިފިއެވެ.
ކުރިއަށް އޮތް ރިޔާސީ އިންތިޚާބުގެ ކެމްޕޭން ހަރަކާތްތަކުގެ ތެރެއިން ބާއްވާ މި އިވެންޓުގައި މި މަހު 18 ވަނަ ދުވަހުގެ ހަވީރު ބާއްވާގޮތަށް ނިންމާފައިވާއިރު، ރާއްޖޭގެ ހުރިހާ ހިސާބެއްގައި ތިއްބެވި ރައީސް އިބްރާހިމް މުޙައްމަދު ޞާލިޙަށް ތާއީދުކުރައްވާ އަންހެންބޭފުޅުންނަށް މި އިވެންޓުގައި ބައިވެރިވުމަށް އާންމުކޮށްވަނީ ހުޅުވާލާފައެވެ.
މިއީ "ޓީ ވިތު އިބޫ" އެމްޑީޕީގެ އަންހެނުންގެ ރޫހު އިން އިންތިޒާމުކޮށްގެން، "އުފާވެރި އަންހެނުން" ޝިއާރުގެ ދަށުން ބާއްވަން ހަމަޖެހިފައިވާ އިވެންޓެކެވެ. މި އިވެންޓުގެ ރައީސާ އަކީ އައްޑޫ މީދޫ ދާއިރާގެ މަޖިލިސް މެމްބަރު ރޮޒައިނާ އާދަމް (ރޮޒޭ) އެވެ.
ރޮޒައިނާ ވިދާޅުވީ މި އިވެންޓުގައި ބައިވެރިވެވަޑައިގަތުމަށްޓަކައި 7281140 އަށް މެސެޖު ކުރައްވައިގެން ބުކިންގ ހެއްދެވޭނެކަމަށެވެ. މި އިވެންޓު ޕްރޮމޯޓުކުރުމަށް ވީޑިއޯ ކްލިޕްތައް މީސްމީޑިއާގައި އާންމުކުރަމުންދާއިރު، އެމްޑީޕީއަށް ދާދިފަހުން ސޮއިކުރެއްވި ކުރީގެ މަޝްހޫރު ފިލްމީ ތަރި މަރިޔަމް ނިޝާގެ ވީޑިއޯއެއް ވެސް މިއަދު އާންމުކޮށްފައިވެ އެވެ.
މި އިވެންޓަށް ތައްޔާރުވުމުގެ ގޮތުން މަޝްވަރާތައް ކުރެވެމުންދާއިރު، މި މަޝްވަރާތަކުގައި ރާއްޖޭގެ އެކި ހިސާބުތަކުގެ އަންހެނުންގެ ތަރައްޤީ އަށް މަސައްކަތްކުރާ ކޮމިޓީތަކާއި އަންހެން ކައުންސިލަރުން ބައިވެރިވެ އެވެ
