އެންމެ ހަނދާންވެ، އަދިވެސް އެންމެ ކާހިތްވަނީ އަހަރެންގެ މަންމަ ކެއްކި އެއްޗެހި: ޝާހްރުކް ޚާން
ޝާހްރުކް ޚާން އަކީ ކާކުކަން ނޭނގޭ މީހަކު މުޅި ދުނިޔޭގައި ވެސް މަދުވާނެއެވެ. ބޮލީވުޑްގެ އެންމެ މަޝްހޫރު އެއް ސުޕާސްޓާރަށް ވުމުގެ އިތުރުން އޭނާއަކީ ފޭނުން ވެސް އިންތިހާއަށް ގިނަ ފަންނާނެކެވެ.
ޝާހްރުކް ޚާން އާއި ބެހޭގޮތުން އެތައް މައުލޫމާތެއް ހޯދަން ބޭނުންވާ މީހުން ވެސް އިންތިހާއަށް ގިނައެވެ. އޭނާއާއި ބެހޭގޮތުން ކިތަންމެ ކުޑަ މައުލޫމާތެއް ވެސް އިތުރަށް ލިބޭތޯ މަސައްކަތް ކުރާ މީހުންވެސް މަދެއް ނޫނެވެ.
ދާދި ފަހުން ޝާހްރުކް ޚާން މިވަނީ އޭނާއަށް އެންމެ މީރު ކާނާ އަކީ ކޮބައިކަން ކިޔައިދީފައެވެ. އެގޮތުން އޭނާ ބުނީ، އޭނާއަށް އެންމެ މީރީ އޭނާގެ މަންމަ ކެއްކި ކާއެއްޗެހި ކަމަށާއި އަބަދުވެސް އެކާނާތައް މަތިން ހަނދާންވެ "މިސްވާ" ކަމަށެވެ.
ޝާހްރުކް ޚާން އުފަންވީ ނިއު ދިއްލީގެ އާދައިގެ އާއިލާއަކަށެވެ. އޭނާ ބުނި ގޮތުގައި އޭނާގެ މައިންބަފައިންނަކީ ވަރަށް މީރުކޮށް ކައްކާ ދެމީހުން ކަމަށެވެ. އެހެންކަމުން އަބަދުވެސް ވަރަށް މީރުކޮށް ކާން ލިބޭ ކަމަށް ވެސް އޭނާ ބުންޏެވެ.
ޝާހްރުކް ޚާންގެ ބައްޕަ ތާޖް މުޙައްމަދު ޚާން އަކީ ޕަޓާނީގެ ޚާއްސަ ކާނާއެއް ކަމަށްވާ "ރާން" ވަރަށް މީރުކޮށް ހެދި މީހެކެވެ. އަދި ޝާހްރުކް ޚާންގެ މަންމަ އެންމެ މީރުކޮށް ކެއްކީ ހައިދަރްއާބާދުގެ ޚާއްސަ ކާނާތައް ކަމަށްވާ "މަޓަން ބިރިޔާނީ" އާއި "ކައްޓީ ދާލް" ކަމަށް ވެސް އޭނާ ބުންޏެވެ.
"އަހަރެންގެ މަންމަ ކެއްކި ހުރިހާ އެއްޗެއްވެސް މީރު. އެކަމަކު މަންމަ ކެއްކި ހައިދަރްއާބާދީ މަޓަން ބިރިޔާނީ އާއި ކައްޓީ ދާލް އަހަންނަށް ވަކިން ބޮޑަށް ކަމުދޭ" ޝާހްރުކް ޚާން ބުނެފައިވެއެވެ.
Ads by STO
