ރާއްޖޭގެ ކޮންމެ ރަށެއްގެ ރައްޔިތުން އެދޭ 5 ކަމެއް ކޮށްދޭނަން: ޤާސިމް
ޖުމްހޫރީ ޕާޓީ (ޖޭޕީ) ގެ ރިޔާސީ ކެނޑިޑޭޓް ޤާސިމް އިބްރާހީމްގެ ވެރިކަމެއްގައި ކޮންމެ ރަށެއްގެ ރައްޔިތުން އެދޭ 5 ކަމެއް ކޮށްދެއްވާނެކަމަށް ވިދާޅުވެއްޖެއެވެ.
ރިޔާސީ އިންތިޚާބަށް ނިކުންނަވައި ކެންޕެއިން ދަތުރުތަކަށް އަތޮޅުތެރެއަށް ކުރައްވަމުން ގެންދަވާ ދަތުރުގައި އދ. މަންދޫ އަށް ވަޑައިގެން އެރަށު ރައްޔިތުންނާ ވާހަކަ ދައްކަވަމުން ޤާސިމް ވަނީ އެމަނިކުފާނަށް ވެރިކަން ލިބިއްޖެނަމަ، ކޮންމެ ރަށަކުންވެސް، އެރަށަކުން އެންމެ ބޭނުންވާ 5 ކަމެއް އެރަށުގެ ކައުންސިލްއާ މަޝްވަރާކޮށްގެން އެމަނިކުފާނާ ހަމައަށް ގެނެސްދެއްވުމަށް ގޮވާލާފައެވެ. އަދި އެމަނިކުފާނުގެ ސަރުކާރުގެ 5 އަހަރު ނިމުމުގެ ކުރިން އެދުނު 5 ކަންތައް ކޮށްދެއްވާނެކަމަށް ވިދާޅުވިއެވެ.
"...ކޮންމެވެސް 5 ކަމެއް ނިންމާދޭނަން އަޅުގަނޑުމެންގެ 5 އަހަރުގެ ސަރުކާރު ނިމުމުގެ ކުރިން..."
ޤާސިމް ވިދާޅުވީ ހުރިހާ ރަށެއްގައިވެސް ބަނދަރުމަތީ މިސްކިތެއް އަޅައިދިނުމާއި، މިސްކިތްތަކުގައި އެއާ ކޮންޑިޝަން ހަރުކޮށްދިނުމާއި، ފާހާނާބަރިއެއް އެޅުމާއި ކޮންމެ މިސްކިތެއްގައި ދެ މުދިމުން މަސައްކަތްކުރާ ގޮތައް އެމަނިކުފާނުގެ ސަރުކާރެއްގައި ހަމަޖައްސަވައިދެއްވާނެކަމަށެވެ.
މީގެ އިތުރުން ޤާސިމް ވިދާޅުވީ ހުރިހާ ސްކޫލެއްގައި ކިޔަވައިދިނުން އެއްދަންފަޅިއަށް ބަދަލުކޮށްދެއްވާނެކަމަށާއި، ކޮންމެ ކުލާހެއްގައި ސްމާޓް ބޯޑު ހަރުކޮށްދިނުމަކީ އެމަނިކުފާނުގެ މެނިފެސްޓޯގައި ހިމެނޭކަމެއް ކަމަށެވެ.
ޤާސިމް ވަނީ މި ސަރުކާރުން ނަގާފައިވާ ބޭރުގެ ދަރަނީގެ ވާހަކަ ދައްކަވާ މި ސަރުކާރަށް ވަރަށް ބޮޑަށް ފާޑުވިދާޅުވެފައެވެ. ހަމަ މިއާއެކު ސަރުކާރުގެ އޮފިސްތަކުގެ މުވައްޒަފުންނަށް ރިޝްވަތުދީ، ވަޒީފާގެ ބިރުދެއްކުން ފަދަ ކަންތައްތައް ކުރަމުންދާކަމަށް ވިިދާޅުވިއެވެ. އަދި މިކަމުން ރާއްޖެ ސަލާމަތްކުރުމަށްޓަކައި އެޕާޓީއަށް ވެރިކަން ދެއްވުމަށް ޤާސިމް ވަނީ ގޮވާލާފައެވެ.
"އެމީހަކު ކެހި ކަނޑުލެއްގެ ހިތި އެމީހަކު ފިލުވަންވާނެ" ޤާސިމް ވިދާޅުވިއެވެ.
ޤާސިމް ވިދާޅުވީ އެމަނިކުފާނު ހުރީ އެ ހިތި ފިލުވަން ތައްޔާރައްކަމަށާއި އެމަނިކުފާނަށް ވެރިކަން ލިބިއްޖެނަމަ، ރާއްޖެއަށް ދިމާވެފައިވާ ހުރިހާ މުސީބާތްތަކުން ސަލާމަތްކުރައްވާނެކަމަށް ވިދާޅުވިއެވެ. އަދި ވޯޓުލުމަށް ކެނޑިޑޭޓަކު އިޚްތިޔާރު ކުރާއިރު އެމީހާގެ ޓްރެކް ރެކޯޑު ބައްލަވައި، އެމީހަކު އިންސާނިއްޔަތައްޓަކައި، ޑިމޮކްރަސީއަށްޓަކައި، އިސްލާމްދީނަށްޓަކައި، މީހަކަށް ދޭ އެހީއަށްޓަކައި ބައްލަވައި ކެނޑިޑޭޓަކު އިޚްތިޔާރުކުރުމަށް ގޮވާލައްވާފައިވެއެވެ.
ޤާސިމް ވިދާޅުވީ އެމަނިކުފާނަށް ވަނީ އިންޓަނޭޝަނަލް ޔުނިވާސިޓީއަކުން އޮނަރަރީ ޕީއެޗްޑީ އާއި އިންސާނިއްޔަތައް ޚިދުމަތްކުރުމުގެ ރޮނގުން އެންމެ މަތީ ދަރަޖައިގެ އިއްޒަތާއި ޝަރަފު ދެއްވާފައިކަމަށެވެ. އެހެންކަމުން ރާއްޖެގެ ވެރިއަކަށް ހޮވުމަށް އެންމެ ރަނގަޅު ބޭފުޅެއް ރައްޔިތުން ވިސްނާވަޑައިގަތުމަށް ޤާސިމް ގޮވާލެއްވިއެވެ.
ގާސިމު އަލާއުއްދީނުގެ ޖިންނިއަށްވުރެން ވެސް ރަނގަޅުވެއްޖެތާ. ޥޮށްގަނޑުގައި އަތް އުނގުޅާލީމަ އަންނަ ޖިންނި ބުނީ ބޭނުން 3 ކަމެއްގެ ވާހަކަ ވިއްޔަ.