އިންތިޚާބުގައި ދެވަނަ ބުރަކަށް ގޮސްފިނަމަ ހަމަނުޖެހުމަކަށް ގޮސްފާނެ: ރައީސް ޞާލިޙް
ކުރިއަށް އޮތް ރިޔާސީ އިންތިޚާބު އެއްބުރުން ނިންމަވާލެއްވުމަށާއި ދެވަނަ ބުރަކަށް ދިޔުމުގެ ފުރުޞަތު ނުދެއްވުމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.
ރިޔާސީ އިންތިޚާބުގެ ކެމްޕޭނަށް ރަށްރަށަށް ކުރައްވާ ދަތުރުފުޅުތަކުގެ ތެރޭގައި ތ. ކިނބިދޫއަށް ވަޑައިގެން ރައީސް ޞާލިޙް ވިދާޅުވީ މި ފަހަރުގެ ރިޔާސީ އިންތިހާބު ދެވަނަ ބުރަކަށް ގޮސްފި ނަމަ ގައުމު ވަރަށް ބޮޑަށް ހަލަބޮލިވާނެ ކަމަށާއި ވަރަށް ގިނަ ރަށްރަށަށް މިހާތަނަށް ވަޑައިގެންފައިވާ ކަމަށާއި ކޮންމެ ރަށަކުން ވެސް ފެނިވަޑައިގަތީ އެމްޑީޕީއާ އެކީ ކުރިއަށް ދާ މަންޒަރު ކަމަށެވެ.
ކިނބިދޫ ރައްޔިތުން ވެސް ހިޔާލު ތަފާތުވުން އެއް ފަރާތްކޮށް، އިންތިހާބުގައި އެ މަނިކުފާނަށް ވޯޓު ދެއްވަންވެސް އެމަނިކުފާނުވަނީ އެދިވަޑައިގެންފައެވެ.
"އެހެން ނޫން ނަމަ މި ދެވަނަ ބުރަކަށް ގޮސް އަނެއްކާވެސް ބޮޑު ހަލަބޮލި ކަމަކަށް މި ރާއްޖެ ގޮސްދާނެ. އެ ފުރުސަތު ނުދެއްވުން އެއީ ވިސްނަން ޖެހޭ ކަމެއް. އެ އަށް އެނބުރި ގޮއްސިއްޔާ ދެން ވެދާނެ ގޮތް ހީވެސް ނުކުރާނެ،" ރައީސް ޞާލިޙް ވިދާޅުވި އެވެ.
ރައީސް ޞާލިޙް ވިދާޅުވި ގޮތުގައި 2008 ގައި ވެރިކަން ބަދަލުވި ފަހުން މެދުކެނޑުމެއް ނެތި ހައެއްކަ އަހަރު އެމްޑީޕީ މަގުމަތީ ތިބެން ޖެހުނެވެ. އޭގެ ފަހުން އަނެއްކާވެސް ވެރިކަމަށް އާދެވި، ރައްޔިތުންނަށް ވި ވައުދުތައް މެދުކެނޑުމެއް ނެތި ފުއްދަމުން އަންނަ ކަމަށް އެމަނިކުފާނު ވިދާޅުވިއެވެ.
އަދި ރައްޔިތުންނަށް ވީ ވައުދުތައް ފުއްދުމުގައި މި ސަރުކާރުގެ ފުރަތަމަ ދުވަހު މަސައްކަތް ފަށައިގަތް ކަމަށާއި ނަމަވެސް އޭރު ދައުލަތުގައި ފައިސާ ނެތްކަމަށް ފާހަގަކުރައްވަމުން ރައީސް ޞާލިޙް ވިދާޅުވީ ރިޒާވްފައި ހުރިއްޔާ ހުރި ފައިސާއެއްވެސް އޭރު ހުސްކޮށްލާފައި އޮތީ ޖީއެމްއާރު މައްސަލައިގައި އާބިޓްރޭޝަން ދެއްކުމަށްކަމަށެވެ.
"ދައުލަތަކު ނެތް ފައިސާއެއް. އަދި ރިޒާވްގައި ހުރިއްޔާ ހުރި އެއްޗެއް ގޮސް އޭރު ހުސްކޮށްލާފައި އޮތީ ޖީއެމްއާރު މައްސަލައިގައި އާބިޓްރޭޝާނަށް ގޮސް ދައްކަންޖެހުނު ފައިސާ ދެއްކުމަށް ރިޒާވުން ދުއިސައްތަ އެތައް މިލިއަން ޑޮލަރެއް ނަގާ ދޭންޖެހުނު. އަޅުގަނޑުމެން ވެރިކަމާ ހަވާލުވިއިރުގައި މަދު އެއްޗެއް ހުރީ" ރައީސް ޞާލިޙް ވިދާޅުވިއެވެ.
އެހެންނަމަވެސް ހެޔޮ އެދޭ ގައުމުތަކާއި ތަންތަނުން ލިބުނު ފައިސާއާ އެކީގައި މިސަރުކާރުން މަސައްކަތް ފަށައިގަތް ކަމަށާއި ހަމަ މަސައްކަތް ފަށައިގަތް ތަނުން ކޮވިޑުގެ އާލަމީ ވަބާއާއި ކުރިމަތިލައްވަން ޖެހިވަޑައިގެންނެވި ކަމަށް ރައީސް ޞާލިޙް ވިދާޅުވިއެވެ.
އެއީ އިހްސާސްކުރަންވެސް ދަތި ދުވަސްކޮޅެއްކަމަށާއި ކުޑަ ސިކުންތެއްގެ ތެރޭގައި މުޅި ދުނިޔެ ހުއްޓުމަކަށް އައިނަމަވެސް އެދުވަހު އެމަނިކުފާނު ނިންމެވި ނިންމެވުންތަކުގެ ސަބަބުން ރާއްޖެއަށް މިއަދު ހަމަނޭވާ ލެވިއްޖެކަމަށާއި މިއަދު ދިވެހިން މިދެކޭ ތަރައްޤީގެ އަސްލަކީވެސް އެދުވަހު އެ ނިންމި ނިންމުންކަމަށް ރައީސް ޞާލިޙް ވިދާޅުވިއެވެ.
ކިނބިދޫގައި ބޭއްވި ޖަލްސާގައި ދެން އަންނަ ދައުރެއްގައި އެރަށަށް ކޮށްދެއްވާނެ ބައެއް ކަންކަމުގެ ވާހަކަ ރައީސް ޞާލިޙް ވިދާޅުވެފައިވެއެވެ. އޭގެ ތެރޭގައި ކިނބިދު އާއި ވޭމަންޑޫ ކޯޒްވޭ އަކުން ގުޅާލުމާއި، ފުޓްސަލް ދަނޑު ނިންމުމާއި، މަލްޓި ޕާޕަސް ހޯލް އިތުރު ކްލާސް ރޫމް އެޅުމާއި، އެ ރަށުގެ މަގުތައް ޒަމާނީ ފެންވަރަކަށް ހަދައި މަގުތަކުގައި ތާރު އެޅުމާއި އަދި ކުޅިވަރު އެރީނާ އަޕްގްރޭޑްކޮށް އިތުރު ވަސީލަތްތަކާ އެކީ ހިދުމަތް ލިބޭ ގޮތް ހެދުމަށް ރައީސް ޞާލިޙްވަނީ ވައުދުވެވަޑައިގެންފައެވެ.
