ވަގަށް މަސްބާނަމުންދިޔަ ބޭރުގެ ބޯޓެއް ފެނިއްޖެ
ރާއްޖޭގެ ކަނޑުގެ ސަރަޙައްދުގައި ގަވާއިދާ ހިލާފަށް މަސް ބާނަމުން ދިޔަ ބޭރުގެ މަސްބޯޓެއް ފެނިގެން މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން ހަރަކާތްތެރިވާން ފަށައިފި އެވެ.
އެނގިފައިވާ ގޮތުގައި ނ. މާޅެންދޫ ބޭރުން އެމަސް ބޯޓް ފެނިގެން އެމްއެންޑީއެފް ގެ ސަމާލުކަމަށް އެކަން ގެނެސްފައިވަނީ ދިވެހި މަސް ބޯޓަކުންނެވެ.
އެމްއެންޑީއެފުން ބުނެފައިވަނީ އެސަރަޙައްދުގައި ބޭރުގެ މަސްބޯޓެއް އުޅޭކަމުގެ ރިޕޯޓު ލިބުމާއެކު، ކޯސްޓުގާޑުން އެތަނުގައި ހަރަކާތްތެރިވާން ފަށާފައިވާ ކަމަށާއި ނަމަވެސް އެއީ ކޮން ގައުމެއްގެ ބޯޓެއްކަން އަދި ސާފުވެފައިނުވާ ކަމަށެވެ.
ރާއްޖޭގެ ކަނޑުގެ ސަރަޙައްދަށް ބޭރު ޤައުމުތަކުގެ މަސްބޯޓުތަކުން ވަދެ، ވަގަށް މަސް ބޭނުމަކީ އެކި ދުވަސްވަރު ފެންމަތިވަމުން އަންނަ މައްސަލައެކެވެ. އެފަދަ ގިނަ ބޯޓުތަކެއް ކޯސްޓުގާޑުން މީގެ ކުރިން ވެސް އަތުލައިގެންފައި ވެއެވެ.
ހުއްދަނެތި މިފަދައިން ރާއްޖޭގެ ކަނޑުގެ ސަރަޙައްދަށް ވަނުމާއި ވަގަށް މަސް ބޭނުމަކީ ވެސް މަނާ ކަމެކެވެ. ނަމަވެސް އަވަށްޓެރި ބައެއް ޤައުމުތަކުގެ ބޯޓްތަކުން ދަނީ ބައެއް ފަހަރު ދަނީ މިކަން ކުރަމުންނެވެ.
