މި ސަރުކާރުން ލޯނުތައް ނަގަން މާލޭގެ އެތައް ސުކޫލެއް ވަނީ ރަހުނުކޮށްފައި: މުއިއްޒު
މި ސަރުކާރުން ލޯނުތައް ނެގުމަށްޓަައި މާލޭގެ އެތައް ސުކޫލެއް ރަހުނު ކޮށްފައިވާކަމަށް ޕީޕީއެމް/ޕީއެންސީގެ ރިޔާސީ ކެންޑިޑޭޓު ޑރ. މުޙައްމަދު މުއިއްޒު ވިދާޅުވެއްޖެއެވެ.
ރިޔާސީ އިންތިޚާބުގެ ދެވަނަ ބުރުގެ ކެމްޕޭނަށް ބ. ކަމަދޫއަށް ވަޑައިގެން އެރަށުގައި ބޭއްވި ޖަލްސާއެއްގައި ވާހަކަފުޅު ދައްކަވަމުން މުއިއްޒު ވިދާޅުވީ މި ސަރުކާރުން ލޯނު ނެގުމަށް ސޮއިކޮށްފައި ހުންނަ އެގްރިމަންޓުތަކުގެ އިންޓަރެސްޓު ރޭޓުވެސް ފާޅުކޮށްލާކަށް މި ސަރުކާރަށް ނުކެރޭކަމަށެވެ.
"ގައުމީ ސަލާމަތަށް ނުރައްކާވާތީ، އެގްރީމަންޓު ތަކުގައި ކިތައް ޕަސެންޓު އިންޓަރެސްޓު އޭގަ ހިމެނެނީ، ކިތައް އަހަރުންތޯ އަނބުރާ ދައްކަން ޖެހެނީ، ބަޔާންކޮށްލީމައި ހަނޑޫ ހަކުރު ފުށް ލިބުމަށް ހުރަސް އެބައެޅޭ" މުއިއްޒު ވިދާޅުވިއެވެ.
އަދި މިއީ ރަސްމީ އިދާރާތަކުގައި ސަރުކާރުން ޖަވާބުދާރީވި ގޮތްކަން ފާހަގަކުރައްވަމުން މުއިއްޒު ވިދާޅުވީ މި ރާއްޖޭގެ ގަވަރުނަރަށްވެސް ސަރުކާރުން ނަގާފައި ހުރި ލޯނުތަކުގެ ތަފްޞީލް ނޭނގޭ ކަމަށާއި މިކަމުން އެކަނިވެސް ދިވެހިން އަޅުވެތިވެފައިވާ ވަރު ހާމަވެގެންދާކަމަށެވެ.
"ގަވަރުނަރަކަށް ނޭނގޭ ނަގާފައި ހުރި ލޯނުތަކުގެ ތަފްޞީލެއް، އެކަމަކު މިއީ އެމްއެމްއޭގެ ގަވަރުނަރު، އެހާވަރަށް އަޅުވެތިވެފައި މިއޮތީ އަޅުގަނޑުމެން، އަޅުވެތިވެފައި މިއޮތީ އިންތިހާއަށް، އެހެންވީމާ އަޅުގަނޑުމެން މިގޮތަށްތޯ ކުރިއަށް ދާންވީ؟ 9 ދުވަސް އޮތީ ވިސްނަން" މުއިއްޒު ވިދާޅުވިއެވެ.
މީގެ އިތުރުން، މުއިއްޒު ވަނީ އެމްޑީޕީ މެމްބަރުންވެސް ޕާޓީގެ ބޭރުން ވިސްނައި ޤައުމުގެ ސަލާމަތަށްޓަކައި ވިސްނެވުމަށް އެދިވަޑައިގެންފައެވެ.
"އެމްޑީޕީގައި ތިއްބެވި ދެވި ލޮބުވެތި ރައްޔިތުން، އަޅުގަނޑު ދަންނަވަން ބޭނުންވަނީ އަޅުގަނޑަށް ތިބޭފުޅުންނާއި ހުރިހާ ބޭފުޅުންނަށް ހަމަހަމައަށް ޚިދުމަތްކުރުމުގެ ތަފާތެއް ނޯންނާނޭ، އަޅުގަނޑު އެދެނީ ތިބޭފުޅުން ކިބައިން މިކަމަށް ވިސްނަވާށޭ، 9 ދުވަސްތެރޭ ވިސްނަވާ ގޮތެއް ނިންމަވާށޭ" މުއިއްޒު ވިދާޅުވިއެވެ.
"އަޅުގަނޑުމެންގެ އިންޓަރެސްޓު ރޭޓާއި ލޯނު ތަކުގެ ތަފްޞީލަކީ އަޅުގަނޑުމެންނަށް ފިޔަޔާއި ހަނޑުލާއި ފުށާއި ލިބެން ހުރަހަކަށް ވަންޏާ ދެން އިނަފް އިޒް އިނަފް ދެއްތޯ، މީ ދެން ތަންކޮޅެއް ބޮޑުވަރު ހެން އަޅުގަނޑަށް ހީވަނީ، ހަމަ މިހެން ތިބެންވީތޯ ދާނެހާ ގޮތަކަށް ދާން ދޫކޮށްލައިގެން" މުއިއްޒު ވިދާޅުވިއެވެ.
އަދި މިއީ އެމްޑީޕީ މެމްބަރުންގެވެސް އަދި ކޮންމެ ރައްޔިތެއްގެވެސް ޤައުމު ކަމަށާއި މިއީ ޤައުމު އިސްކުރަންޖެހޭ ވަގުތުކަން ފާހަގަކުރައްވަމުން މުއިއްޒު ވިދާޅުވީ އެމަނިކުފާނު އެ ދައްކަވަނީ ސިޔާސީ ވާހަކަ ނޫންކަމަށެވެ.
ހަމައެއާއެކު މި ސަރުކާރުން އެތައް ސުކޫލެއް ރަހުނު ކޮށްފައިވާކަމަށްވެސް މުއިއްޒު ވިދާޅުވިއެވެ.
"އެެއް ތަނެއް ދެތަނެއް ނޫން ރަހުނު ކޮށްފައި ހުރީ، އަޅުގަނޑަށް ނޫންތޯ އިނގޭނީ އެންމެ ބޮޑަށް އަޅުގަނޑު މިހުރި މަޤާމުގެ ހައިސިއްޔަަތުން، މާލޭގެ މޭޔަރަކަށް ހުރެގެން. އެތައް ސުކޫލެއް، 3، 4 ސުކޫލު އެބަހުރި އަޅުގަނޑަށް އެނގިގެންވެސް، ރަހުނު ކޮށްފައި، ރަހުނު ކޮށްފައި ހަމަ ލޯނު ނަގަނީ ލޯނު ނަގަނީ ހަމަ އެއް ތަނަުން ޅޮނު ނަގަނީ، އަޅުގަނޑުމެންގެ ދަރަނީގެ 49 ޕަސެންޓު ވަކި ޤައުމަކަށް ބަރޯސާ ވެފަ" މުއިއްޒު ވިދާޅުވިއެވެ.
އެހެންކަމުން މި ރާއްޖެ ވެއްޓިފައި މިވާ އަނދަވަޅުން ސަލާމަތްކުރުމަށް ހުރިހާ ރައްޔިތުންވެސް ވަކި ޕާޓީއަކަށް ނުބައްލަވައި، ވިސްނުން އެއްގޮތް ކުރައްވައި އެމަނިކުފާނަށް ވޯޓު ދެއްވުމަށް މުއިއްޒު ވަނީ އިލްތިމާސްކުރައްވާފައެވެ.
ވަރަ ވިސްނާފިން 3 އަބޫ