މަޖިލީހުގެ މުވައްޒަފުންގެ މުސާރަ ބޮޑު ކުރެވޭތޯ ބަލަން ނިންމައިފި

އަންނަ އަހަރު ރައްޔިތުންގެ މަޖިލީހުގެ އިދާރީ މުވައްޒަފުންގެ މުސާރަ ބޮޑުކުރެވޭނެ ގޮތެއް އޮތްތޯ ބެލުމަށް މަޖިލީހުގެ އާއްމު ކޮމިޓީން ނިންމައިފިއެވެ.

މަޖިލިސް މުވައްޒަފުންގެ މުސާރަ ބޮޑުކުރަން ހުށަހެޅުއްވީ އަންނަ އަހަރަށް ލަފާކުރާ މަޖިލީހުގެ ބަޖެޓު ދިރާސާ ކުރުމަށް އިއްޔެ ބޭއްވި އާއްމު ކޮމިޓި ބައްދަލުވުމުގައި ހުޅުދޫ ދާއިރާގެ މެންބަރު އިލްޔާސް ލަބީބްއެވެ.

ކޮމިޓީ ބައްދަލުވުމުގައި އޭނާ ވިދާޅުވީ، މަޖިލިސް މުވައްޒަފުންގެ މުސާރައަށް ކުރިއެރުމެއް ނުދޭތާ މިހާރު 10 އަހަރަށް ވުރެ ގިނަ ދުވަސް ވެފައިވާތީ، އަންނަ އަހަރުގެ ބަޖެޓުގައި މަޖިލީހުގެ މުވައްޒަފުންގެ މުސާރަ ބޮޑުކުރަން އޭނާ ހުށަހަޅުއްވާ ކަމަށެވެ.

އެކަމަށް މެންބަރުން ތާއީދުކޮށް، މަޖިލީހުގެ މުވައްޒަފުންގެ މުސާރަ ބޮޑުކުރަން ހިނގާނެ ޚަރަދު ބަލައި، އެކަމުގެ ރިޕޯޓެއް ކޮމިޓީއަށް ހުށަހެޅުމަށް އިއްޔެ ވަނީ ފާސްކޮށްފައެވެ.

ރައްޔިތުންގެ މަޖިލީހުގެ އިދާރާ ހިންގުމަށް އަންނަ އަހަރަށް ހުށަހަޅާފައިވަނީ 187 މިލިއަން ރުފިޔާގެ ބަޖެޓެކެވެ.

މި އަހަރު މަޖިލީހަށް ފާސްކޮށްފައި އޮތީ 182 މިލިއަން ރުފިޔާގެ ބަޖެޓެކެވެ.

ނަމަވެސް 3.6 މިލިއަނެއްހާ ރުފިޔާ އަންނަ އަހަރުގެ ބަޖެޓަށް އިތުރުކުރަން ޖެހެނީ މަޖިލީހުގެ ހެޑް އޮފް އެޑްމިނިސްޓްރޭޝަންސް، އަހުމަދު ފާއިޒް މުހައްމަދު ވިދާޅުވި ގޮތުގައި މަޖިލީހުގެ 20 ވަނަ ދައުރުގައި މެންބަރުންގެ އަދަދު އިތުރުވާތީއެވެ.