އިޤްރާރާ ޚިލާފުވާނަމަ ރައީސް ޔާމީން އަށް ފިޔަވަޅު އަޅާނެ: ކަރެކްޝަންސް

އިދިކޮޅު ލީޑަރު، ރައީސް ޔާމީން އަބްދުލްޤައްޔޫމްގެ ޖަލު ޙުކުމަށް ލުއިތަކެއް ދެއްވި އިރު އެކުލަވާލާފައިވާ އިޤްރާރާއި އެމަނިކުފާނު ޚިލާފުވެވަޑައިގަންނަވައިފިނަމަ، ފިޔަވަޅު އަޅުއްވާނެ ކަމުގައި މޯލްޑިވްސް ކަރެކްޝަނަލް ސާވިސް އިން ވިދާޅުވެއްޖެއެވެ.

Ads by Hajj Corporation

ކަރެކްޝަންސް އިން މިހެން ވިދާޅުވެފައި މިވަނީ، ރައީސް ޔާމީން ރޭ ޕީޕީއެމްގެ ބައެއް އާންމު މެންބަރުންނާ ބައްދަލުކުރައްވާފައިވަނިކޮށެވެ. އެ މިބައްދަލުވުން ރޭ ކުރިއަށް ގެންދިޔައީ އާޓިފިޝަލް ބީޗް ކުރިމައްޗަށްވާ ގޮތަށް ހުންނަ ޕީޕީއެމްގެ މައި އޮފީހުގައެވެ.

ކަރެކްޝަނަލް ސާވިސްގެ މީޑިއާ އޮފިޝަލް ވިދާޅުވީ ރައީސް ޔާމީންގެ ފަރާތްޕުޅުން ބޭސްފަރުވާ ކުރެއްވުމަށާއި، ކަސްރަތުކޮށް އުޅުއްވުމަށް އިތުރު ލުއިތަކަކަށް އެދިވަޑައިގެންފައިވާތީ އެ ފުރުޞަތު އެމަނިކުފާނަށް ދެއްވާފައިވާނެ ކަމަށާއި ކަރެކްޝަނަށް އެންގުވުމަށްފަހު ކޮންމެހެން ބައްދަލުކުރައްވަން އެދޭ ފަރަތްތަކާ ބައްދަލުކުރެއްވުމުގެ ފުރުޞަތުވެސް ދެއްވާފައިވާނެކަމަށެވެ.

މީގެ އިތުރުން ރައީސް ޔާމީން އަށް ލުއިތަކެއް ދެއްވީ ކުރައްވަން މަނާ ކަންތައްތަކެއްވެސް އިޤްރާރެއްގައި ހިމެނުމަށްފަހު ކަމަށާއި އެހެންކަމުން ރައީސް ޔަމީންގެ ޢަމަލުތައް ހުންނަ ގޮތް ކަރެކްޝަނުން މޮނިޓާ ކުރައްވާނެކަމަށެވެ.

"އިގުރާރާ ހިލާފްވާނަމަ ފިޔަވަޅު އަޅާނެ ކަމުގައި ދަންނަވާފައިވާނެ،" އޮފިޝަލް ވިދާޅުވި އެވެ.

ރައީސް ޔާމީނުގެ ޖަލު ޙުކުމަށް މި ލުއި ދެއްވާފައިވަނީ މީގެ 15 ވަރަކަށް ދުވަސްކުރިން ރައީސް ޔާމީން އަމިއްލަފުޅަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހާއި ވާހަކަފުޅުދެއްކެވުމުންނެވެ.

މި ލުޔަކާއި އެކު ރައީސް ޔާމިނަށް މާލެ ސަރަހައްދުގައި ހިމެނޭ މާލެ ވިލިމާލެ އަދި ހުޅުމާލެއަށް އެމަނިކުފާނަށް ވަޑައިގެންނެވޭނެއެވެ.

ވ.އާރަށް މައްސަލައިގައި ރައީސް ޔާމީންގެ މައްޗަށް 11 ‏އަހަރުގެ ޖަލު ޙުކުމެއް އިއްވައިފައިވާއިރު، އެމަނިކުފާނުގެ މައްޗަށް ކުރި ޙުކުމްގެ އިސްތިއުނާފު މައްސަލަ އަދިވެސް ނުނިމެއެވެ. މި އަހަރުގެ ރިޔާސީ އިންތިޚާބުގައި ވާދަކުރެއްވުމަށް ރައީީސް ޔާމީނަށް ފުރުސަތު ގެއްލިގެން ދިޔައިރު، އެއީ އެމަނިކުފާނަށް ސިޔާސީ ޙުކުމެއް ކުރުމުގެ ނަތީޖާ ކަމަށް ވެސް އެމަނިކުފާނުގެ ސަޕޯޓަރުން ބުނެއެވެ.