ޣައްޒާ އަށް އެހީ ފޯރުކޮށްދޭން ހުޅުވި ރަފަހް ބޯޑަރު ބަންދުކޮށްފި
ފަލަސްތީނުގެ ޣައްޒާ އަށް އިންސާނީ އެހީ ފޯރުކޮށްދޭން ހުޅުވި ރަފަހް ބޯޑަރު ބަންދުކޮށްފިއެވެ.
އެމެރިކާއިން ބުދަ ދުވަހު ބުނީ ރަފަހް ބޯޑަރު ހުރަސްކުރުން ބަންދުކޮށްފައިވަނީ ސަލާމަތީ ހާލަތެއް މެދުވެރިވެގެން ކަމަށެވެ.
ސްޓޭޓް ޑިޕާޓްމަންޓުގެ ޑެޕިއުޓީ ސްޕޯކްސްޕާސަން ވެދާންތު ޕަޓޭލް ނޫސްވެރިންނާ ވާހަކަ ދައްކަވަމުން ބުނީ ވިސްނުމަކީ ސަލާމަތީ ހާލަތަށް ރިއާޔަތްކޮށް، ރަފަހް ބޯޑަރު ހުރަސްކުރުން ބަންދުކުރުން ކަމަށެވެ.
ޕަޓޭލް ބުނީ ސަލާމަތީ ކަންކަން ހައްލުވުމުން ޣައްޒާއަށާއި ބޭރުގެ ރައްޔިތުންނާއި އެހެނިހެން ފަރާތްތަކަށް އިންސާނީ އެހީތެރިކަން ފޯރުކޮށްދިނުމުގެ ފުރުސަތު ދިނުމުގެ ގޮތުން ބޯޑަރު ހުރަސްކުރުން "ގަވާއިދުން" އަލުން ހުޅުވާލާނެ ކަމަށެވެ.
ފަލަސްތީނުގެ ބައެއް މަސްދަރުތަކުން ބުނާ ގޮތުގައި ފާއިތުވި ދުވަސްތަކުގައި ޒަހަމްވި ފަލަސްތީނުގެ ގިނަ އަދަދެއްގެ މީހުންނާއި ބޭރުގެ ޕާސްޕޯޓް ހޯލްޑަރުން ވަނީ ޣައްޒާއިން ރަފަހް ބޯޑަރު ހުރަސްކޮށް މިސްރަށް ދަތުރުކޮށްފައެވެ.
