ވިޝާމްގެ ހަނދާނުގައި ހުޅުވި ދަފްތަރުގައި ނައިބު ރައީސް ސޮއިކުރައްވައިފި
ދިވެހިރާއްޖޭގެ ބާރ ކައުންސިލްގެ ރައީސް އަލްމަރްޙޫމް އަލްއުސްތާޛު އިސްމާޢީލް ވިޝާމްގެ ހަނދާނުގައި ދިވެހިރާއްޖޭގެ ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަންގައި ހުޅުވާފައިވާ ތަޢުޒިޔާގެ ދަފްތަރުގައި ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް ސޮއިކުރައްވައިފިއެވެ.
ތަޢުޒިޔާގެ ދަފުތަރުގައި ރައީސުލްޖުމްހޫރިއްޔާގެ ނައިބު ސޮއިކުރައްވައި ލިޔުއްވި ބަޔާނުގައި އެމަނިކުފާ ވަނީ، އަލްމަރްޙޫމް އަލްއުސްތާޛު އިސްމާޢީލް ވިޝާމަކީ ދިވެހިރާއްޖޭގެ ޤާނޫނީ ޚިދުމަތުގެ ދާއިރާ ކުރިއެރުވުމަށް ނުހަނު އަގުހުރި މަސައްކަތްޕުޅުތަކެއް ކުރައްވާފައިވާ ބޭފުޅެއްކަން ފާހަގަ ކުރައްވާފައެވެ. އަދި އަލްމަރްޙޫމް ވިޝާމް ވަނީ ބާރ ކައުންސިލު ހަރުދަނާ ކުރުމުގައި ޤާނޫނީ ފަންނުވެރިންގެ ލޯތްބާއި އިޙުތިރާމް ހޯއްދަވާފައިކަންވެސް ރައީސުލްޖުމްހޫރިއްޔާގެ ނައިބުގެ ބަޔާނުގައި ފާހަގަކުރައްވާފައިވެއެވެ.
މި ބަޔާން ނިންމަވައިލައްވަމުން، ރައީސުލްޖުމްހޫރިއްޔާގެ ނައިބު ވަނީ، އަލްމަރުޙޫމް އިސްމާޢީލް ވިޝާމްގެ ޢާއިލާއަށާއި، ބާރ ކައުންސިލްގެ މެންބަރުންނަށާއި، ޤާނޫނީ ޚިދުމަތުގެ ދާއިރާގައި މަސައްކަތް ކުރައްވާ ހުރިހާ ބޭފުޅުންނަށް އިޚުލާޞްތެރިކަމާއެކު ތަޢުޒިޔާ ވިދާޅުވެފައެވެ.
