ދޮޅު މަހުން 45 މިލިއަން ރުފިޔާގެ ޑްރަގްސް އަތުލައިގަނެފި
ފާއިތުވެދިޔަ ދޮޅުމަހެއްހާ ދުވަހުގެ ތެރޭގައި 44.5 މިލިއަން ރުފިޔާގެ މަސްތުވާތަކެތި އަތުލައިގަނެފައިވާ ކަމަށް ހޯމްލޭންޑް މިނިސްޓަރު އަލީ އިހުސާން މިރޭ ވިދާޅުވެއްޖެއެވެ.
މިނިސްޓަރު އިހުސާން މިހެން ވިދާޅުވީ ރައީސް ޑރ. މުހައްމަދު މުޢިއްޒު އައްޑުއަށް ކުރައްވާ ދަތުރުފުޅުގައި، ފޭދޫގައި މިރޭ ބޭއްވި ޖަލްސާގައި ވާހަކަ ދައްކަވަމުންނެވެ.
އެގޮތުން ފާއިތުވި ދޮޅު މަހެއްހާ ދުވަހު ކުރެވުނު މަސައްކަތުން 44.5 މިލިއަން ރުފިޔާގެ ޑްރަގްސް ވާނީ މަގުތަކުގައި ދައުރުވުން ހުއްޓުވާފައި ކަމަށް ވިދާޅުވިއެވެ.
އިހުސާން ވިދާޅުވީ ރައީސް މުޢިއްޒުގެ ސަރުކާރުގެ އަމާޒަކީ ކުރިއަށް އޮތް ފަސް އަހަރުގެ ތެރޭގައި މަސްތުވާތަކެތީގެ މައްސަލަތައް މުޅިން ހުއްޓުވުން ކަމަށެވެ.
މަސްތުވާތަކެތީގެ މައްސަލަތައް ހުއްޓުވުމަށް ކުރަމުން އަންނަ މަސައްކަތުގެ ތެރެއިން މި ވެރިކަން ފެށުނުއިރު މަސްތުވާތަކެތީގެ ފަރުވާއަށް އެދިގެން 500 އެއްހާ މީހުން ތިބި ކަމަށާއިި އޭގެ ތެރެއިން 300 މީހުންގެ ފަރުވާ މިހާރު ފަށާފައިވާ ކަމަށްވެސް މިނިސްޓަރު ވަނީ ފާހަގަކުރައްވާފައެވެ.
ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލުކުރުމަށް ކުރަމުން އަންނަ މަސައްކަތުގެ ތެރެއިން 1800 އަށް ވުރެ ގިނަ މީހުން ޑީޕޯޓު ކޮށްފައިވާ ކަމަށް މިނިސްޓަރު ވިދާޅުވި އެވެ.
މީގެ އިތުރުން މިނިސްޓަރު ފާހަގަކުރެއްވި ގޮތުގައި ރައީސް މުޢިއްޒުގެ ހަފްތާ 14ގެ މަގުޗާޓުގައި ހިމެނޭކަންކަން ހާސިލް ކުރުމަށް އެ މަނިކުފާނު އަންނަނީ ރެއާއި ދުވާލު ކެބިނެޓާއި ބައްދަލު ކުރައްވާ މަޝްވަރާ ކުރައްވަމުން ކަަމަށެވެ. އަދި މި ސަރުކާރަށް ތިން މަސް ދުވަސް ނުވަނީސް ގިނަ ކަންކަން ހާސިލް ކުރެވިފައިވާ ކަމަށް އިހްސާން ވިދާޅުވިއެވެ.
Ads by STO
