މަޖިލީސް އިންތިހާބުގައި ގައުމީ ވިސްނުން އިސްކުރައްވަން ރައީސް އެދިވަޑައިގެންފި
ކުރިއަށް އޮތް މަޖިލިސް އިންތިޚާބުގައި ޤައުމީ ވިސްނުމެއްގައި މަސައްކަތްކޮށް، ސަރުކާރާ މެޖޯރިޓީ ހޯދައިދީފިނަމަ ރައްޔިތުން ހަވާލުކުރި ކަންކަން ބާރު ދުވެލީގައި ކުރިއަށްދާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މުޢިއްޒު މިހެން ވިދާޅުވީ ގދ.ތިނަދޫގައި ރައްޔިތުންނާ ބައްދަލުކުރައްވާ ރޭ ދެއްކެވި ވާހަކަފުޅުގައެވެ.
ރައްޔިތުންގެ މަޖިލީހުން މިހާރު ފެންނަ ކަންކަން ބަދަލު ކުރުމުގެ ބާރު އޮތީ ރައްޔިތުންނަށް ކަން ފާހަގަކުރައްވާ ރައީސް ވިދާޅުވީ މާރިޗު މަހު އޮންނަ މަޖިލީހުގެ އިންތިޚާބުގައި ޤައުމީ ވިސްނުމެއްގައި ރައްޔިތުން މަސައްކަތްކޮށްފިނަމަ، ރައްޔިތުން އެ މަނިކުފާނާއި ހަވާލުކުރެއްވި ކަންކަން ބާރު ދުވެލީގައި ކުރިއަށްދާނެ ކަމަށެވެ.
މުހިންމީ ރައްޔިތުން ބޭނުންވާ ކަންކަން ފުރިހަމަވުން ކަމަށް ރައީސް ވަނީ ވިދާޅުވެފައެވެ.
ބަދަލު ހިފުމުގެ ރޫހު ރާއްޖެއިން ނެތެންޖެހޭ ކަމަށާއި، ސިޔާސީ ވިސްނުމުގައި ބޭއިންސާފުން ކަންކަން ކުރުން ނިމުމަކަށް އަންނަންޖެހޭ ކަމަށްވެސް ރައީސް ވަނީ ފާހަގަކުރައްވާފައެވެ.
ރައްޔިތުންގެ ސިޔާސީ ވިސްނުން ހުރިގޮތް ބެލުމަކީ މުހިންމު ކަމެއް ނޫން ކަމަށާއި ކޮންމެ ރައްޔިތެއްވެސް އެ މަނިކުފާނަށް ވާނީ ހަމަހަމަ ކަމަށް ރައީސް ވަނީ ވިދާޅުވެފައެވެ.
ކުރައްވާނީ ޤާނޫނުގެ ވެރިކަން ކަމަށާއި ކުރީގެ ސަރުކާރުތަކުން ކޮމިޝަންތައް ހަދައި ސިޔާސީ ވެރިން ހައްޔަރު ކުރުމާ ކަންކަން ހިންގިހެން އެ މަނިކުފާނުގެ ސަރުކާރުގައި އެ ކަންކަން އެ ގޮތަށް ނުކުރައްވާނެ ކަމަށް ރައީސް މުޢިއްޒު ވަނީ ވިދާޅުވެފައެވެ.
މީގެ އިތުރުން މި ސަރުކާރު އައީ ޤައުމަށް ހަމަޖެހުން ގެންނަންކަމުގައި ވިދާޅުވެ، އެންމެން އެއްބައިވަންތަކަމާއެކު މަސައްކަތްކުރުމަށާއި، ސަރުކާރުން ކުރާ މަސައްކަތްތަކަށް ރައްޔިތުން އެއްބާރުލުން ދެއްވުމަށް ރައީސް މުޢިއްޒު އެދިވަޑައިގެންނެވިއެވެ.
