ރައްޔިތުންގެ މަޖިލިސް އިންތިޚާބު އޮންނާނީ ރޯދަ މަހުގެ ހަތް ވަނަ ދުވަހަށްވާ މާޗު 17ގައި ކަމަށް ރައީސް ޑރ. މުޙައްމަދު މުޢިއްޒު މިއަދު ވިދާޅުވެއްޖެއެވެ.
ރޯދައިގެ ފަހުން އިންތިޚާބު ބާއްވާ ގޮތަށް ގާނޫނު އިސްލާހުކޮށް، އެ ބިލު ތަސްދީގުކުރަން ރައީސް އޮފީހަށް ފޮނުވީ މި މަހު 12 ގައެވެ. ނަމަވެސް، މިދިޔަ ހޯމަ ދުވަހު ރައީސް މުއިއްޒު ވަނީ އެ ބިލު ތަސްދީގުނުކޮށް، އަނބުރާ މަޖިލީހަށް ފޮނުވާލާފައެވެ.
އެގޮތުން ނ. ހޮޅުދުއަށް ވަޑައިގެން އެ ރަށުގެ ރައްޔިތުންނާއި ވާހަކަދައްކަވަމުން އެ މަނިކުފާނު ވިދާޅުވީ މި ސަރުކާރުގެ މަސައްކަތަށް ހުރަސް އަޅަން ވަކި ފަރާތަކުން އޯޑަރު ދިނުމުން، އެގޮތަށް ބަޔަކު އަމަލު ކުރަމުން އަންނަ ކަމަށެވެ.
ހަމަ އެހެންމެ އެ މަނިކުފާނަށް މި ވާނުވާ އޮޅިފައެއް ނެތް ކަމަށާއި ރައްޔިތުންނަށް ވެސް އޮޅިގެން ނުވާނެ ކަމަށް ރައީސް ވަނީ ވިދާޅުވެފައެވެ.
މި ފެންނަމުންދާ މަންޒަރުތަކަށް ޣާފިލުކަން މަތީގައި ޣާފިލުވެ ތިބުމަކީ އަމިއްލަ ނަފުސަށް އޮޅުވާލާ އޮޅުވާލުމަކަށް ވާނެ ކަމަށް ރައީސް ވިދާޅުވިއެވެ.
