ކޮވިޑް-19: ހުޅުމާލޭ ޖަލުން މިހާތަނަށް 26 މީހަކު ފައްސި ވެފައިވޭ
ހުޅުމާލޭ ޖަލުން މިހާތަނަށް 26 މީހަކު ކޮވިޑް-19 ފައްސި ވެފައިވާ ކަމަށް މޯލްޑިވްސް ކަރެކްޝަނަލް ސާވިސަސް އިން މައުލޫމާތު ދީފިއެވެ.
ކަރެކްޝަންސް އިން ބުނީ ހުޅުމާލެ ޖަލު،ޑިޓެންޝަން ސެންޓަރުގައި މަސައްކަތް ކުރާ 10 އޮފިސަރުންގެ މިބައްޔަށް ޓެސްޓު ކުރިއިރު، އެމީހުންގެ ނަތީޖާ ނައްސި ކަމަށެވެ. މީގެއިތުރުން ކަރެކްޝަންސް އިން ބުނެފައިވަނީ ގައިދީންގެ ތެރެއިން 41 ސާމްޕަލް ނެގި ކަމަށާއި، އޭގެ ތެރެއިން 16 މީހަކު ފައްސި ވެފައިވާ ކަމަށެވެ. ހަ ސާމްޕަލެއްގެ ނަތީޖާ އަދި ލިބިފައިނުވާއިރު 19 ގައިދީންގެ 19 ސާމްޕަލެއް ވަނީ ނައްސި ވެފައިކަމަށް ވެސް ކަރެކްޝަންސް އިން ބުނެއެވެ.
އިމިގްރޭޝަން ގާނޫނާ ހިލާފުވެގެން ފުރުވާލެވެންދެން ހުޅުމާލެ ޑިޓެންޝަން ސެންޓަރުގައި ބައިތިއްބާފައި ތިބި ބިދޭސީންގެ ތެރެއިން 31 ސާމްޕަލް ނެގިއިރު، މިހާތަނަށް ފައްސިވެފައި ވަނީ 10 ބިދޭސީން ކަަމަށާއި 16 ސާމްޕަލެއް ނައްސި ވެފައިވާއިރު ނަތީޖާ ނުލިބި ފަސް ސާމްޕަލް އެބަހުރި ކަމަށް ވެސް ކަރެކްޝަންސް އިން ބުނެއެވެ.
ކަރެކްޝަންސުން ބުނި ގޮތުގައި ހުޅުމާލެ ޑިޓެންޝަން ސެންޓަރަށް މި ބަލި ވަދެފައިވާ ކަމަށް ބެލެވެނީ އަލަށް ގެނެވުނު ބިދޭސީންގެ ފަރާތުންނެވެ. އަދި މި ހާލަތާ ގުޅިގެން އެޗްޕީއޭގެ ގައިޑްލައިންތަކާ އެއްގޮތަށް، އެ ސަރވިސް އިން ކަނޑައަޅާފައިވާ އުސޫލުތަކާ އެއްގޮތަށް ޖަލުތަކުގައި މެދުކެނޑުމެއް ނެތި ފިޔަވަޅުތައް އަޅާނެ ކަމަށް ވެސް ބުނެފައިވެއެވެ.
Ads by STO
