"ދެރަދުން" ނެެރެން ބޭއްވީ ސިޔާސީ ހަރަކާތެއް ނޫން، ފިޔަވަޅެއް ނޭޅޭނެ: އީސީ

ކުރީގެ ރައީސް އަދި މިހާރު ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ލިޔުއްވި "ދެރަދުން" ފޮތް ނެރުމަށް ބޭއްވި ހަރަކާތަކީ ސިޔާސީ ޕާޓީއަކުން އިންތިޒާމް ކުރި ސިޔާސީ ހަރަކާތެއް ނޫން ކަމަށާއި، އެހެންކަމުން އެކަމުގައި އިލެކްޝަންސް ކޮމިޝަނަށް ފިޔަވަޅެއް ނޭޅޭނެ ކަމަށް އީސީން ބުނެފިއެވެ.

Ads by MWSC

މިފޮތް ނެރުމުގެ ހަފްލާގައި ރައީސް ނަޝީދު އާއި އެހެން ބައެއް ބޭފުޅުން ވެސް މާސްކު ނާޅާ އުޅުއްވި ކަމާއި އެޗްޕީއޭގެ މިންގަނޑުތަކާއި އެއްގޮތަށް ގައިދުރުކަން ވެސް ބަހައްޓާފައި ނުވާކަން ގިނަ ބަޔަކު ފާހަގަކޮށްފައެވެ. އަދި މިކަމާއި ސަރުކާރުގެ ކަމާއިބެހޭ ފަރާތްތަކުން އެއްވެސް ފިޔަވަޅެއް ނާޅުއްވާތީ ގިނަ ބަޔަކު ވަނީ ނުރުހުން ފާޅު ކޮށްފައެވެ.

ނަމަވެސް މިދިޔަ ހުކުރު ދުވަހު އިދިކޮޅު ޕީޕީއެމް،ޕީއެންސީ އިން ކުރިއަށް ގެންދިޔަ ސައިކަލު ބުރުގައި، އެޗްޕީއޭގެ ގައިޑްލައިނާ ހިލާފުވި ކަމަށް ބުނެ ދެ ޕާޓީގެ ލީޑަޝިޕްގެ ބޭފުޅުންނާއި، އެ ދެ ޕާޓީ ވެސް ވަނީ ބޮޑު އަދަދަކުން ޖޫރިމަނާ ކޮށްފައެވެ. އޭގެ ސަބަބުން ވަރަށް ގިނަ ބައެއްގެ ފާޑު ކިޔުން ސަރުކާރަށް ވަނީ އަމާޒުވެފައެވެ.

ސަންގު ޓީވީގެ ޕްރޮގްރާމެއްގައި އެފަދަ ފާޑު ކިޔުންތަކަށް ޖަވާބު ދެއްވަމުން އީސީގެ ރައީސް އަޙުމަދު ޝަރީފު ވިދާޅުވީ ރައީސް ނަޝީދު މާސްކް ނާޅުއްވައި ރެސްޓޯރަންޓުތަކުގައި އޮޓޯގްރާފް ދެއްވަން އިންނެވި މަންޒަރު ފެންނަ ފޮޓޯތައް ވެސް ސަމާލުކަމަށް އައިސްފައިވާ ކަމަށެވެ.

އެފޮޓޯތަކާއި ފެންނަ މަންޒަރުތަކާ ގުޅިގެން، އެޗްޕީއޭގެ ގައިޑްލައިންތަކާ އަދި ހެދިފައިވާ ގާނޫނުތަކާ ގަވާއިދުތަކާ ހިލާފަށް އެއްވެސް ސިޔާސީ ހަރަކާތެއް ނުހިންގަން ހުރިހާ ސިޔާސީ ޕާޓީއަކަށް އަންގައި ލިޔުން ފޮނުވާފައިވާނެ ކަމަށް ވެސް އެކޮމިޝަންގެ ރައީސް ވިދާޅުވިއެވެ. ނަމަވެސް އިލެކްޝަންސް އިން ސިޔާސީ ހަރަކާތުގެ ގޮތުގައި ބަލަނީ ސިޔާސީ ޕާޓީއަކުން އިންތިޒާމް ކުރާ ކައުންސިލް ބައްދަލުވުންތަކާއި، ޕްރެސް ބްރީފިންތަކާއި، އެއްވުން ފަދަ ހަރަކާތްތައް ކަމަށް ޝަރީފު ވިދާޅުވިއެވެ.

"އެހެންވީމަ އެފަދަ ސިޔާސީ ހަރަކާތްތަކުގައި ހަމަ އަމަލުކުރަން ޖެހޭނީ އެޗްޕީއޭގެ ގައިޑްލައިން އާއި ގާނޫނުތަކާ ގަވާއިދުތަކާ އެއްގޮތަށް ކަމަށް. ހަމަ ޕީޕީއެމް ޕީއެންސީއަށް ފޮނުވި މޭރުމުން މިހާރު ހުރިހާ ސިޔާސީ ޕާޓީތަކަށް ވެސް ހުންނާނީ ފޮނުވާފައި،" ޝަރީފް ވިދާޅުވިއެވެ.

މީގެއިތުރުން ޝަރީފް ވިދާޅުވީ އިލެކްޝަންސް އިން ފިޔަވަޅު އަޅަން ބާރު ލިބެނީ ސިޔާސީ ހަރަކާތްތަކަށް އެކަނި ކަމަށާއި ފިޔަވަޅު އެޅޭނީ ސިޔާސީ ޕާޓީއަކުން ކޮށްގެން ނުވާނެ ކަމެއް ސިޔާސީ ހަރަކާތެއްގެ ތެރޭގައި ހިނގުމުން ކަމަށެވެ.