މޮޅު މީހާއަކީ އިހުތިރާމް ކުރާ މީހުން، ފަހަތަކަށް ނުޖެއްސޭނެ: ފައިސަލް
- ފައިސަލްއަށް ނިސްބަތްކޮށް އިދިކޮޅުން ދަނީ ފުރައްސާރަ ކުރަމުން
- ވަޒީރު ވިދާޅުވީ އެންމެ މޮޅު މީހާ ނޫނަސް ފަހަތަށް ނުޖެއްސޭނެ ކަމަށް
ސިޔާސީ ގޮތުން ސަރުކާރާއި އިދިކޮޅު ފަރާތްތަކުން ކުރާ ފުރައްސާރައިން ފަހަތައް ޖެހިވަޑައިނުގަންނަވާނެކަމަށް ފަތުރުވެރިކަމާއި ބެހޭ ވަޒީރު އިބްރާހިމް ފައިސަލް ވިދާޅުވެއްޖެ އެވެ.
ފައިސަލް ރާއްޖެއިން ބޭރަށް ވަޑައިގެން އިނގިރޭސި ބަހުން ދެއްވަމުން ގެންދަވާ ތަގުރީރުތަކާއި ބަސްގަތުންތަކުގައި ކޮށި އިނގިރޭސިބަހުން ވާހަކަ ދައްކާތީ އިދިކޮޅުން ދަނީ ވަރަށް ބޮޑަށް ފާޑު ކިޔަމުންނެވެ. އެގޮތުން ދާދި ފަހުން ބޭއްވި ފަތުރުވެރިކަމާއިބެހޭ އެވޯޑު ހަފްލާއެއްގައި ދެއްވި ބަސްތީގަތުމަކަށް އިޝާރާތް ކުރައްވައި ޕީއެންއެފްގެ ސެކެޓްރީ ޖެނެރަލް މުހައްމަދު މަލީހު ޖަމާލު ވަނީ ފައިސަލްއަށް ވަރަށް ބޮޑަށް ފާޑު ވިދާޅުވެފަ އެވެ.
މަލީހު ވިދާޅުވީ މުޅި ދުނިޔެއިން މި ސަރުކާރާއި ގުޅޭގޮތުން ވާހަކަ ދައްކަމުން ގެންދާކަމަށެވެ. ފައިސަލްގެ ބައްޕަ ފޮނަދޫ ދާއިރާގެ އިންތިހާބީ މެމްބަރު އަބްދުއްރަހީމް އަބްދުﷲ އަށް އިޝާރާތް ކުރައްވައި މަލީހު ވިދާޅުވީ ދަރިކަލުން ގެންދަވަނީ ބައިނަލްއަގުވާމީ ދުނިޔޭގައި ގައުމު ފަހުރުވެރި ކުރުވަމުން ކަމަށެވެ. މީގެ ކުރިންވެސް މަލީހު ވަނީ އެތައް ފަހަރެއްގެ މަތިން ފައިސަލްއަށް ފުރައްސާރަ ކުރައްވައިފަ އެވެ.
މިވާހަކަތަކަށް އިޝާރާތް ކުރައްވައި ވަޒީރު ވަނީ ހުރިހާ ސަރުކާރެއްގައި މަލީހު މިނިސްޓަރަކަށް ހުންނަވައި ވަކި މޮޅުކަމެއް ކުރެވުނުތޯ ސުވާލު އުފައްދަވައިފަ އެވެ. އަދި އެންމެ މޮޅު މީހާކަމަށް ދައުވާ ނުކުރައްވާކަމަށާއި އެހެންނަމަވެސް އެންމެ މޮޅު މީހާއަކީ އަނެކާއަށް އިހުތިރާމް ކުރާ މީހާކަމަށް ފައިސަލް ވިދާޅުވި އެވެ.
"ޖަމީލު އަދި މަލީހުއަށްވެސް އޮތީ މިއަދުގެ ސިޔާސީ ހަގީގަތް ގަބޫލު ކުރުން. ތިހެން އަދި ފަހަތަކަށް ނުޖެއްސޭނެ" ހިނިތުންވެފައިވާ އިމޯޖީއަކާއިއެކު ފައިސަލް ވިދާޅުވި އެވެ.
މީގެ އިތުރުން ފައިސަލް ވަނީ ކުރީގެ ރައީސް އިބްރާހިމް މުހައްމަދު ޞާލިހު ވެރިކަމުގައި ހުންނެވި ދުވަސްވަރު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ނޫސްވެރިޔަކު އިނގިރޭސިބަހުން ސުވާލު ކުރެއްވުމުން އެއަށް އިނގިރޭސިބަހުން ޖަވާބު ދެއްވަން ދެކޮޅު ހެއްދެވި ވީޑިއޯވެސް އެކްސްގައި ޕޯސްޓު ކުރައްވައިފަ އެވެ.
