ގައިދީންނަށް ދަރުސް ދޭން ފަށަނީ
އަންނަ މަހު ޖަލުގައި ތިބި ގައިދީންނަށް ދީނީ ދަރުސް ދިނުމުގެ ޕްރޮގްރާމެއް ފަށަން ނިންމާފައިވާ ކަމަށް އެސިސްޓެންޓް ކޮމިޝަނަރ އޮފް ޕްރިޒަންސް މުޙައްމަދު އާސިފް ވިދާޅުވެއްޖެއެވެ.
ދާޚިލީ ސަލާމަތާއި ފަންނިއްޔާތާ ބެހޭ ވުޒާރާ އަދި ކަމާގުޅުންހުރި މުއައްސަސާތަކާއި ގުޅިގެން މިހާރު ކުރިއަށް ގެންދާ ނޫސްވެރިންގެ ބައްދަލުވުމުގައި ވާހަަކަފުޅުދައްކަވަމުން އާސިފް ވިދާޅުވީ މި ޕްރޮގްރާމް ތިން ޖަލުގައި ވެސް ބާއްވަން ގަސްތުކޮށްފައިވާ ކަމަށާއި މިއީ އިސްލާމިކް މިނިސްޓްރީއާ ގުޅިގެން ބާއްވާ ޕްރޮގްރާމެއް ކަމަށެވެ.
މި ޕްރޮގްރާމްގެ ޒަރިއްޔާއިން ޖަލުގަ ތިބޭ ދީނީ ހިޔާލުތަފާތުވުން ހިމެނޭ ގައިދީންނާއި އަދި އިތުރަށް ދީނީ ކަންތައްތައް އޮޅުން ފިލުވަން ބޭނުންވާ ގައިދީންނަށް އެ އެހީތެރިކަން ފޯރުކޮށްދެވިގެންދާނެ ކަމަށް އާސިފް ވިދާޅުވިއެވެ.
"މި ޕްރޮގްރާމްގަ ޖަލުގަ ތިބޭ ދީނީ ހިޔާލުތަފާތުވުން ހިމެނޭ ގައިދީންނާއި އަދި އިތުރަށް ދީނީ ކަންތައްތައް އޮޅުން ފިލުވަން ބޭނުންވާ ގައިދީންނަށް އެ އެހީތެރިކަން އަޅުގަނޑުމެން އެކި ލެވެލްގަ ފޯރުކޮށްދެމުން ދާނަން. މި ޕްރްގްރާމް އަޅުގަނޑުމެންގެ 3 ޖަލުގައި ވެސް ހިނގަން ގަސްތުކޮށްފައިވަނީ" އާސިފް ވިދާޅުވިއެވެ.
އާސިފް ވިދާޅުވީ ކޮމިއުނިޓީ ސާވިސްއަށް ހުކުމްކޮށްފައިތިބި 54 މީހުން ކަރެކްޝަންސްގެ ބެލުމުގެ ދަށުގައި މިހާރު އެބަތިބި ކަމަށާއި އޭގެ ތެރެއިން 4 މީހަކު ހުކުމް ތަންފީޒުކޮށް މިހާރު ނިމިފައިވާ ކަމަށެވެ.
