ހުރަހެއް ނެތި ހަތިޔާރު ގެނެވޭނެ ކަމަށް ބުނެ ހަބަރު ފެތުރީ އޮޅޭ ގޮތަށް: ކަސްޓަމްސް
އެއްވެސް ހުރަހެއް ނެތި، ރާއްޖެއަށް ހަތިޔާރު އެތެރެކުރެވޭނެ މަގު ހުޅުވިފައިވާ ކަމަށް ބުނެ ނޫސްތަކުން ހަބަރު ގެނެސްފައިވަނީ މަފްހޫމް އޮޅޭ ގޮތަށް ކަމަށް ކަސްޓަމްސް އިން ބުނެފި އެވެ.
މިއަދު ކުރިއަށް ދިޔަ ރައްޔިތުންގެ މަޖިލީހުގެ މިނިވަން މުއައްސަސާތަކާއި ބެހޭ ކޮމިޓީގައި އެސިސްޓެންޓް ކޮމިޝަނަރު އޮފް ކަސްޓަމްސް އިސްމާއިލް ހަމްދޫން ވިދާޅުވީ ރާއްޖޭގެ ބޯޑަރުތައް އޮތީ ބަޔަކު ބޭނުންވެއްޖެ ނަމަ ހަތިޔާރު ވެސް ގެނެވޭ ގޮތަށް ހުޅުވިފައިވާ ކަމަށެވެ.
''މިސާލަކަށް ހަތިޔާރު ގެންނަން މީހަކު ނިޔަތް ނުގަންނަނީ. ނިޔަތް ގަނެފިއްޔާ އޭގެ މާނައަކީ ރާއްޖެއަށް ހަތިޔާރު ގެނެވޭނެ މަގު އެއޮތީ ހުޅުވިފައޭ'' ހަމްދޫން ވިދާޅުވެފައިވެ އެވެ.
ކަސްޓަމުން ނެރުނު ބަޔާނެއްގައި ބުނީ މީޑިއާތަކުން ހަމްދޫންގެ ވާހަކަތައް ގެނެސްފައިވަނީ ރައްޔިތުންގެ ހިތްތަކުގައި ބިރުވެރިކަން އުފެދޭ ފަދަ ގޮތަކަށް ކަމަށެވެ.
"ހަބަރުތަކުގައި ތަސްވުރު ކުރެވިފައިވާ "ހަތިޔާރު" ނުވަތަ "ހަނގުރާމަވެރި ހަތިޔާރު" އެއްވެސް ހުރަހެއް ނެތި ރާއްޖެއަށް ގެނައުމަށް ހުޅުވާލެވިފައިވާ ކަމަށް ކަސްޓަމްސްއިން ބުނި ކަމަށް ދޭހަވާގޮތަށް ހަބަރުތަކުގައި ލިޔެވިފައިވަނީ މަފްހޫމު އޮޅޭގޮތަށް" ކަސްޓަމްސް އިން ބުންޏެެވެ.
މިއަދު ކުރިއަށް ދިޔަ ކޮމިޓީގައި މައިގަނޑު ގޮތެއްގައި ކަސްޓަމަށް ސުވާލު އަމާޒުވީ ރާއްޖެއަށް މަސްތުވާތަކެތި އެތެރެކުރުމާއި ސިއްރުން ނުވަތަ ގާނޫނާ ހިލާފަށް ރާއްޖެއަށް ތަކެތި އެތެރެކުރުން ހުއްޓުވުމުގައި ކަސްޓަމްސްއަށް ހުރި ގޮންޖެހުންތަކާ ގުޅޭ ގޮތުންނެވެ.
ކަސްޓަމްސްގެ ބުނީ މަސްތުވާތަކެތީގެ އިތުރުން އެހެން ތަކެތިވެސް އެތެރެކުރުމުގެ ފުރުސަތު އޮންނާނެތީ އެކަން ހުއްޓުވުމަށްޓަކައި، ސަރަހައްދީ ގައުމުތަކުގެ މެދުގައި މައުލޫމާތު ހިއްސާކުރުމާއި ސަވައިލަންސް އާއި މޮނިޓަރިން އިތުރަށް ހަރުދަނާކުރުމުގެ ރާއްޖެ އާއި ރާއްޖެއިން ބޭރުގެ ކަމާބެހޭ ފަރާތްތަކާ ގުޅިގެން ކުރަމުންދާ ކަމަށެވެ.
ކަސްޓަމުން ބުނި ގޮތުގައި ރާއްޖޭގެ ސަލާމަތާއި ރައްކާތެރިކަން ކަށަވަރު ކުރުމަށް ގައުމީ ދިފާއީބާރުން ރާއްޖޭގެ ސަރަހައްދު ކަނޑާއި ވައިގެ މަގުން 24 ގަޑިއިރު ބަލަހައްޓަމުންދާއިރު، ކަސްޓަމުން ބަލަން ޖެހޭ ކަންކަން ވެސް އެ ހިދުމަތާ ގުޅިގެން ބަލަހައްޓަމުންދާ ކަމުގަ އެވެ. އެގޮތުން ދުރާލައި އުޅަނދުފަހަރު އައުމުގެ ކުރިން އެއާބެހޭ މައުލޫމާތު ހޯދައި ރިސްކުތައް ދެނެގަނެ، ރިސްކު އޮންނަ ހާލަތުގައި އެމްއެންޑީއެފް އާއި މޯލްޑިވްސް ޕޮލިސް ސާވިސް އާ ގުޅިގެން ހާއްސަ އޮޕަރޭޝަންތައް ހިންގަމުންދާ ކަމަށްވެސް ކަސްޓަމުން ބުންޏެވެ
"މި ކަންކަން ހަރުދަނާ ކުރުމަށްޓަކައި މި މުއައްސަސާތަކުގެ މެދުގައި މަޝްވަރާކޮށް، މުވައްޒަފުންގެ ގާބިލުކަން އިތުރު ކުރުމަށް ރާއްޖެ އާއި ރާއްޖެއިން ބޭރުގައި ހާއްސަ ތަމްރީނުތައް ދެވެމުންދާކަން ވެސް ފާހަގަކުރަމެވެ. އަދި ރީޖަނަލް ގައުމުތަކުގެ މެދުގައި މައުލޫމާތު ހިއްސާކުރުމާއި ސަވައިލަންސް އާއި މޮނިޓަރިން އިތުރަށް ހަރުދަނާ ކުރުމުގެ މަސައްކަތް ރާއްޖެ އާއި ރާއްޖެއިން ބޭރުގެ ކަމާބެހޭ ފަރާތްތަކާ ގުޅިގެން ކުރުމަށް މަސައްކަތް ކުރަމުންދާކަން ވެސް ފާހަގަކުރަމެވެ،" ކަސްޓަމްސްގެ ބަޔާނުގައިވެ އެވެ.
ކަސްޓަމްސްގެ ބަޔާނުގައި ވަނީ ރާއްޖެއަށް މަސްތުވާތަކެތި އެތެރެވުން ހުއްޓުވުމުގައި ސަރުކާރުގެ ސިޔާސަތުތަކާއި އެއްގޮތަށް އެ އިދާރާއިން ތަންފީޒުކުރަން ޖެހޭ ގާނޫނުތަކާއި ގަވާއިދުތައް ތަންފީޒުކުރުމުގައި ސާބިތުކަމާ އެކު ދެމިތިބޭނެކަމުގެ ޔަގީންކަން ރައްޔިތުންނަށް ދީފަ އެވެ.
