އެމްޑީޕީގެ އިސްވެރިން ހިފާ ހައްޔަރުކުރަން ޕީއެންސީ މެމްބަރަކު ގޮވާލައިފި
ކުރީގެ ރައީސް އިބްރާހިމް މުހައްމަދު ސޯލިހުއާ، އެމްޑީޕީގެ ރައީސް އަބްދުﷲ ޝާހިދު އަދި އެ ޕާޓީގެ ޗެއާޕާސަން ފައްޔާޒް އިސްމާއިލް ހައްޔަރުކުރަން ރައްޔިތުންގެ މަޖިލީހުގެ މަޑަވެލީ ދާއިރާގެ ޕީއެންސީ މެމްބަރު މުހައްމަދު ޝަމީޒް ގޮވާލަައްވައިފި އެވެ.
މަޖިލީހުގެ ތަޅުމުގައި މިއަދު ކުރިއަށްދިޔަ ބަޖެޓް ބަހުސްގައި ވާހަކަ ދައްކަވަމުން ޝަމީޒު ވަނީ ނިމިދިޔަ ސޯލިހުގެ ސަރުކާރުން ރާއްޖޭގެ ފަޅުރަށްތަކާއި، ގިރިތަކާއި، ޗާގޯސް ވިއްކާލިކަމުގެ ތުހުމަތު ކުރައްވާފަ އެވެ.
ޝަމީޒު ތުހަމަތު ކުރެެއްވި ގޮތުގައި ކުރީގެ ސަރުކާރުން ކަނޑުފަޅާއި، ފަޅުރަށްތަކާއި، ގިރިތައް އެ ސަރުކާރުގެ ގާތް މީހުންނަށް ދީފައިވާ ކަމަށެވެ. އެއަށް ފަހު ވިދާޅުވި ގާތްގަނޑަކަށް 50،000 އެއްހާ މެންބަރުން ތިބޭ އެމްޑީޕީގެ ފިކުރަކީ ނުރައްކާތެރި ފިކުރެއް ކަމަށެވެ.
އެހެންވެ އޭނާ ގޮވާލީ އެމްޑީޕީ ސަރުކާރުގެ އިސްވެރިން ހައްޔަރުކުރުމަށެވެ.
"މިއީ ދިވެހި ރައްޔިތުން ކުރިމަތީގައި ރޯމާ ދުވާލު ކުރި ވައްކަމެއް. މިކަން ކުރި މީހުން ހިފާ، ހައްޔަރު ކުރަން އަޅުގަނޑު ގޮވާލަން. އަބްދުﷲ ޝާހިދު ހައްޔަރު ކުރަންވީ. އިބްރާހިމް މުހައްމަދު ސޯލިހް ހައްޔަރު ކުރަންވީ. ފައްޔާޒް ހައްޔަރު ކުރަންވީ. ފިނޭންސް މިނިސްޓަރަކަށް ހުރި އަމީން ހައްޔަރު ކުރަންވީ،" ޗާގޯސް ވިއްކާލި ކަމަށް ތުހުމަތު ކުރައްވާ ޝަމީޒް ވިދާޅުވި އެވެ.
ޝަމީޒު ވަނީ އެ ބޭފުޅުންގެ މައްޗަށް ގާނޫނު ތަންފީޒު ނުކުރެވެންވީ ކީއްވެތޯ ސުވާލު އުފައްދަވާފަ އެވެ. އޭނާ ވިދާޅުވީ، ހިޔާނާތްތެރިވާ މީހުންގެ މައްޗަށް ގާނޫނު ތަންފީޒު ކުރަން ޖެހޭ ކަމަށެވެ.
ކޮންމެ ސަރުކާރަކުންވެސް ދައުލަތަށް ހިޔާނާތްތެރިވުމުން ރައްޔިތުންނަށް މެމްބަރުންގެ ފަރާތުން ދޭނެ ޖަވާބެއް ނޯންނަ ކަމަށް ވިދާޅުވި އެވެ.
އެމްޑީޕީ ވެރިން ހައްޔަރުކުރަން ޝަމީޒު ގޮވާލައްވާފައިވާއިރު، ސިޔާސީ ވާދަވެރިއަކަށް ވާތީ ޖަލަށްލުމުގެ ޒަމާން ނިމުމަކަށް ގެނެސްފައިވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެފައިވެ އެވެ.
ޖުމްހޫރީ ދުވަހުގެ މުނާސަބަތުގައި ބޭއްވި ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ، ކުރިން ސަރުކާރުތަކުން ސިޔާސީގޮތުން ގެންގުޅެމުން އައި ބަދަލު ހިފުމުގެ ރޫހު މިހާރު ނުފެންނާނެ ކަމަށެވެ. އަދި ސިޔާސީ ވާދަވެރިއަކަށްވާތީ އެމަނިކުފާނުފެ ވާދަވެރިޔާ ގެންގޮސް ޖަލަށްލާތަން ވެރިކަމުގެ އެއް އަހަރުގެ ތެރޭގައި ވެސް ފެނިފައިނުވާނެ ކަމަށާއި، ކުރިއަށް އޮތްތަނުގައި ވެސް ނުފެންނާނެ ކަމަށް ވިދާޅުވިއެވެ.
