ރައީސް އއ. އަތޮޅާއި ކ. އަތޮޅަށް
އަރިއަތޮޅު އުތުރުބުރި އާއި މާލެ އަތޮޅުގެ ބައެއް ރަށްތަކަށް ކުރައްވާ ދަތުރުފުޅެއްގައި ރައީސް ޑރ. މުހައްމަދު މުއިއްޒު މިއަދު ހެނދުނު ފުރާވަޑައިގެންފި އެވެ.
ރައީސް އޮފީހުން ބުނީ ރައީސްގެ މި ދަތުރުފުޅުގައި އެ ދެ އަތޮޅުގެ ބައެއް ރަށްތަކަށް ވަޑައިގެން ވަގުތު ލިބިވަޑައިގަންނަވާ މިންވަރަކުން ދެ އަތޮޅުގެ ގިނަ ރަށްތަކުގެ ކައުންސިލްތަކާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކާ ބައްދަލުކުރައްވާނެ ކަމަށެވެ.
އޭގެއިތުރުން އެ ދެ އަތޮޅުގެ އަތޮޅު ކައުންސިލާ ވެސް ރައީސް ބައްދަލުކުރެއްވުމަށް ހަމަޖެހިފައިވާ ކަމަށް ރައީސް އޮފީހުން ބުންޏެވެ.
މި ދަތުރުފުޅުގައި ބައެއް މިނިސްޓަރުންނާއި ކުންފުނިތަކުގެ ބައެެއް އިސްވެރިންގެ އިތުރުން ރައްޔިތުންގެ މަޖިލީހުގެ ބައެއް މެންބަރުން ވެސް ބައިވެރިވެވަޑައިގަންނަވަ އެވެ.
ރާއްޖޭގެ ހުރިހާ އަތޮޅަކަށް ޒިޔާރަތް ކުރެއްވުމަށާއި އަތޮޅުތަކާއި ރަށްތަކާއި ސިޓީތަކުގެ ލޯކަލް ކައުންސިލްތަކާ އަދި އަންހެނުން ތަރައްގީއަށް މަސައްކަތްކުރާ ކޮމިޓީތަކާ ބައްދަލުކުރެއްވުމަށް ރައީސް މިއަހަރު ފަށްޓަވައިގެން ކުރިޔަށް ގެންދަވާ ސިލްސިލާ ދަތުރުފުޅުތަކުގައި ރައްޔިތުންގެ ހާލުއަހުވާލު ބައްލަވައި ތަރައްގީގެ މަޝްރޫއުތައް ތަރުތީބު ކުރާނޭގޮތާމެދު މަޝްވަރާކުރައްވާނެ އެވެ.
ރައީސްގެ ދަތުރުފުޅުގައި އެންމެ ފުރަތަމަ ވަޑައިގެންނެވީ އއ. ތޮއްޑޫއަށެވެ. މިހާރު އެމަނިކުފާނު ހުންނެވީ އެ ރަށުގަ އެވެ. އެނގިފައިވާ ގޮތުގައި ތޮއްޑޫއަށް ފަހު ރައީސް ވަޑައިގަންނަވާނީ ރަސްދޫ އަދި މަތިވެރިއަށެވެ. ކ. ގާފަރު، ހުރާ އަދި ހިންމަފުއްޓަށް ވަޑައިގަތުމަށް ހަމަޖެހިފައިވަނީ މާދަމާ އެވެ.
ދަތުރުފުޅުތަކާ ގުޅޭގޮތުން މީގެކުރިން ރައީސް ވިދާޅުވީ މި ދައުރުގެ ތެރޭގައި ރާއްޖޭގެ ކޮންމެ ރަށަކަށް ވެސް މަދުވެގެން ދެ ފަހަރު ޒިޔާރަތްކުރެއްވުމަކީ އެމަނިކުފާނުގެ އަމާޒެއް ކަމަށެވެ.
ވެރިކަމުގެ ފުރަތަމަ އަހަރު ދުވަހުގެ ތެރޭގައި ގިނަ ރަށްތަކަކަށް ވަޑައިގެން, ކައުންސިލްތަކާއި ކޮމިޓީތަކާ ބައްދަލުކުރައްވާފައިވެ އެވެ.
Ads by STO
