5 އަހަރުގެ ކުޑަކުއްޖަކަށް ޖިންސީ ގޯނާކުރިކަމުގެ މައްސަލައެއްގައި މީހަކު ހައްޔަރު ކޮށްފި
ދެކުނުގެ ރަށެއްގައި އުމުރުން 5 އަހަރުގެ ކުޑަ އަންހެން ކުއްޖަކަށް ޖިންސީ ގޯނާކުރިކަމުގެ މައްސަލައެއްގައި މީހަކު ހައްޔަރު ކޮށްފިއެވެ.
ފުލުހުންގެ މީޑިއާ އޮފިޝަލަކު ވިދާޅުވީ ސައުތު ޕޮލިސް ޑިވިޝަން (އައްޑޫސިޓީ އާއި ފުވައްމުލައް ސިޓީ ސަރަޙައްދު) ގެ ރަށެއްގައި އުމުރުން ފަސް އަހަރުގެ ކުޑަ ކުއްޖަކަށް ޖިންސީ ގޯނާ ކުރިކަމަށް ތުހުމަތު ކުރެވޭ މައްސަލައެއް ސިއްޙީ ފަރުވާދޭ މަރުކަޒަކުން 13 ސެޕްޓެމްބަރ ވަނަ ދުވަހު ފުލުހުންނަށް ހުށަހަޅާފައިވާ ކަމަށެވެ.
މިމައްސަލައިގައި ކޯޓު އަމުރެއްގެ ދަށުން އުމުރުން 36 އަހަރުގެ ދިވެހި ފިރިހެނަކު ހައްޔަރު ކޮށްފައިވާ ކަމަށް ވެސް ފުލުހުން މައުލޫމާތު ދީފައިވެއެވެ.
މިމައްސަލަ ފުލުހުން އަންނަނީ އިތުރަށް ތަހުގީގު ކުރަމުންނެވެ.
ކުޑަކުދިންނަށް ކުރަމުން އަންނަ ޖިންސީ ގޯނާގެ މައްސަލަތަކަކީ ރާއްޖޭގައި އިތުރުވަމުން އަންނަ މައްސަލައެކެވެ.
ގިނަ ފަހަރަށް މިފަދަ މައްސަލަތަކާއި އެކުދިންނަށް ކުރިމަތިވަނީ އާއިލާ މީހެއް ފަރާތުން ނުވަތަ އެފަދަ ކޮންމެވެސް ގާތް މީހެއްގެ ފަރާތުންނެވެ. ބައެއް ފަހަރަށް އާއިލާ މީހުން މިފަދަ ކަންކަން ސިއްރު ކޮށްގެން ވެސް އުޅެއެވެ.
