ދިރިއުޅުން ހަނިވެ،ކަނިވި އަލިފުތާ، ދުނިޔޭން ވަކިވުމުގެ ކުރިން ކުލުނުގެ ރަހަ އަލުން އިޙްސާސް ކޮށްލުމުގެ އުއްމީދުގައި!

ގއ.މާމެންދޫ ދެތަނޑިމާގޭ އަލިފުތާއަކީ މީގެ ތިން އަހަރެއްހާ ދުވަސް ކުރީން ވެސް އާދައިގެ، އާންމު ދިރިއުޅުމެއް އުޅެމުން ދިޔަ މީހެކެވެ. ދަނޑުވެރިކަމުގެ މަސައްކަތުން ލިބޭ އާމްދަނީން އަނބިމީހާއާއެކީ އޭނާ ހޭދަ ކުރަމުން ދިޔައީ އުފާވެރި ދިރިއުޅުމެކެވެ. ނަމަވެސް އުފާވެރި އެ ދިރިއުޅުމުގެ އަލިކަން ފަނޑުވެގެން ދިޔައީ އަނބިމީހާ ދުނިޔެ ދޫކުރުމުންނެވެ. އުފަންދަރިއެއް ނެތުމާއެކު އަލިފުތާ އެކަނިވެރިވިއެވެ. ދިރިއުޅުމުގެ ހުޅުކޮޅު ފަނޑުވިއެވެ.

Ads by STELCO

އަލިފުތާގެ އާއިލާގައި އޭނާގެ އިތުރުން އެއްބަނޑު އެއްބަފާ ތިން މީހުން ތިބެއެވެ. ނަމަވެސް އަނބިމީހާ ނިޔާވުމަށްފަހު މުސްކުޅި އަލިފުތާ ހުރީ ވާންވީ ގޮތެއް ނޭނގިފައެވެ. "ވާރުތައިގެ" މަގުގައި އޭނާ ހުރީ ބެހިފައެވެ. އެ މަގުން އަލިފުތާއާ ބައްދަލު ކުރާނޭ މީހަކު ނުވުމާއެކު އޭނާގެ ޙަޔާތް ބަނަކޮށްލިއެވެ. އަނބިމީހާ ނިޔާވުމުން ޒަހަމް ވެފައިވާ އަލިފުތާގެ ހިތް ކަތިލިއެވެ.

މި ޙާލަތުގައި ވީނަމަވެސް ، ގައިން ބާރުދެރަވެ އަޅާލާނޭ އިޔާރެއް ނެތް ދުވަހު ހަޔާތަށް ގެނުވި މި ބަނަކަމާ އަދި ކުރިއަށް އޮތް ދުވަސްތަކާމެދު ވިސްނޭ ވަރަށް ވުރެ އަލިފުުތާގެ އެކަނިވެރިކަން ބޮޑެވެ. އެކަމުގެ ތަޖުރިބާ ގިނަވެފައި ހިއްޗެވެ.

ފައިދުޅަ ބައްޔާއެކު މުސްކުޅި އުމުރުގައި އެކަނިވެރި ދުވަސްތައް ހޭދަ ކުރަމުން ދިޔަ އަލިފުތާއަށް އެހިނދު އެހީތެރިވީ އަލިފުތާގެ ދޮންދަރިއެކެވެ. އަލިފުތާގެ މަރުޙޫމް އަނބިމީހާގެ ދަރިއެކެވެ.

އަނބިމީހާއާއެކު ހޭދަ ކުރި މާޒީގެ ހަނދާންތައް ވަށާލެވިފައިވާ ދެތަނޑިމާގެއާއި އެގޭގެ ގޯތީގެ ދޮރު އަބަދަށް ލައްޕާލުމަށްފަހު އެކަނިވެރި އަލިފުތާއަށް މަޖުބޫރުވީ އިހްސާންތެރިކަމުގެ އަތެއް ދިއްކޮށްލި ދޮންދަރިއާއެކު ދިރިއުޅުން ހޭދަ ކުރާށެވެ.

ނަމަވެސް ދޮން ބައްޕައަށް ޓަކައި މަޑުވި އިހްސާންތެރި ހިތުގައި ތިން އަހަރެއްހާ ދުވަހަށް ފަހު ހިނދުކޮޅަކަށް ނަމަވެސް އެހެން ވިންދެއް ޖަހައިފިއެވެ. އެ ވިންދުގެ ބާރުގައި އަލިފުތާ މަގު މައްޗަށް ނެރެ އެއްލާލީ ބެލެން ނެތް ކަމަށް ބުނެއެވެ. އެހިނދު ދިރިއުޅުން ހަނިވަމުން އަދި ކަނިވަމުން ދިޔަ 80 އަހަރުގެ އަލިފުތާގެ ހިތް މިޔަ އަޅާ ފޮތިފޮތި ކޮށްލިއެވެ. އަލިފުތާގެ މެޔަށް ތަދުވާތީ ފުލުހުންގެ އެހީތެރިކަމާއެކު އޭނާ ހޮސްޕިޓަލަށް ގެންދިޔައެވެ.

ހޮސްޕިޓަލުން ދޫކޮށްލުމުން އަލިފުތާ މިހާރު އެއޮތީ ކައުންސިލްގެ ބެލުމުގެ ދަށުގައެވެ. ބާރު ދެރަވެ ، ނިކަމެތިވެފައިވާ މީހެއް ބަލައިދޭނެހާ ކުޑަކުޑަ މިންވަރެއްގެ ރަޙުމެއް އޮތް ހިތެއް އޭނާގެ ކުރި މައްޗަށް ހުއްޓިދާނެ ވަގުތެއްގެ އިންތިޒާރުގައެވެ. ނުވަތަ އަލިފުތާގެ ހުރިހާ ހަނދާނެއް އޮތް ، އޭނާއަށް "ބޭވަފާތެރިވީ" އަމިއްލަ ވަޒަން ދޫކޮށް އެހެން ތަނަކަށް . ދައުލަތުން އޭނާ ގެންދާނެ ދުވަހެއްގެ އިންތިޒާރުގައެވެ. ދުނިޔޭން ވަކިވެގެން ދިޔުމުގެ ކުރިން މަދު ދުވަސް ކޮޅަކަށް ނަމަވެސް ކުލުނާއި ރަހުމްގެ ރަޙަ ތަޖުރިބާ އަލުން ކޮށްލުމުގެ އުއްމީދުގައެވެ.

ފަނޑުވެ، ކަނިވި އަލިފުތާގެ ދިރިއުޅުން މިއަދު މިވަނީ ހަމަހިމޭން ވެފައެވެ. އެ ދިރިއުޅުމުގައި އެކަނިވެރިކަމާއި ހިތްދަތިކަން ނޫން އިހްސާސެއް ނެތެވެ. ހިތާމައިގެ ކުލަ ނޫން ކުލައެއް ނެތެވެ.