އަދީބުގެ މައްސަލައިގެ ހުކުމް އިއްވުން މާދަމާ
ކުރީގެ ނައިބު ރައީސް އަހުމަދު އަދީބުގެ އިސްތިއުނާފު ކޮށްފައިވާ މައްސަލައިގެ ހުކުމް އިއްވުން މާދަމާ ހައިކޯޓުގައި ބޭއްވުމަށް ތާވަލު ކޮށްފިއެވެ.
އަދީބުގެ މައްސަލައެއް ކްރިމިނަލް ކޯޓުން ބޭރުކޮށްލުމުން ދައުލަތުން ވަނީ އެމައްސަލަ ހައި ކޯޓުގައި އިސްތިއުނާފު ކޮށްފައެވެ. މާދަމާ އޮތީ އެއިސްތިއުނާފު މައްސަލައިގެ ހުކުމް އިއްވުމެވެ.
އެގޮތުން ހައިކޯޓުން ބުނެފައިވަނީ މާދަމާ 14:00 އެމައްސަލައިގެ އަޑުއެހުމެއް އޮންނާނެ ކަމަށެވެ.
މިމައްސަލައިގެ އަޑުއެހުމެއް އެންމެ ފަހުން ބާއްވާފައިވަނީ މިމަހުގެ 15 ވަނަ ދުވަހުގައެވެ. މިމައްސަލައިގެ އިތުރު ކަމެއް ސާފުކުރަން ނެތް ނަމަ ދެން އޮންނާނީ މައްސަލައިގެ ހުކުމް އިއްވުން ކަމަށް މިމައްސަލަ ބައްލަވާ ފަނޑިޔާރު އެދުވަހު ވަނީ ވިދާޅުވެފައެވެ.
ކުރީގެ ނައިބު ރައީސް އަދީބުގެ މައްޗަށް ދައުލަތުން އުފުލި ހަތް ދައުވާ ވެސް ކްރިމިނަލް ކޯޓުން ބޭރުކޮށްލުމުން އޭނާ ހުރީ މިނިވަން ވެފައެވެ. ދައުވާތައް ބާތިލް ކުރުމުގައި ބޮޑަށް ބިނާކޮށްފައި އޮތީ ތަހުޤީގު މަރުހަލާގައި ޕްރޮސެކިއުޓަރ ޖެނަރަލް އަދީބު އާއެކު ވެފައިވާ އެއްބަސްވުންތަކުގެ މައްޗަށެވެ.
މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) ގެ ޚިޔާނާތާ ގުޅިގެން، އަދީބުގެ މައްޗަށް އުފުލާފައި ވަނީ، ހިޔާނާތްތެރިވުމުގައި ބައިވެރިވުމުގެ ދެ ދައުވާއަކާއި، މަގާމުގެ ނުފޫޒު ބޭނުންކޮށްގެން ނާޖާއިޒު ފައިދާއެއް ހޯދައިދިނުމުގެ ދެ ދައުވާއަކާއި، މަނީ ލޯންޑަރިންގެ ދެ ދައުވާއަކާއި ރަސްމީ ހައިސިއްޔަތު ނަހަމަގޮތުގައި ބޭނުންކުރުމުގެ ދައުވާއެކެވެ.
Ads by STO
