ކުރުވާހަކަ: ހިތި ހަނދާން
ޒޭން އެނދުގައި އޮވެ ދެފަރާތަށް ފުރޮޅި ފުރޮޅި ވަރުބަލިވެއްޖެއެވެ. ލޮލަށް ނިންޖެއްނައެވެ. ނިދިވަނީ އޭނާގެ ލޮލާ މާ ދުރަށް ގޮސްފައެވެ. ވިސްނާ ވިސްނާ ސިކުނޑި ސުމަކަށް ދާވަރުވެއްޖެއެވެ. މިހާރު ގަނޑީގެ ކަށި އެހުރީ ފަތިހު ފަހަކާ ދިމާއަށެވެ. ރޭނިމި ފަތިސްވަނީ އެވެ. ނަމަވެސް ޒޭންގެ ލޯ އެންމެ ސިކުންތުކޮޅަކަށް ވެސް ނުމެރުނެވެ. އެ ހިތުގައި ވަނީ ނޭނގޭ ރިހުމެއް އުފެދިފައެވެ. އޭނާގެ ސިކުނޑި ވަނީ މާޒީގެ ހިތި ހަދާން ތަކުން ފުނިޖެހި ބާރުވެފައެވެ. އެތައް ކަމެއް ނުކުރެވުނު ނަމަ އޭ ހިތައް އަރަމުން ދިޔައެވެ. މާޒީގެ ފުންކަނޑުގައި ޒޭން ގެނބެމުން ދިޔައިރު ދެލޯ ދިޔައީ ލޭ ކަރުނުން ފުރެމުންނެވެ.ނުވިސްނަށް އުޅުނަސް އެ ހިޔާލުތައް ވަނީ ޒޭންގެ ސިކުޑީގައި ވަކި ހިއްޕާލާފައެވެ. ކަޅާއި ހުދުން މާޒީގެ ސަފުހާތައް ޒޭން ގެ ކަރުނުން ފުރިފާވާ ލޮލު ކުރިމަތީން ފެންނަމުން ދިޔައެވެ. އެއީ މީގެ 10 ވަރަކަށް އަހަރު ކުރިއެވެ. ޒޭންގެ ހަށިގަނޑުގައި ޒުވާން ކަމުގެ ލޭ ކެކި އުތުރެން ފެށި ދުވަސްވަރެވެ.
14 އަހަރުގެ ޒޭންއަކީ މަންމައާއި ބައްޕަގެ ބަސްއަހާ ކިޔަމަންތެރި ދަރިއެކެވެ. ކިޔެވުމުގައި ރަންވަނަތަކެއް ހޯދަމުން އާއި ހުނަރުވެރި ކުއްޖެކެވެ. ޓީޗަރުންގެ ރުހުމާއި ލޯބި ލިބިފައިވާ ދަރިވަރެކެވެ. ނަމަވެސް އޭނާގެ މަޑުމައިތިރި ކަމުގެ ސަބަބުން ކުލާސްތެރޭގައި އޭނާއާ ފޮށުމާއި ދިމާކުރުމަކީ އާންމުކަމެކެވެ. އެ ކުޑަ ކުޑަ ހިތަށް ވަރަށް އަސަރު ކުރެއެވެ. މުދައްރިސުންގާތު ޝަކުވާ ވެސް ކުރެވެ.މަންމަ ގާތު ސުކޫލަށް ދާން ބޭނުން ނުވާ ކަމަށް ބުނެ އެތައް ދުވަހަކު ރޮވެއެވެ. ނަމަވެސް އެއްވެސް ހައްލެއް ނައެވެ. "ތީ ރަނޑެއް... އަންހެން ކުއްޖެއް... ކަމެއް ނުކުރެވޭ ފިނޑިއެއް...." . މިފަދަ އެތައް ބަހެއް އެ ސިކުނޑީގަޔާއި ހިތުގައި ބިންވަޅުނެގެމުންދިޔައެވެ. ބަދަލުހިފުމާއި ކެރޭކަން އަންގާލުމުގެ ޖޯޝެއް އެހިތުގައި އުފެދުނެވެ. އެ ޖޯޝު އޭނާގެ މުޅި ދިރިއުޅުން އަދިރިކޮށްލަފާނޭ އެންމެ ފަހަރަކުވެސް ހިތައް ނޭރިއެވެ. އެޖޯޝާ ފޯރީގައި ފުރަތަމަވެސް އޭނާ ޒަހަމް ކޮށްލީ އޭނާއާއި އެންމެ ދިމާކުރާ ކުއްޖާއެވެ. ކުލާސް ނިންމާފައި ފަތިގަނޑަކުން ތަޅާ ޒަހަމްކޮށްލިއެވެ. އަނބުރާ އެކުއްޖާއަށް ޒޭން އާ ދިމާލަށް އެޗެއް ބުނަން ކީކުރަން ބަލާލާން ވެސް ނުކެރޭވަރު ކޮށްލިއެވެ. އެންމެންގެ ތެރޭ ޒޭން މަޝްހޫރުވެ މަޤުބޫލުވިއެވެ. ސުކޫލުގެ ދާދާ ގޭންގަން ވަދެވުނެވެ. ދިމާކުރި ކުލާސްކުދިން އޭނާ ފެނި ބިރުން އިސްޖަހަން ފެށިއެވެ. މައިންބަފައިން އޭނާ ހުއްޓުވުމަށް ގޭގައި އައްސައެވެ. ރަށްޓެހިންނާއެކު ބޭރުގައި ހުއްޓާ ގެއަށް ގެނެސް އިލޮށިފަތިން އެތައް އަނިޔާއެއް ދެޔެއެވެ. ގައިގެ އެކިތަންތާ ލަކުނު ލާންފެށިއެވެ. އެތައް އިރެއްވަންދެން މަދިރިތަކުތެރޭ އައްސާފައި ބައިންދައެވެ. ޒޭން ހުއްޓުވަން އެޅުނު މި ފިޔަވަލުތައްވީ ޒޭންގެ ލަދާއި ބިރު މުޅިންކަނޑުވާލާ އެ މަގުން އިތުރަށް ހިނގުމަށް ލިބުން ހިތްވަރަކަށެވެ.
ދުވަސްތައް މާޒީއާ އެކުވަމުންގޮސް އެންމެ 15 އަހަރުގައި ޒޭން މާލޭގެ މަޝްހޫރު ގޭންގަކާ ގުޅުނެވެ. އޭނާގެ މަޤުސަދަކަށް ބަދަލެއްނާދެއެވެ. މީހުން ކިބައިން ބަދަލުހިފުމާ ފިރިހެނެއްކަން އެންގުމެވެ. އޭނާ އަކީ ކެރޭ ކަންކަން ކުރެވޭ ފިރިހެންވަންތަ މީހެއްކަން ދުނިޔެއަށް ސާބިތު ކޮށްދިނުމެވެ. ޒޭން އަށް ވިސްނުނީ މީހުން ބިރުގަންނަ ފަދަ ނުބައި ބާރުގަދަ މީހަކަށް ވުމަކީ ފިރިހެންވަންތަކަންކަމުގައެވެ. ސިގިރޭނޑު ބުއިމާއި ގެއަށް ނުވަދެ ރޭދުވާ ތަންތަނަން ގިނަވެ، މީހުނަން ޖެއްސުން ކުރުން އެއީ ކެރުމާއި ކުޅަދާނަކަން ކަމުގައެވެ. ޒޭން ކިޔެވުމާއި ދުރުވެ މަންމަ އާއި ބައްޕަގެ ވާހަކަތަކަށް ބީރުކަންފަތެއް ދޭންފެށިއެވެ. މީހާ އެއްކޮށް ބަދަލުވިއެވެ. އަތްފައި ފުރާ ގަހަނާ އަޅާ ކަންފަތް ތޮރުފައި ބޯ ދިގު ކުރިއެވެ. ގޭންގު މާރާމާރީ ތަކުގައި ބައިވެރިވެ އެކަމުގެ ތެރެއަށް ވަދެ މީހާ ހަލާކުވިއެވެ. މި އަހަރަކީ ޒޭން ޖީސީއީ ހަދާ އަހަރެކެވެ. ނަމަވެސް އޭނާގެ އުޅުމަށް އެއްވެސް ބަދަލެއް ނައެވެ. ދުވަހެއް ދުވަހަކަށް ދިޔައީ ގޯސްވަމުންނެވެ. ގެއަށް ނުގޮސް ހަފުތާ ދެ ހަފުތާވެސް ވެއެވެ. ސުކޫލުގައި މާރާމާރީ ހިންގުމާއި ބިރުދެއްކުމުގައި ބޮޑަކަށްވިއެވެ. އެތަކެއް މައްސަލަތަކެއްގައި އޭނާ ސަސްޕެންޑުކުރެވުނެވެ. އެތައް އަދަބެއްދެއެވެ. ނަމަވެސް އެއިން އެއްވެސް ކަމެއްގެ އަސަރެއް ޒޭންއަށް ނުކުރެއެވެ. މިހާރު އޭނާ ބިރުގަންނަ އެއްވެސް ކަމެއް ނޯވެއެވެ.
"އާހް... މަންމާ... ތިހެންނުހަދާ ... އަހަރެން އެކަހަލަ ކަމެއް ނުކުރަމޭ......" ޒޭން ރޮމުން ހަޅޭލަވަމުން ދިޔައެވެ. ނަމަވެސް ކައިރީގައި ލަޓިބުރި ހިފައިންހުރި ފުލުސް މީހާގެ ހިތަށް އެއްވެސް އަސަރެއް ނުކުރިއެވެ. އާއެކެވެ. ގޭންގު މާރާމާރީއެއްގައި އެންމެ ފަހުން ފުލުހުން ޒޭން ހައްޔަރު ކުރީއެވެ. ނަމަވެސް ޒޭން އަށް 18 އަހަރު ނުވާތީ 15 ދުވަހު ޖަލުގައި ބާއްވާފައި ދޫކޮށްލީއެވެ. ދެންވެސް އިސްލާހުވާން އެ ހިތަށް ނޭރިއެވެ. އޭނާ ލޯބިވާ މައިންބަފައިންގެ ހިތަށް ކުރާނެ އަސަރު ތަސައްވަރެއް ނުކުރެވުނެވެ. ހަޔާތުން ވޭތުވާ ކޮންމެ ދުވަހަކާ އެކީ ޒޭން ދިޔައީ އިތުރަށް މަގު އޮޅި އިތުރު ކުށްތަކަށް އަރައިގަންނަމުންނެވެ. އެންމެފަހުން ދީނުގައި އެކަމެއް ހަރާމު ކޮށް ފައިވާ މަސްތުވާތަކެތި ވިއްކުމާއި ބޭނުންކުރުމުގައި ވެސް އޭނާ ޝާމިލްވިއެވެ. ޖީސީއީނުހެދި ސުކޫލުންވެސް އޭނާ ވަކިކުރީ އެވެ. އެވެސް އޭނާ އަށްވީ ލިބުނު އިތުރު މިނިވަން ކަމަކަށެވެ. އިތުރު ފުރުސަތަކަށެވެ. އޭގެ ފަހުން އެތައްފަހަރަކު ފުލުހުން އޭނާ ހައްޔަރު ކުރިއެވެ. ނަމަވެސް 18 އަހަރު ނުވުމާއި މައްސަލަ ސާބިތު ނުވާތީ ކޮންމެ ފަހަރަކު ވެސް އޭނާ ސަލާމަތް ވަނީއެވެ.
މާލޭގައި ބޭނުންވާ ގޮތަށް ނޫޅެވި ފުލުހުންގެ ލޮލުކުރި މަތިން ގެއްލުމުގެ ބޭނުމުގައި ޒޭން ރިސޯޓަށް ވަޒީފާ އަށް ދިޔައެވެ. އެތަނުން އިތުރު ދޮރުތަކެއް އޭނާ އަށް ހުޅުވުނެވެ. ދުވާލު ހަތަރުދަމު މަސްތުގެ ހާލުގައި ފާހިޝް އެތައް އަމަލެއް ހިންގަމުން ދިޔައެވެ. ރޯދަމަސް ނިމުނީ ދުވާލު ކެއުމާއި ސިގިރޭޓް ބުއިމުގައެވެ. އެ ހިތުގައި ކުޑަވެސް ބިރުވެރިކަމެއް ނެތެވެ. ކުޑަވެސް ލަދުވެތިކަމެއް ނެތެވެ. އޭނާ އަށް ހުރިހާ އެއްޗަކަށްވީ ރުފިޔާ އާއި ބާރެވެ. ބޭނުންވާކަމެއް ނުވެއްޖެނަމަ އެއަންނަ ރުޅި އޭނާގެ މައްޗަށް ގަދަވެއެވެ. ސިކުޑި ހަމަ ޖައްސާލާ ބޭހަކަށްވީ މަސްތުވާ ތަކެއްޗާއި ފާހިޝް އަމަލުތަކެވެ. މި ނޫން ދުވަހެއް އަދި އޮތްކަމެއް ނޭނގޭ ފަދައެވެ. ހިތުގައި އުފެދުނު އެންމެ ޖޯޝަކުން ވީރާނާ މި ކޮށްލެވެނީ ތިމާގެ މުސްތަޤުބަލޭ އެންމެ ފަހަރަކުވެސް އެހިތަށް ނޭރިއެވެ.
ރިސޯޓުގައި އުޅޭތާ 2 މަސް ހަމަ ނުވަނީސް އަނެއްކާވެސް ފުލުހުން ޒޭން ހައްޔަރުކުރިއެވެ. ރިސޯޓުގެ ކައްކާއެއް ގަޔަށް ވަޅިޖަހާ ޒަހަމު ކޮށްލި ކަމުގެ ތުހުމަތު ގައެވެ. އެ ފަހަރުވެސް 15ދުވަސް ވަންދެން ޒޭން ޖަލުގައި ބަންދުކުރިއެވެ. ނަމަވެސް މިފަހަރު އޭނާގެ އިސްލާހުވުމަށް ބޭނުންވިއެވެ. ޖަލުން ދިމާވި މެދު އުމުރަށް ވުރެ ދޮށީ މީހެއް އޭނާ އަށް ވިސްނައިދިނެވެ. އެތައް ނަސޭހަތަކާއި ޢިބުރަތުން ފުރިގެންވާ ވާހަކަތައް ކިޔައިދިނެވެ. އެމީހާއަށް ދިރިއުޅުމުގައި ހެދުނު ގޯސް ޒޭން ނުހެދުމަށް އެދުނެވެ. ދިރިއުޅުމުގެ މާތް މަޤުސަދު ޒޭން އަށް ވިސްނުނީ އެމީހާ ގާތުންނެވެ. ފިރިހެން ވަންތަކަމާއި ކެރުމަކީ ބިރުދެއްކުމާއި މާރާމާރީ ނޫން ކަން އެހިތަށް ވިސްނުނެވެ. އެހެން މީހުންނަން އިޙްތިރާމް ކުރުމާއި ޤަވާއިދު ތަކަށް ބޯލަނބަށް ދަސްކޮށްދިނެވެ. އިސްލާހުވުމުގެ ގަދަ އަޒުމެއް އޭނާ ކަނޑައެޅިއެވެ. އޭނާ އަށް މާޒީވި ދުވަސްތަކާއި އަތުން ބީވި އެތައް ކަމެއް އަބުރާ ނުގެނެވުނަސް ރަނގަޅު ހަރުދަނާ މީހަކަށްވާން އަޒުމް ކަނޑައެޅިއެވެ.
ޖަލުން ނިކުމެ އާ މަންޒިލެއްހޯދަން ޒޭން ފެށިއެވެ.. ހަލާލު ގޮތުގައި ރުފިޔާ ހޯދަށް މަސައްކަތް ފެށިއެވެ. މުސްކުޅިން ބުނެއުޅޭތީ އަޑު އަހަމެވެ. ރަގަނޅު މަގުގައި ހިގުމަކީ ވަރަށް އުދަނގޫ ކަމެކެވެ. އެއީ ވަރަށް ބޮޑު ތެދެއްކަން އެދުވަހު ޒޭން އަށް ވިސްނުނެވެ. ޖީސީއީ އޯލެވެލް ހެދިފައި ނުވާތީ ވަޒީފާއެއް ހޯދުން ޒޭންއަށްވީ ބޮޑު ގޮންޖެހުމަކަށެވެ. ދެވަނަ ފަހަރަކަށް މަގު އޮޅުމަށް މެދުވެރިވި ސަބަބަކަށެވެ. ރަށްޓެއްސެއް ދިން ފުރުސަތެއްގައި ރިސޯޓަށް ގޮސް އަނެއްކާ ފެށުނީ ކުރީގެ އުޅުމެވެ. ނާސިގެޔެކޭ އެތަނެކޭ އެއްވަރެވެ. ރޭދުވާ ނިމެނީ މަސްތުގެ ހާލުގައި ޒިނޭކުރުމުގައެވެ. އެތައް އަންހެނުންގެ ދާންމަތި ފަޅުފިލުވާދިނުމުގައެވެ. ޕާޓީ ކުރުމުގައެވެ. ﷲ ހަރާމް ކުރެއްވި އެތައްކުށްތަކެއް ކުރުމުގައެވެ.
ދުވަސްތައް މާޒީއާއި އެކުވަމުންދިޔައެވެ. ނަސީބަކީ ކަތީބަކު ދޭއެއްޗެއްނޫނެވެ. ކޮންމެ ކަމެއްވެސް އެކަމެއްވާން ކަޑައެޅިފާވައި ވަގުތު ޖެހުމުން ވާނެވެ. ޒޭންގެ ތިމާގެ މީހެއް ޒޭން އަށް އޭނާ ބޭނުން ދާއިރާއަކުން ކިޔެވުމުގެ ފުރުސަތު ދިނެވެ. އެއަށްވުރެ އަގު ބޮޑީ އޭނާ ޒޭން އަށް ކުރި އިތުބާރާ ދިން ނަސޭހަތެވެ. ޒޭން އެތައް ފަހަރަކު ވިސްނިއެވެ. ޒޭން ބޭނުންވީ އޭވިއޭޝަން ދާއިރާއިން ކުރިއަށް ދާށެވެ. ސަބަބަކީ އެއީ އޭނާގެ ކުޑައިރުގެ ހުވަފެނަކަންވުމާއި ހަލާލުގޮތުގައި ގިނަ ރުފިޔާ ލިބޭ ދާއިރާއަކަށްވުމެވެ. ކިޔެވުމުގެ އެ ދަތުރުގައި އޭނާއަށް ހަޔާތުގެ ބައިވެރިއެއް ލިބުނެވެ. އޭނާގެ ހުރިހާ ހަޤީގަތެއް އެނގިހުރެ ވެސް ހިތްވަރު ދިނީ ދިރިއުޅުމުގައި ކުރިޔަށް ދާށެވެ. ހަރުދަނާ ފިރިހެނަކަށް ވާށެވެ. ލޯބިން އެތައް ރަގަނޅު މަގެއް ދައްކައިދިނީ ފޫހިކަމެއްނެތިއެވެ. ކެތްތެރިކަމުގެ މޭވާ ފޮނިވާނެކަން ވިސްނައިދިނެވެ. ރުޅިއެއީ މީހާގެ ހަލާކުކަން ވިސްނައިދިނެވެ. އަދިވެސް ޒޭންއަށް އެއްކޮށް އެދިރިއުޅުމާ ދުރުވާން އުނދަގުލެވެ. އަދިވެސް މީހުން ކިބައިން ބަދަލު ހިފާ ހިތްވެއެވެ. ނަމަވެސް އޭނާ އަމިއްލަ ނަފްސު އަމިއްލަ ބާރުގެ ދަށަށްގެނައެވެ.
"ޖާން ނުނިދަނީތަ؟" ޒޭން ހިޔާލުން ނުކުމެވުނީ އޭނާގެ މަގަތުގައި އޮތް އޭނާގެ ލޯބިވާ އަންހެނުން ޔާނާގެ އަޑަށެވެ. ދެލޯ ފުހެލުމަށް ފަހު ޒޭން ޔާނާ ކައިރިކޮށްލާ ނިތްކުރިއަށް ބޮސްދިނެވެ. މިއަދު 27 އަހަރުގެ ޒޭން އަކީ އޭވިއޭޝަން ގެ ދާއިރާއިން ކިޔަވައިން ހުރި ހުނަރުވެރި ކުޅަދާނަ މުވައްޒަފެކެވެ. ހަރުދަނާ ފިރިއެކެވެ. ޒިންމާދާރު ބައްޕައެކެވެ. ސިނ ގިރޭޓާވެސް މުޅިން ދުރުވެފައިވާ އައު ޒޭން އެކެވެ. ޔާނާގެ އެހީތެރިކަމާ ލޯބީގެ އިތުރުން އަމިއްލަ ހިތްވަރުން ޒޭން ވަނީ އޭނާގެ މަޤުސަދު ހާސިލް ކޮށްފައެވެ. ބީވި މައިންބަފައިންނާއި އާއިލާގެ ލޯތްބާ ރުހުން އަލުން ހޯދާފައެވެ.މިއަދުވެސް ހިތުގެ އެންމެ އަޑިން އެ ގޮތް ނޭނގޭ ޖަލުގެ ރައްޓެއްސަށް ޒޭން ޝުކުރުވެރި ވެއެވެ. ﷲ އޭނާ އަށް ތެދުމަގު ދެއްކެވީތީ ހަމްދުކުރެއެވެ.
ނޯޓް: މިއީ މި ނޫހުން ހުޅުވާލި ވާހަކަ ލިޔުމުގެ މުބާރާތަށް ބައިވެރިއަކު ހުށަހަޅާފައިވާ ވާހަކައެކެވެ.
