އަހަރެންގެ ހިތްހެޔޮކަމުގެ ފައިދާ ނާޖާއިޒު ގޮތުގައި ނެގި މީހުންނަށް ވެދުން ސަލާމެވެ.
މީހަކު ދެރަވެފައި ހުންނަތަން ފެނިއްޖެ ނަމަ އަހަރެން އަބަދުވެސް ވަރަށް ދެރަވެއެވެ. އެކަމަކާ ކަންބޮޑުވެއެވެ. އެމީހަކީ އަހަރެން ނުދަންނަ މީހެއް ނަމަވެސް މެއެވެ.މީހަކު މާޔޫސްވެ ހިތާމަ ކުރާ މަންޒަރު އަހަރެންނަށް ފެނިއްޖެނަމަ އެމީހަކު މަސަލަސް ކުރެވޭތޯ އަހަރެން މަސައްކަތް ކުރަމެވެ. އެމީހަކު އުފާ ކޮށްދެވޭތޯ އަހަރެން އަބަދުވެސް ބަލަމެވެ. ސަބަބަކީ އަނެކާގެ ހިނިތުންވުން ފެެނި އަހަރެން އުފާވާތީއެވެ. ހިތްހެޔޮކަމަށް ލޯބި ކުރުމަށް އަހަރެންގެ މައިންބަފައިން އަހަރެންނަށް އަބަދުވެސް ވިސްނައިދީފައި ވާތީއެވެ.
އަހަރެން އަބަދުވެސް މަސައްކަތް ކުރީ އަހަރެންގެ އެކުވެރީން އުފާ ކޮށްދެވޭތޯއެވެ. އޮޅިގެން ނަމަވެސް އެމީހުންނަށް އަނިޔާއެއް ދެވިދާނެކަމަށް ޓަކައި އަހަރެން ބިރުގަނެއެވެ. އެފަދަ ކަމަކަށް މަގުކޮށޭ ފަދަ ކަމެއް ވެސް ނުކޮށް ވޭތޯ އަހަރެން މަސައްކަތް ކުރަމެވެ. ނަމަވެސް އެކަންކަމުގެ ސަބަބުން އާޚިރުގައި އަހަރެން ހިތާމަ ކުރަން ޖެހޭނެ ކަން އަހަރެން ނުދެނަ ހުރީމެވެ. އަހަރެން އެކަންކަމުގެ ސަބަބުން ކަރުނަ އަޅައި ރޯން ޖެހޭނެ ކަމަަށް އަހަރެންނަށް ދުވަހަކު ވެސް ވިސްނިފައެއް ނެތެވެ. ފަހަރުގައި އަހަރެންނަށް ދުނިޔެ ދަސްވެފައި ނެތީއެވެ.
އަބަދުވެސް މާމަމެން ކާފަމެން ބުނާ އަޑު އަހަމުއެވެ. އެކަކަށް ވެސް މާ ބޮޑަށް އިތުބާރު ނުކުރާށެވެ. އެހެނީ ކާންދޭ އަތުގައި ދަތް އަޅައިފައި ދާ މާކަނާ ފަދަ އެއްޗަކަށް އެކުގައި އުޅޭ ރަހުމަތްތެރިޔާ ވެސް ބަދަލު ވެދާނެތީއެވެ. ބައެއް ފަހަރަށް ގާތުގައި ރަހުމަތްތެރިއަކު ގެންގުޅުމަކީ އޮޅުކޮށްގެން މިނިކާވަގެއް ގެންގުޅުން ފަދަ ކަމެކެވެ. ކުޑައިރުގައި އަމިއްލަ އަތުން ކާން ދިނުމުން ވެސް ބޮޑުވެ އެ އެއްޗަށް ބާރު ލިބުމުން އޭގެ ސާހިބު މީހާ ކާލާކަށް ވެސް އެ އެއްޗެހި ފަހަކަށް ނުޖެހޭނެއެވެ.
ކަންތައްތައް ވެގެން ދިޔައީ ވެސް އެހެންނެވެ. އަހަރެމެންގެ ކާބަފައިން ބުނި ގޮތާ ދާދި އެއްގޮތަކަށެވެ. އަހަރެންގެ ހިތްހެޔޮކަމުގެ ފައިދާ އެމީހުން ނެގީ ނާޖާއިޒު ގޮތުގައެވެ. އަހަރެންގެ ހިތްހެޔޮކަން އެމީހުން މާނަ ކުރީ މުޅިން ގޯސް ކޮށެވެ. އަހަރެން އެމީހުންނާ ދޭތެރޭ ބަހައްޓަމުން ދިޔަ ގާތްކަމުގެ މާނަ އެމީހުން އޮޅުވައިލީއެވެ. އެމީހުންނަށް އަހަރެންގެ އަގު، ބިމު ހުރި ވެއްޔަށް ވުރެ ވެސް ދަށްވީއެވެ. އަހަރެން ކޮށްދިން އެއްވެސް ކަމެއްގެ އަގު އެމީހުންގެ ކުރިމަތީގައި ނެތުނީއެވެ.
އަހަރެން ކަލަ ގޮވާކަށް ބޭނުމެއް ނެތެވެ. އަހަރެން އެމީހުންނަށް ކޮށްދިން ކަންތައްތަކުގެ ވާހަކަ ދައްކާކަށް ވެސް ނެތީމެވެ. ނަމަވެސް އަހަރެން ދެރަވެއެވެ. އަހަރެންގެ ހިތަށް ނުހަނު އަސަރު ކުރެއެވެ. އެމީހުން އަހަރެން އެމީހުންނަށް ކޮށްދިން ހެޔޮ ކޮންމެ ކަމެއްގެ ބަދަލުގައި އަހަރެންނަށް "ތެޔޮ ހަމެއް" އެމީހުން ދިނީމައެވެ. އާނއެކެވެ. އެއީ ދުނިޔޭގެ އާދަތާއެވެ.
އަހަރެންގެ ހިތްހެޔޮ ކަމުގެ ފައިދާ ނާޖާއިޒު ގޮތުގައި ނެގި މީހުންނަށް ވެދުން ސަލާމެވެ. އަހަރެން މިއަދު ބިކަ ހާލުގައި ވިޔަސް ތިބާ މިއަދު ވިޔަފާރި ކޮށް މުއްސަނދި ވެފައި ތިވަނީ އަހަރެންގެ ފައިސާ އިންނެވެ. މިއަދު ތިބާ ބަނޑުފުރާ މުއްތި ކުރަނީ ވެސް އޭގެންނެވެ. އަހަރެން މިއަދު އެކަނިވެރިވެފައިވީ ނަމަވެސް މިއަދު ތިބާގެ ގާތުގައި ތިބާއަށް ލޯބި ދީ އަޅާލާނެ އަނތްބެއް އެބަހުއްޓެވެ. އިރެއްގައި އެއީ އަހަރެންގެ އަތު ހިފާ މުޅި އުމުރު ދުވަހު އެކުގައި އުޅެން ވައުދު ވީ ލޯބިވެރިޔާއެވެ. އަހަރެންގެ ހިތްހެޔޮކަމުން ތިބާ ހީިކުރީ ތިބާ އަހަރެންގެ ލޯބިވެރިޔާ ފޭރިގަތް އިރުގައި ވެސް އަހަރެން ހުންނާނީ ހެވިފައި ކަމަށް ހެއްޔެވެ.
ތިޔަ ހީކުރެވުނީ ރަނގަޅަކަށް ނޫނެވެ. އަހަރެން ރުއި ރުއިމާއި އަހަރެން ކުރި ހިތާމަ ދެނެވޮޑިގެންވާނީ މާތް ރަސްކަލާނގެއެވެ. ދެން އެމަންޒަރު ދުށް ދެތިން މީހެކެވެ. އަބަދުވެސް ބުނާ އަޑު އަހަމުއެވެ. މީހަކަށް ރަނގަޅު ކަމެއް ކޮށްދީފިނަމަ ކޮންމެވެސް ދުވަހަކުން ތިބާއަށް އުފާވެރިކަން ދެއްވާނެއެވެ. އެބަހުން އަހަރެންގެ ހިތަށް ހިތްހަމަ ޖެހުން ލިބެއެެވެ.
އެދުވަަހު އަހަރެން ހިތްހެޔޮކަމާއެކު ތިބާއާ ވާހަކަ ދެއްކީމެވެ. ތިބާ ބުނިހާ ކަމެއް އަހަރެން ކޮށްދިނީމެވެ. ތިބާ ބުނި އެއްވެސް ކަމަކަށް ދެކޮޅެއް ވެސް ނުމެ ހަދަމެވެ. ނަމަވެސް މިއަދު ތިބާ ކޮބައި ހެއްޔެވެ؟ ތިބާ ގެއްލިއްޖެއެވެ. ތިބާ އަހަރެންގެ ހިތްހެޔޮކަން މަތިން ހަނދުމަ ނެތިއްޖެއެވެ. އަހަރެންނަކީ ތިބާއަށް މުހިންމު މީހަކަށް ނުވިތާއެވެ.
ތިބާއަށް މިއަދު އަހަރެން ފެންނަނީ ކަމަކު ޖެހުނީމައެވެ. ހެއްވާ ވާހަކަ އަކީ ކަމެއް ޖެހުނީމާ ގުޅި ނަމަވެސް އަހަރެން ތިބާގެ އެދުމަކަށް ނޫނެކޭ ނުބުނުމެވެ. ތިބާ ކަމަކު ބުނެފިނަމަ އެކަމެއް ނުކޮށްދީ އަހަރެންނަށް ނުހުރެވޭ ކަމެެވެ. އަހަރެންގެ ހިތްހެޔޮކަމުގެ ފައިދާ ފާޅުގައި ތިބާ ނަގަމުން ދާއިރުގައި ވެސް އަހަރެން ހިނިތުންވެ އެ މަންޒަރު ބަލަން ހުންނަ ކަމެވެ.
އެކުވެރިޔާއެވެ. އަބަދަކު އަހަރެން ތިބާ އަަހަރެންގެ ހިތްހެޔޮކަމުގެ ފައިދާ ނާޖާއިޒު ގޮތުގައި ނަގާ މަންޒަރު ބަލާކަށް ހެވިފައެއް ނުހުންނާނެއެވެ. އަހަރެން ތިބާގެ ލޯ ކުރިމަތިން ގެއްލޭ ދުވަހެއް އަންނާނެއެވެ. އެ ދުވަހުން ތިބާ އަށް އަހަރެންގެ މުހިއްމުކަން ވިސްނޭނެއެވެ. ނަމަވެސް އެ ދުވަހުން އޮންނާނީ ވަގުތު ފާއިތުވެފައެވެ. އަދިވެސް އެއްފަހަރު ބުނަމެވެ. އަހަރެންގެ ހިތްހެޔޮކަމުގެ ފައިދާ ހެޔޮގޮތުގައި ހިފި މީހުންނަށް ވެދުމާއި ސަލާމެވެ.
ޙަކުރުދެންޏާ ބޮޑުބޭބެ.