ސުކޫލު ދައުރުގެ ހަނދާންތައް: ޕީއީ ގަޑީގައި ބޭރަށް ނުގެންދިއުމުން ރުޅިގަދަވީ ކޮން ބައެއް؟

ސުކޫލް ދައުރުގެ ހަނދާންތަކުގެ ވާހަކައަކީ ދައްކާ ކޮޅުން ލާނޭ ވާހަކަ ތަކެއް ނޫނެވެ. ސުކޫލް ދައުރުގައި ހިނގާފައި ހުންނަ މަޖާކަންތައްތަކުގެ ހަނދާން އިއްޔެވީ ކަމެއްހެން ސިކުނޑީގައި ހަރުލާފައި ހުރެއެވެ. ސުކޫލް ދައުރު "މިސް" ނުވާ ހަމަ އެކަކު ވެސް ނޫޅޭނޭ ބުނުމަކީ ދޮގަކަށް ނުވާނެއެވެ. ސުކޫލް ދައުރުގެ ހަނދާންތަކުގެ ތެރެއިން ކަމެއް މިއަދު ތަސްވީރު ކޮށްލަމާ ހިނގާށެވެ.

Ads by MWSC

އެންމެ ހަނދާން ހުންނަން ފެށީއްސުރެ ވެސް ސުކޫލް ދައުރުުގައި އެންމެ އުފާވާ އެއް ވަގުތަކީ ފިޒިކަލް އެޑިއުކޭޝަން (ޕީއީ) ގަޑިއެވެ. ސަަބަބަކީ އެގަޑީގައި ކުލާހުން ބޭރަށް ގޮސް ކުޅުމުގެ ފުރުސަތު ލިބޭތީއެވެ. ކިޔެވުމުގެ މާހައުލުން ވަގުތުކޮޅެއް ކުޅެލަން ލިބޭތީއެވެ. އެހެންކަމުން ކޮންމެ ހަފްތާއެއްގައި ވެސް ޕީއީ ގަޑި އޮންނަ ދުވަހަކީ ހުރިހާ ދަރިވަރުން ވެސް ވަރަށް އިންތިޒާރު ކުރާ ދުވަހެކެވެ.

ޕީއީ ގަޑީގައި ތަފާތު އެކި ކަސްރަތުތައް ކުރުމާއި ތަފާުތު އެކި ކަހަލަ ކުޅިވަރުތައް ކުޅުމުގައި ވަގުތު ހޭދަ ކުރުމަކީ މަޖާ ކަމެކެވެ. އެއީ އެތައް ހަނދާންތަކެއް ގުޅިފައިވާ ގަޑިއެކެވެ. އެތައް ކަންތައްތަކެއް މިއަދު ވެސް ހަނދާން ވެއެވެ.

ޕީއީ ގަޑީގައި ބައެއް ދުވަސްދުވަހު ޓީޗަރު ބޭރަށް ނުގެންދެއެވެ. އެކިކަހަލަ ސަބަބުތަކާ ހުރެއެވެ. ބައެއް ފަހަރަށް ވިއްސާރަވުމުގެ ސަބަބުންނެވެ. އަނެއްބައި ފަހަރަށް ދަރިވަރުން ބަސް ނާހާތީއެވެ. އަދި މިނޫން ވެެސް ސަބަބުތަކެވެ. އެެ ދުވަހެއްގައި ކުލާސް ތެރޭގައި ތިބެގެން ކޮންމެވެސް ކަހަލަ ކުޅިވަރެއް ކުޅުމަށް ޓީޗަރު ބުނާނެއެވެ.

ޕީއީ ގަޑީގައި ބޭރަށް ނުގެންދިއުމަކީ ގިނަ ކުދިން ވަރަށް ރުޅި އަންނަ ކަމެކެވެ. އަޅުގަނޑުމެންގެ ސުކޫލް ދައުރުގައި ބޭރަށް ނުގެންދިއުމުން އެކަމާ ޝަކުވާކުރާ ހަނދާން ދުވަހަކު ވެސް ނުނެތޭނެއެވެ. ޓީޗަރު ގާތުގައި ބޭރަށް ގެންދިއުމަށް އެދި އާދޭސް ކުރާނެއެވެ. އަދި އެވަރުން ވެސް ނުގެންގޮސްފިނަމަ ރުޅި މޫނު ހަދައި ތުން ދަމައިގެން ތިބުމަކީ ކަން ވާ ގޮތެވެ.

މިއީ ސުކޫލް ދައުރުގެ ދުވަސްތައް އިތުރަށް އުޖާލާ ކޮށްދޭ ކަމެކެވެ. އަދި ސުކޫލްދައުރުގެ މަޖާ ހަނދާންތަކުގެ ތެރެއިން އެއްކަންތަކެވެ. ނިންމާލަމުން ސުވާލެއް ތިޔަ ކިޔުންތެރިންނަށް ދޫކޮށްލާނަމެވެ. ޕީއީ ގަޑީގައި ބޭރަށް ނުގެންގޮސްގެން އެކަމާ ރުޅިގަދަވި ހެއްޔެވެ؟