އިންތިހާބު ބޭއްވުމުގެ ހުއްދަ އެޗްޕީއޭ އިން މިހަފްތާ ތެރޭގައި ލިބޭނެ: އީސީ
އަންނަ އަހަރު ބޭއްވުމަށް ނިންމާފައިވާ ލޯކަލް ކައުންސިލް އިންތިޚާބުގެ މަސައްކަތްތައް ކުރިއަށް ގެންދިއުމުގެ ހުއްދަ ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން މިހަފްތާ ތެރޭގައި ލިބޭނެ ކަމަށް އިންތިހާބުތަކާބެހޭ މަރުކަޒު އިލެކްޝަންސް ކޮމިޝަން (އީސީ) އިން ބުނެފިއެވެ.
އެކޮމިޝަންގެ ރައީސް އަހުމަދު ޝަރީފް ދައުލަތުގެ މީޑިއާއަށް ދިން ބަސްދީގަތުމެއްގައި ވިދާޅުވެފައި ވަނީ ޤާނޫނުގައި ބުނާ ތާރީޚުގެ ކުރިން އެކޮމިޝަނުން ފުރިހަމަ ކުރަން ޖެހޭ ގިނަ ކަންތައްތަކެއް އެބަހުރި ކަމަށާއި އެގޮތުން 60 ދުވަހުގެ ކުރިން ރީ ރަޖިސްޓްރޭޝަނަށް ހުޅުވާލުމާއި، 28 ދުވަސް ކުރިން ކެނޑިޑޭޓުންނަށް ކެމްޕެއިން ކުރުމުގެ ފުރުޞަތު ދިނުން ފަދަ ކަންކަން ހިމެނޭ ކަމަށެވެ.
އެކަންކަމަށް ރިޢާޔަތްކޮށް މިހިނގާ ޑިސެމްބަރު މަހުގެ 15 ވަނަ ދުވަހާ ޖެނުއަރީ މަހުގެ 5 ވަނަ ދުވަހާ ދެމެދުގެ މުއްދަތެއްގައި އިންތިޚާބު ބާއްވަން ކުރަންޖެހޭ މަސައްކަތް ކުރުމުގެ ހުއްދަ އެޗްޕީއޭއިން ދިނުމުން މެނުވީ ކަނޑައެޅިފައިވާ ތާރީޚަށް އިންތިޚާބު ނުބޭއްވޭނެކަމަށް ވެސް ޝަރީފު ވިދާޅުވިއެވެ.
މީގެ އިތުރުން އީސީ ޝަރީފް ވިދާޅުވީ ވަކި ތާރީޚެއްގެ ކުރިން އިންތިޚާބު ބޭއްވުމުގެ ކަންކަން ކުރިއަށް ގެންދިއުމަށް ހުއްދަ ނުދޭނަމަ މަސައްކަތް ނުފެށޭނެ ކަމަށާއި، އެކަމާ ގުޅިގެން އެޗްޕީއޭއާ މަޝްވަރާ ކުރައްވަމުން ގެންދަވާ ކަމަށެވެ. އެގޮތުން މިހަފްތާގައި އިންތިޚާބު ބޭއްވުމަށް ވާންޖެހޭ ތައްޔާރީތައް ފެށުމުގެ ހުއްދަ ލިބޭނެކަމަށް އެޗްޕީއޭއިން މަޢުލޫމާތު ދެއްވާފައިވާކަމަށް ވެސް ޝަރީފް ވިދާޅުވެފައިވެއެވެ.
ވަގުވޯޓް ތިވޯޓުންވެސްވައްކަންކުރާނެ