ލަންކާގެ މުސްލިމުންނަށް އެހީތެރިވާން ނިންމެވުމަކީ ވަރަށް ރަނގަޅު ނިންމެވުމަކަށް ވާނެ: ޑރ. ޢިޔާޟް

ކޮވިޑް-19 ޖެހިގެން އަވަށްޓެރި ޝްރީލަންކާގައި މަރުވާ މުސްލިމުންނަށް އެހީވާން ދިވެހި ސަރުކާރުން ނިންމެވުމަކީ ވަރަށް ރަނގަޅު ނިންމެވުމަކަށް ވާނެ ކަމަށް ދީނީ ޢިލްމުވެރިޔާ ޑރ. މުޙައްމަދު ޢިޔާޟް ޢަބްދުއްލަތީފް ވިދާޅުވެއްޖެއެވެ.

Ads by STELCO

ޑރ. ޢިޔާޟް މިއަަދު ކުރެއްވި ޓްވީޓެއްގައި ވިދާޅުވީ އަވަށްޓެރި ޝްރީލަންކާ ގައި ކޮވިޑް-19 ގެ ބަލިމަޑު ކަމުގައި މަރުވާ މުސްލިމުންނާމެދު ވަރަށް އިހާނެތި ގޮތަކަށް ކަންތައް ކުރެވެމުން ދަނިކޮށް، އެބައި މީހުންނަށް އެހީތެރިކަމުގެ އަތެއް ފޯރު ކޮށްދެއްވާ، އެއިހާނެތިކަމުން މުސްލިމުން ސަލާމަތް ކުރައްވަން ނިންމެވުމަކީ ވަރަށް ރަނގަޅު ނިންމެވުމެއް ކަމަށެވެ.

"މުސްލިމުން އެއްބަޔަކު އަނެއް ބަޔަކަށް އެހީތެރިވާހާ ހިނދަކު ﷲ ވޮޑިގެންވަނީ އެބައި މީހުންގެ އެހީތެރި ކަމުގައި ކަމަށް ޙަދީޘްގައި އައިސްފައިވޭ. މިއީ މުސްލިމު އަވަށްޓެރިންނަށް ދެވުނު ވަރަށް ބޮޑު އެހީތެރިކަމެއް" ޑރ، އިޔާޟް ވިދާޅުވެފައިވެއެވެ.

ފޮރިން މިނިސްޓްރީން ވިދާޅުވީ ކޮވިޑް-19 ޖެހިގެން ސްރީލަންކާގައި ނިޔާވާ މުސްލިމުންނަށް އިސްލާމީ އުޞޫލުތަކާ އެއްގޮތަށް ޖަނާޒާގެ ކަންތައްތައް ފުރިހަމަ ކުރުމަށް ޝްރީލަންކާ ސަރުކާރަށް ދަތިތަކެއް ކުރިމަތި ވެފައިވާ ކަމަށާއި، އަވަށްޓެރި ޝްރީލަންކާގެ މިފަދަ މުސްލިމުންގެ އިސްލާމީ އުޞޫލުތަކާ އެއްގޮތަށް ޖަނާޒާގެ ކަންތައްތައް ދިވެހިރާއްޖޭގައި ހަމަޖައްސައިދިނުމަށް އެހީތެރިކަން ހޯއްދެވުމަށް އެދިވަޑައިގެން ސްރީލަންކާގެ ރައީސް ގޯތާބަޔަ ރާޖަޕަކްސަ ރައީސުލްޖުމްހޫރިއްޔާ އިބްރާހިމް މުޙައްމަދު ސާލިޙްގެ އަރިހަށް ސިޓީފުޅެއް ފޮނުއްވާފައިވާ ކަމަށެވެ.

އިސްލާމީ އުޚުއްވަތްތެރިކަން ދެމެހެއްޓުމުގެ މަތިވެރި ނިޔަތާއި މަޤްޞަދުގައި، އަދި ދިވެހިރާއްޖެއާ ސްރީލަންކާއާ ދެމެދު އޮތް ޒަމާންވީ ގުޅުމުގެ މައްޗަށް ރިޢާޔަތް ކުރައްވައި، ސްރީލަންކާގެ މުސްލިމުންނަށް ފޯރުކޮށްދެވޭ ޚާއްސަ އެހީތެރިކަމެއްގެ ގޮތުގައި ޝްރީލަންކާގެ ރައީސްގެ މި ހުށަހެޅުއްވުމުގައި އެދިވަޑައިގެންފައިވާ ކަންކަން އިންތިޒާމް ކުރެވޭނެ ގޮތެއް އޮތްތޯ ބެލުމަށް ރައީސް ޞާލިޙު ގެންދަވަނީ ސަރުކާރުގެ ކަމާ ބެހޭ އިދާރާތަކުގެ މެދުގައި މަޝްވަރާ ކުރައްވަމުން ކަމަށް ވެސް އެމިނިސްޓްރީން ބުނެފައިވެއެވެ.