މުސްލިމުން ވަޅުލަން ރާއްޖެ ގެންދާތީ ލަދު ގަންނަން ޖެހޭ: މަންގަލާ
އަވަށްޓެރި ޝްރީލަންކާ ގައި ކޮވިޑް-19 ޖެހިގެން މަރުވާ މުސްލިމުން ވަޅުލަން ދިވެހިރާއްޖެއަށް ގެންނަން ޖެހުމުން ލަދު ގަންނަން ޖެހޭ ކަމަށް އެޤައުމުގެ ކުރީގެ ފިނޭންސް މިނިސްޓަރު މަންގަލާ ސަމަރަވީރާ ވިދާޅުވެއްޖެއެވެ.
ލަންކާގައި މަންގަލާ ފިނޭންސް މިނިސްޓަރުކަން ކުރައްވާފައި ވަނީ 2017 އިން ފެށިގެން 2019 ވަނަ އަހަރަށެވެ.
ރާއްޖޭގެ ފޮރިން މިނިސްޓްރީން ނެރުނު ބަޔާނެއްގައި މިއަދު ބުނެފައި ވަނީ، ކޮވިޑް-19 ޖެހިގެން ލަންކާ ގައި މަރުވާ މުސްލިމުން، އެޤައުމުގައި ވަޅުލެވެން ނެތުމުން، ރާއްޖޭގައި ވަޅުލައި ދިނުމަށް ޝްރީލަންކާގެ ރައީސް ގޯތާބަޔާ ރާޖަޕަކްސާ، ރައީސް އިބްރާޙިމް މުޙައްމަދު ޞާލިޙު އަރިހުން އެދިވަޑައިގެންފައިވާ ކަމަށެވެ. އެހެންކަމުން އެކަމާ ގުޅޭގޮތުން ކަމާބެހޭ މުއައްސަސާތަކާއި ރައީސް މަޝްވަރާ ކުރައްވަން ނިންމަވާފައިވާ ކަމަށް ވެސް އެބަޔާނުގައި ވިދާޅުވެފައިވެއެވެ.
މިކަމާއި ގުޅޭގޮތުން ރާއްޖޭގެ ފޮރިން މިނިސްޓަރު ޢަބްދުﷲ ޝާހިދު ކުރެއްވި ޓްވީޓެއްގެ ސްކްރީންޝޮޓެއް ޓްވީޓު ކުރައްވަމުން މަންގަލާ ވިދާޅުވީ މިއީ ތެދެއް ކަމަށްވާނަމަ އެއީ ލަދުގަންނަން ޖެހޭ ކަމެއް ކަމަށެވެ.
"ލަންކާގެ ހުރިހާ ރައްޔިތުންނަށް ވެސް އެމީހެއްގެ ޖަނާޒާ އިހުތިރާމާއެކު އެ ރައްޔިތެއްގެ ގައުމުގައި ލިބެންޖެހޭ،" ލަންކާ ސަރުކާރާމެދު ނުރުހުން ފާޅު ކުރާފަދަ މޭރުމަކުން މަންގަލާ ވިދާޅުވެފައިވެއެވެ.
ރާއްޖޭގެ ފޮރިން މިނިސްޓްރީން ބުނެފައިވަނީ އިސްލާމީ އުހުއްވަތްތެރިކަން ދެމެހެއްޓުމުގެ މަތިވެރި ނިޔަތާއި މަގްސަދުގައި، އަދި ދިވެހިރާއްޖެއާ ސްރީލަންކާއާ ދެމެދު އޮތް ޒަމާންވީ ގުޅުމުގެ މައްޗަށް ރިއާޔަތްކުރައްވައި، ސްރީލަންކާގެ މުސްލިމުންނަށް ފޯރުކޮށްދެވޭ ހާއްސަ އެހީތެރިކަމެއްގެ ގޮތުގައި ސްރީލަންކާގެ ރައީސްގެ އެ ހުށަހެޅުއްވުމުގައި އެދިވަޑައިގެންފައިވާ ކަންކަން އިންތިޒާމް ކުރެވޭނެ ގޮތެއް އޮތްތޯ ބެލުމަށް ރައީސް ޞާލިޙު ގެންދަވަނީ ސަރުކާރުގެ ކަމާ ބެހޭ އިދާރާތަކުގެ މެދުގައި މަޝްވަރާ ކުރައްވަމުން ކަމަށެވެ.
ލަންކާގައި ކޮވިޑް-19 ޖެހިފައިވާ މީހުން އަންދާލަނީ، އެބަލި ޖެހިފައިވާ މީހުން ވަޅުލައިފިނަމަ އެބަލި ބިންގަނޑު ތެރެއިން ފެތުރިގެން ދަނޑުވެރިކަމާއި ބޯފެނަށް ވެސް އަސަރު ކޮށްފާނެ ކަމަށް ޤަބޫލުކޮށް ލަންކާގެ ބުދިސްޓު މޮންކުން ފަތުރާފައިވާ ވާހަކަތަކެއްގެ ސަބަބުން ކަމަށް ރިޕޯޓުތަކުން ބުނެއެވެ. މިބަލީގައި މަރުވާ މުސްލިމުން ވެސް މިފަދައިން އަންދަމުންދާތީ، އެކަމާ އެގައުމުގެ މުސްލިމުން ވަނީ ވަރަށް ބޮޑަށް ނުރުހުން ފާޅު ކޮށްފައެވެ.
