"ވާނުވާ" މައްސަލައިގެ ހަގީގީ ވެކްސިނަކީ މައްސަލަ އަވަހަށް ނިންމުން: ޕީޖީ ޝަމީމް
"ވާނުވާ" ބަންދުގެ ހަގީގީ ވެކްސިނަކީ އަވަހަށް މައްސަލައިގެ ޝަރީއަތް ހިންގުން ކަމަށް ޕްރޮސެކިއުޓާ ޖެނެރަލް ޙުސެއިން ޝަމީމް ވިދާޅުވެއްޖެއެވެ.
"ވާނުވާ ބަންދުގެ ހަގީގީ ވެކްސިން" ނަމުގައި ޕީޖީ ޝަމީމް އޭނަގެ ބްލޮގުގައި ލިޔުއްވާފައި ވަނީ ރާއްޖޭގެ ޖިނާއީ އަދުލުގެ ނިޒާމުގައި އެންމެ ބޮޑަށް ދެކެވޭ އެއް ވާހަކައަކީ، ޝަރީއަތް ނިމެންދެން މީހުން ބަންދުގައި ބޭތިއްބުމަށް ކޯޓުން ކުރާ “ވާނުވާ” އަމުރެއްގެ ވާހަކަ ކަމަށާއި އަދި އެކަމަކީ ވަރަށް ކަންބޮޑުވާ ކަމެއް ކަމަށެވެ.
އެގޮތުން ޕީޖީގެ މަގާމަށް އައްޔަންވުމުގެ ކުރިން ވެސް އަދި ފަހުން ވެސް ވާނުވާ އަށް ހައްލު ގެނެވޭތޯ އެކި ފޯރަމްތަކުގައި އެކި ގޮތްގޮތަށް މަސައްކަތް ކުރެވިފައިވާ ކަން ފާހަގަ ކުރައްވާ ޕީޖީ ޝަމީމް ވިދާޅުވީ ޝަރީއަތް ނިމެންދެން ބަންދުކުރަން ގާނޫނު ހުއްދަކުރަނީ ވެސް ވަރަށް ނާދިރު ހާލަތުތަކުގައި، އެމީހެއްގެ ފަރާތުން ހަގީގަތުގައިވެސް މުޖްތަމައަށް ނުރައްކާވާ މީހުންނަށް ކަމަށެވެ.
"އެކަމަށް ވަކި މިންގަނޑެއް ގާނޫނު ތަންފީޒުކުރާ އިދާރާތަކުން ގެންގުޅެއެވެ. އަޅުގަނޑު މަޤާމާ ޙަވާލުވިފަހުން، މިދެންނެވި މިންގަނޑު އަދި އިތުރަށް ވާނީ ހަރުކަށި ކޮށްފައެވެ. މިހާރު ބަންދުގައި ތިބޭނީ ކޮންމެހެން ބަންދުގައި ތިބެންޖެހޭކަމަށް ފެންނަ މީހުންނެވެ. މިސާލަކަށް، މީހުން މެރިކަމަށް ތުހުމަތުވާ މީހުންނާއި ކުޑަކުދިންނަށް ޖިންސީ ގޯނާކުރި ކަމަށް ތުހުމަތުވާ މީހުންނާއި ބޮޑެތި ޢަދަދުތަކުން ޑްރަގް ޓްރެފިކް ކުރާ ކަމަށް ތުހުމަތުވާ މީހުންނެވެ،" ޕީޖީ ޝަމީމް އެ ލިޔުމުގައި ލިޔުއްވާފައިވެއެވެ.
