ރަންބީރުއާ އާލިއާ ދިޔައީ އެންގޭންޖްވާކަށް ނޫން، އާ އަހަރު ފާހަގަ ކުރަން: ރަންދީރު ކަޕޫރު
ބޮލީވުޑްގެ ޚަބަރުތަކަށް ބަލާއިރު، މިއަދު އެންމެ ގަދަޔަށް ދެކެވުނު އެއް ވާހަކައަކީ މަޝްހޫރު ފިލްމީ ތަރިން ކަމުގައިވާ އާލިއާ ބަޓް އާއި ރަންބީރު ކަޕޫރުގެ އެންގޭޖްމަންޓަށް އެމީހުން ރާޖަސްތާނަށް ދިޔަ ކަމުގެ ޚަބަރެވެ.
އާލިއާ އޭނަގެ ދައްތަ ޝާހީން ބަޓް އަދި މަންމަ ސޯނީ ރަޒްދާން އާއެކު ރާޖަސްތާނަށް ގޮސްފައިވާއިރު، ރަންބީރު ވަނީ އޭނަގެ ދައްތަ ރިދިމާ ކަޕޫރާއި މަންމަ ނީތޫ ކަޕޫރު ގޮވައިގެން އިއްޔެ އާލިއާމެންނާއެކު ގޮސްފައެވެ. އެހެންކަމުން އެމީހުން ދިޔައީ އެންގޭޖްމަންޓް ބާއްވަން ކަމަށް ބުނެ އަޑުތައް ފެތުރުނެވެ.
އޭގެ އިތުރުން މިއަދު މިދެތަރިންގެ ގާތް އެކުވެރިން ކަމުގައިވާ ދީޕިކާ ޕަދުކޯން އާއި އޭނަގެ ފިރިމީހާ ރަންވީރް ސިންގް ވެސް ވަނީ ރާޖަސްތާނުން އާލިއާ އާއި ރަންބީރާ ބައްދަލު ކޮށްފައެވެ. އެހެންކަމުން އެދެތަރިން ހަމަ ޔަގީނުން ވެސް އުޅެނީ ކައިވެނި ކުރަން އެންގޭޖްމަންޓު ބާއްވަން ކަމަށް އެތައް ބަޔަކު ބުނަމުން ދިޔައެވެ.
ނަމަވެސް މިވާހަކަތައް ރަންބީރުގެ ބޮޑުބޭބެ (ކަރީނާގެ ބައްޕަ) ރަންދީރު ކަޕޫރު ވަނީ ދޮގު ކޮށްފައެވެ.
"އިންޑިއާ ޓައިމްސް" އަށް މައުލޫމާތު ދެމުން ރަންދީރް ބުނީ އާލިއާ އާއި ރަންބީރު ދިޔައީ އެންގޭޖްމަންޓް ބާއްވަން ނޫން ކަމަށާއި އެމީހުން ދިޔައީ އާ އަހަރު ފާހަގަ ކުރަން ކަމަށެވެ.
މީގެއިތުރުން ރަންދީރު ބުނީ އެމީހުން ކައިވެނި ކުރަން އުޅޭނަމަ، މުޅި އާއިލާ އެއްކޮށް އެތަނަށް އެމީހުންނާއެކު ދާނެ ކަމަށެވެ.
ދާދި ފަހުން ރަންބީރު ބުނެފައިވަނީ، އާލިއާ އާއެކު މިއަހަރު ކައިވެނި ކުރަން ރޭވި ކަމަށެވެ. ނަމަވެސް ކޮވިޑްގެ ބަލިމަޑުކަމުގެ ސަބަބުން އެމީހުން ކައިވެނި ފަސްކޮށްލީކަމަށް ވެސް އޭނާ ބުނެފައިވެއެވެ.
