ތިބާގެ ސިކުނޑިއަށް "ކުނި އަޅާ" މީހުން ވަށައިގެންވޭ، އެމީހުންނާމެދު ރައްކާތެރިވޭ!

މިއީ ވަރަށް ފާޑެއްގެ ސުވާލަކަށް ވެސް ވެދާނެއެވެ. އެހެން ނަމަވެސް ހަގީގަތުގައި މިއީ ވަރަށް ފުން މާނައެއް އެކުލެވިގެންވާ ސުވާލެކެވެ. ތިބާގެ ގެއަށް މީހަކު ކުނި އަޅައިފި ނަމަ ތިބާ ކަންތައް ކުރާނީ ކިހިނަކުން ހެއްޔެވެ؟ ތިބާ އެމީހަކު ގައިގައި ތަޅައިގަންނާނީ ހެއްޔެވެ؟ ނުވަތަ ތިބާ އެމީހަކާ ދިމާއަށް ހެއްދެވި ނުހެއްދެވި އަށް ގޮވާނީ ހެއްޔެވެ؟

Ads by STELCO

އެއް ކަމެއް ހަމަ ޔަގީނެވެ. ތިބާ އެމީހަކު ދެކެ ނަފްރަތު ކުރާނެއެވެ. ތިބާގެ ގޭތެރެ ހަޑި ކޮށްލުމުން އެވާހަކަ ތިބާ އެތައް ބަޔަކަށް ކިޔައިދޭނެއެވެ. އެމީހާގެ ގޯސް ވާހަކަ ދައްކާނެއެވެ. އޭނާ އަކީ ތިބާގެ އެކުވެރިއެއް ނަމަ އޭނާ ދެކެ ރުޅި އައިސް ވާހަކަ ނުދައްކާ ވެސް ހުރެފާނެ އެވެ.

ހަގީގަތަށް ވާހަކައެއް ބުނަން ހެއްޔެވެ؟ ތިބާގެ ސިކުނޑިއަށް ކޮންމެ ދުވަަހަކު ވެސް އެތައް ބަޔަކު ކުނި އަޅާކަން ތިބާއަށް ނޭނގިފަައި އޮވެދާނެއެވެ. އެހެން ނަމަވެސް އެއީ ހަގީގަތެވެ. ތިބާއަށް ގޯސް ނަސޭހަތް ދޭ ބައިވަރު މީހުން އުޅެއެވެ. ތިބާގެ ސިކުނޑިއަށް "ކުނި އަޅާ" ތިބާގެ ވިސްނުން ކިލަނބު ކޮށްލަން މަސައްކަތް ކުރާ އެތައް ބަޔަކު އުޅެއެވެ. ތިބާގެ ހުވަފެންތައް ތިބާއަށް ހަގީގަތަކަށް ނުހެދޭނެ ކަމަށް ބުނާ އެތައް ބަޔަކު އެބަ އުޅެއެވެ. އެހެން ނަމަވެސް އެމީހުންނަށް ތިބާ އަޅައެއް ނުލަމެއް ނޫން ހެއްޔެވެ.

ކޮންމެ ދުވަހަކުމެ ތިބާގެ ދިރިއުޅުމަށް ތިބާ އެތައް ކުންޏެއް އަޅަމުއެވެ. ތިބާއަށް ފެންނަ ގޯސް މަންޒަރު ތަކުންނެވެ. އިވޭ އަޑު ތަކުންނެވެ. އެކުވެރިޔާއެވެ. ދިރިއުޅުމުގައި ރަނގަޅު އެކުވެރިން އިހްތިޔާރު ކުރުމަކީ ވަރަށް މުހިންމު ކަމެކެވެ. އެހެން ނޫން ނަމަ ތިބާގެ މުޅި ދިރިއުޅުން ބޮޑު "ކުނިގޮނޑަކަށް" ވުމަކީ އެކަށީގެންވާ ކަމެކެވެ. ކީއްވެގެން ތޯ ސުވާލު އުފެދޭ ދޯއެވެ.

ތިބާގެ ބައެއް އެކުވެރިންނަކީ ތިބާއަށް ހެޔޮއެދޭ ބަޔަކަށް ނުވެދާނެއެވެ. މިތުރުންގެ ސިފައިގައި ތިބޭ ހަތުރުންނަށް ވެސް ވެދާނެއެވެ. ތިބާގެ ގޯސް ވާހަކަތައް އެހެން މީހުންގެ ގާތުގައި އޭނާ ދައްކައެވެ. ތިބާގެ ހުވަފެންތަކަށް ހުރަސް އެޅުމަށް މަސައްކަތް ކުރެއެވެ. ބައެއް ފަހަރަށް މި މީހާ އަންނާނީ އެކުވެރިއެއްގެ ސިފައިގައެވެ. އަނެއްބައި ފަހަރަށް އާއިލާ މީހެއްގެ ސިފައިގައެވެ.

އަހަރެންގެ ނަސޭހަތް އަޑު އަހާށެވެ. ތިބާއަށް އެމީހުންގެ ދުލުގައި ނުހިފެހެއްޓިދާނެއެވެ. ތިބާއަށް އެމީހުންގެ މިޒާޖު ބަދަލު ނުކުރެވިދާނެއެވެ. އަދި ކުރާކަށް ވެސް ނުޖެހެއެވެ. ނަމަވެސް ތިބާއަށް ތިބާގެ ދިރިއުޅުން ރަނގަޅު ކުރެވިދާނެއެވެ. ތިބާއަށް ގޯސް ނަސޭހަތްތައް ދޭ މީހުންނާ ދުރުވެވޭތޯ މަސައްކަތް ކުރާށެވެ. ތިބާ ދަށް ކޮށްލާ މީހުން ވީހާވެސް ދުރުގައި ބޭތިއްބޭތޯ ބަލާށެވެ.

ދިރިއުޅުމުގައި އިހްތިޔާރު ކުރަންވީ ތިބާގެ ހުވަފެންތަކަށް ހިތްވަރު ދޭ މީހެކެވެ. ތިބާއަށް އެހީތެރިވެދީ ތިބާއަށް މަދަދުވެރިވާ މީހެކެވެ. ތިބާގެ ހުނަރުތައް ރަނގަޅު ގޮތުގައި ބޭނުން ކޮށް ތިބާއަށް ތިބާގެ ހުވަފެންތައް ހަގީގަތަކަށް ހެދޭނީ އޭރުންނެވެ. ތިބާއަކީ ވެސް އުފާވެރިކަން ހައްގުވާ މީހެކެވެ. އުފަލުގައި އުޅެވޭނެ މީހެކެވެ. އެހެންކަމުން ތިބާގެ ދިރިއުޅުމަށް ކުނިއަޅާ މީހުން ތިބާގެ ދިރިއުޅުމުން ބޭރު ކުރެވޭތޯ ބަލާށެވެ. ނޫންނަމަ މުޅި އުމުރަށް ހިތާމަ ކުރަން ޖެހިދާނެއެވެ.