އަހަރެންގެ ހިތްހެޔޮ ކަމުގެ މާނަ އޮޅުވާނުލާށެވެ.
ހިތްހެޔޮ ކަމަކީ ކޮންމެ މީހެއްގެ ކިބައިގައި ވެސް ހުންނަން ޖެހޭ ވަރަށް މާތް ސިފައެކެވެ. އެހެންނަމަވެސް ހިތްހެޔޮކަމުގެ ފައިދާ ނަހަމަ ގޮތުގައި ބޭނުން ކުރަމުންދާ މަންޒަރަކީ މިއަދު އަޅުގަނޑުމެންގެ މި ކުޑަކުޑަ މުޖުތަމަޢުން މަދުން ނަމަވެސް ފެންނަމުންދާ މަންޒަރެކެވެ. އެފަދަ ކަންކަމުގެ ސަބަބުން ދެމީހުން ދޭތެރޭ މައްސަލަތައް ޖެހެން މެދުވެރިވެ، ގުޅުން ކެނޑި ފިތުނަތަކެއް އުފެދުމަށް މަގުފަހިވެއެވެ.
އެކުވެރިއެއްގެ ހައިސިއްޔަތުން ހިތްހެޔޮ މީހަކާ މެދު ކަންތައް ކުރާ ގޮތް ގިނަ ބަޔަކަށް އޮންނަނީ އޮޅިފައެވެ. އެކަމަކީ އެމީހެއްގެ ފައިދާ ނަގައިލުމަށް ބޭނުންކުރާ ވަސީލަތެއްގެ ގޮތުގައި އަންނަނީ ގިނަ ބަޔަކު ބޭނުން ކުރަމުންނެވެ. މިހެން ދެންނެވި ކަމުގައި ވީނަމަވެސް މިއީ އެންމެން ކުރާ ކަމެއް ނޫނެވެ. ހިތްހެޔޮ ކަމުގެ ބަދަލު ހަމަ ހިތްހެޔޮ ކަމުން ދައްކުވައިދޭ މީހުން އަޅުގަނޑުމެންގެ މި މުޖުތަމަޢުގައި އުޅެއެވެ.
މިސާލަކަށް ތިމާއަށް ފައިސާގެ ބޭނުންޖެހިފައި ވާ ދަނޑިވަޅެއްގައި ތިމާއަށް ފައިސާގެ އެހީތެރިކަން ފޯރުކޮށްދިނުމަށް ތިމާގެ އެކުވެރިއެއް އައިސްފިނަމަ އެކަން ތިމާގެ ހިތުގެ އެންމެ ފުންމިނުން ގަބޫލު ކުރާށެވެ. އަދި އެކަމުގެ ބަދަލު ތިމާގެ ޢަމަލުން ދައްކާށެވެ. އެހެނީ އެކަމުން ވެސް ތިމާ ފައިދާ ނަގަން މަސައްކަތް ނުކުރާށެވެ. އެ ހިތްހެޔޮ ކަމަށް ޓަކައި ތިމާގެ އެކުވެރިޔާއަށް ޝުކުރުވެރިވާށެވެ.
މިއީ އަޅުގަނޑުމެން މިއަދު ދައްކަން ޖެހިފައިވާ ވާހަކައެކެވެ. މުޅި މުޖުތަމަޢަށް މިއަދު އުނގަންނައިދޭން ޖެހިފައިވާ ވަރަށް މުހިންމު ފިލާވަޅެކެވެ. ހިތްހެޔޮކަމުގެ ފައިދާ ނަހަމަ ގޮތުގައި ބޭނުންކުރާ ފަރާތްތަކަށް އެކަމަކީ ކިހާ ދަށުދަރަޖައިގެ ކަމެއްކަން އަންގައިދީ އެމީހުންނަށް ވިސްނައިދެވޭތޯ މިއަދު އަޅުގަނޑުމެން މަސައްކަތް ކުރަން އެބަ ޖެހެއެވެ.
