މޮނިޓަރިންގެ ހާލަތުގައި ގަމާއި ފޮނަދޫގައި ދިރިއުޅޭ މީހުންނަށް ފްލައިޓްގައި ދަތުރު ނުކުރެވޭނެ!
ކޮވިޑް19ގެ ފައްސި ވޭދަނަތަކެއް ލ.ފޮނަދޫން ފެނުމާ ގުޅިގެން މޮނިޓަރިންއަށް ލާފައިވާ ފޮނަދޫއާއި އެރަށާއި ގުޅިފައިވާ ގަމުގައި ދިރިއުޅޭ މީހުންނަށް މޮނިޓަރިންގެ ހާލަތުގައި ފްލައިޓުން ދަތުރު ނުކުރެވޭނެ ކަމަށް ޑރ.ނަޒްލާ ރަފީޤު ވިދާޅުވެއްޖެއެވެ.
އެކަމާ ގުޅޭ ގޮތުން ، ހެލްތު އިމަޖެންސީ އޮޕަރޭޝަންސް ސެންޓަރ ، އެޗްއީއޯސީގެ ތަރުޖަމާނު ޑރ.ނަޒްލާއާ “ދެން” އިން ކުރި ސުވާލަކަށް ޖަވާބު ދެއްވަމުން އޭނާ ވިދާޅުވީ އެއަރޕޯޓް އޮންނަނީ ވަކި ރަށެއްގައި ކަމަށްވާތީ ފްލައިޓް ދަތުރުތައް އޮންނާނެ ކަމަށާއި ނަމަވެސް މޮނިޓަރިންގެ ހާލަތުގައި ގަމާއި ފޮނަދޫގައި ދިރިއުޅޭ މީހުންނަށް ދަތުރު ނުކުރެވޭނެ ކަމަށެވެ. އަދި އެއަރޕޯޓް އޮންނަ ކައްދޫއަށް ފުރަންދާ މީހުން ދާން ޖެހޭނީ ސީދާ ކައްދުއަށް ކަމަށާއި ހަމަ އެހެންމެ ފްލައިޓްގައި ކައްދުއަށް ދާ މީހުން ވެސް ، އެމީހުންގެ ރަށް ރަށަށް ދިޔުމުގައި ފުރަން ޖެހޭނީ ސީދާ ކައްދޫން ކަމަށް ވެސް ނަޒްލާ ވިދާޅުވިއެވެ.
ކައްދޫ އޮންނަނީ ފޮނަދުއާއި ގަމާއި ދެމެދު ކަމަށް ވުމާއެކު އެ ހިސާބުގެ ދަތުރުފަތުރުގެ ކަންކަން ހަމަޖެހިފައިވާ ގޮތުން ކައްދުއަށް ދާ މީހުން އާންމުކޮށް ފުރަތަމަ ދަނީ ގަމާއި ފޮނަދުއަށެވެ. އޭގެ ފަހުން ކައްދުއަށް ދަނީ އެއްގަމު މަގުންނެވެ.
ލ.ފޮނަދޫން ބަޔަކު ކޮވިޑަށް ފައްސިވެފައި ވަނީ މިއަދު އެވެ. ފައްސިވީ 4 މީހުންނަކީ ގއ.ދެއްވަދޫން މިދިޔަ މަހު 27 ވަނަ ދުވަހު ފޮނަދުއަށް ދިޔަ ބައެއް ކަމަށް ޚަބަރު ލިބިފައި ވެއެވެ. އަދި އެ ހަތަރު މީހުންގެ ތެރޭގައި 3 ކުޑަކުދިން ހިމެނެއެވެ.
