ރިވެތި ހެޔޮ ބަހަކީ ރަނގަޅު ނަފްސަކުން ނުކުންނަ ރަނގަޅު މޭވާއެއް ފަދަ އެއްޗެއް: ހުތުބާ
ރިވެތި ހެޔޮ ބަހަކީ ރަނގަޅު ނަފްސަކުން ނުކުންނަ ރަނގަޅު މޭވާއެއްފަދަ އެއްޗެއް ކަމަށް މިއަދުގެ ހުކުރު ހުތުބާގައި ބުނެފިއެވެ.
ހެޔޮ ބަސް ބުނުމުގެ މައްޗަށް އަލިއަޅުވާލައި މިއަދު އިއްވި ހުތުބާގައި ބުނެފައި ވަނީ ކޮންމެ ހެޔޮ ބަހެއްގައި ހިމެނެނީ ހަމައެކަނި މަންފާ އާއި ލާބަކަމަށެވެ. އެއީ ފުރައްސާރަ ކުރުމާއި، ނެތިމޮށުމާއި، ފުށުމާއި އެއްޗެހި ކިޔުން އޭގައި ނުހިމެނޭ ބަހެވެ.
ހެޔޮ ބަހަކީ ﷲ ތައާލާ ހަނދުމަ ކުރުމާއި، ތަހްލީލާއި، ތަހްމީދާއި، ތަސްބީހާ ހިމެނޭ ބަސް ކަމަށް ހުތުބާގައި ބުނެފައިވެއެވެ. އަދި އެއީ ފައިދާކުރުވަނިވި އިލްމު ލިބޭ ހެޔޮކަންތަކަށް އަމުރުކުރާ މުންކަރާތްތައް ނަހީ ކުރާ ބަހެވެ.
"ހެޔޮ ބަހަކީ ހެޔޮކަން ބޮޑު ގަހެއް ފަދަ އެއްޗެކެވެ. އެ ގަހުގެ މަންޒަރު ރީއްޗެވެ. ވަސް މީރެވެ. މޭވާ ފޮންޏެވެ. ހިޔާ ބޮޑެވެ. ފައިދާ ތަނަވަހެވެ. އެ ގަހުގެ މޫތައް ވަރުގަދައެވެ. އެއީ އަބަދުވެސް މޭވާ އަޅާ ގަހެކެވެ. އެ ގަހުގެ މޭވާ ދުވަހަކު ވެސް ހުހެއް ނުވެއެވެ. މިފަދަ ގަހެއް ހެދުމަށް ރަނގަޅު ބިމަކަށް ބޭނުން ވެއެވެ. މި ރަނގަޅު ބިމަކީ ﷲ އަށް އަޅުކަން ކުރާ ސާލިހު މުއުމިނާގެ ނަފްސެވެ. އެ ގަހުގެ ވެރިޔަކީ ރިވެތި ގޮތުގައި ﷲގެ ހަލްގުތަކުންނާ މުއާމަލާތު ކުރާ މީހާއެވެ." ހުތުބާގައި ބުނެފައި ވެއެވެ.
ދަރިންގެ ހިތްތަކުގައި އެފަދަ ބިމެއް ތައްޔާރު ކުރެވޭނީ އާއިލާ އާއި މަދްރަސާ އާއި ވެށިން ރަނގަޅު ތަރުބިއްޔަތެއް ފޯރިކޮށްދީގެން ކަމަށް ހުތުބާގައި ބުނެފައިވެއެވެ. އަދި މި ތިން ވެށި ނުރަނގަޅު ބިމެއް ފަދަ ތަނަކަށް ވެއްޖެ ނަމަ ދަރިންގެ ހިތްތަމުގައި ހެޔޮ ބަސް ބުމުގެ ގަހެއް ނުފަޅާނެ ކަމަށް ހުތުބާގައި ވެއެވެ.
ހުތުބާގައި ބުނެފައި ވަނީ އިންސާނާގެ ނަފްސުގެ މައްޗަށް ވެރިވެގަނެ، އޭނާ ހެއްލެނިކުރުމަށް ޝައިތާނާ އަބަދުވެސް މަސައްކަތް ކުރާނެ ކަމަށާއި އެ ޝައިތާނާ އިންސާނާ އަށް ހަޑިހުތުރު އަމަލުތައް ޒިނަތްތެރި ކޮށްދީ ވަސްވާސް ދޭނެ ކަމަށެވެ. އެހެނަކުން އެފަދަ ކަންކަމުން ދުރުހެލިވުމަށް އިސްލާމީ ތަރުބިއްޔަކު މުހިންމު ކަމަށް ހުތުބާގައި ބުނެފައިވެއެވެ.
މީގެ އިތުރުން ދެމަފިރިން ވެސް އެކަކު އަނެކަކާ މުއާލަމާތު ކުރަން ޖެހޭނީ ރިވެތި އޯގާތެރި ބަހުން ކަމަށް ހުތުބާގައި ވެއެވެ. އަދި އެކަކު އަނެކަކާ ހުތުރު ބަހުން ވާހަކަ ދައްކައި، އެކަކު އަނެކަކު ހިތުގައި ޖައްސައިފި ނަމަ މާތްﷲ ކައިވެނީގައި ލެއްވި މާތް މަގްސަދާ ހިލާފުވެ، ދެމަފިރިން ދުރުކޮށް، ވަރިފަށަށް ގެންގޮސްފާނެ ކަމަށް ހުތުބާގައި ބުނެފައިވެއެވެ.
"އޭ މުސްލިމު އަހުންނޭވެ! ގާތްތިމާގެ މީހުންގެ މެދުގައްޔާއި، އަވަށްޓެރިންގެ މެދުގައްޔާއި، ބާޒާރުމައްޗާއި، ވިޔަފާރީގެ މުއާމަލާތު ތަކުގެ މެދުގައްޔާއި، މުވައްޒަފުންގެ މެދުގައްޔާއި، ހިދުމަތް ހޯދުމަށް އޮފީސްތަކަށް ދާ މީހުންނާއި ހިދުމަތްދޭ ފަރާތްތަކާ ދެމެދު، މުއާމަލާތު ކުރެވެން ޖެހޭނީ ރިވެތި ބަހުންނެވެ. ޑުރައިވަރުންނާއި ފަސިންޖަރުންނާ ދެމެދު މުއާމަލާތު ކުރަން ޖެހޭނީ ރިވެތި ބަހުންނެވެ. މިއަދު އަހަރެމެން ތެރޭގައި އެކި ހިދުމަތްތަކުގައި ބިދޭސީން ގެންގުޅޭއިރު، އެ މީހުންގެ ފުށުން ދެރަ ކަންތައް ފެންނާނެ އެވެ. ނަމަވެސް އެ މީހުންނާ ވާހަކަ ދައްކާ ބަސްމަގު ހުންނަން ވާނީ އިސްލާމް ދީނުގެ ރިވެތި އަހްލާގުގެ ތެރޭގައެވެ." ހުތުބާގައި ބުނެފައިވެއެވެ.
