އަވަގުރާނަ ގޮވި ކަމަށް ބުނާ ދައުވާގައި ކުރާ ތުހުމަތުތަކަށް އަދުރޭ އިންކާރު ކުރައްވައިފި
އަވަގުރާނަ ގޮވި ކަމަށް ބުނާ ދައުވާތަކުގައި ކުރާ ތުހުމަތުތަކަށް އިދިކޮޅު ކޯލިޝަން ހިންގެވުމާ ހަވާލުވެ ހުންނެވި ލީޑަރު އަބްދުއްރަހީމް އަބްދުﷲ (އަދުރޭ) އިންކާރު ކޮށްފިއެވެ. ދައުލަތުން ކުރާ މި ދައުވާތަކުގެ ފުރަތަމަ އަޑުއެހުން މިއަދު ބާއްވާފައިވާއިރު، އަދުރޭއަށް ވަނީ ޖަވާބުދާރީވުމަށް ފުރުސަތު ދީފައެވެ.
ހަޑިހުތުރު އެއްޗެހި ކިޔުމާއި ހަޑިހުތުރު ބަސް ބޭނުން ކުރުމު ދައުވާގެ ޝަރީއަތަށް ފަހު ނޫސްވެރިންނާ ބައްދަލުކޮށް މިއަދު ވާހަކަފުޅު ދައްކަވަމުން އަދުރޭ ވިދާޅުވީ މި ދައުވާތަކަކީ ސަރުކާރުގެ ނުފޫޒުން އުފުލާ ދައުވާތަކެއް ކަމަށެވެ.
އަދި މިހާރުގެ ސަރުކާރު އޮތީ ނޭވާ ހޮޅިއަށް އެޅިފައި ކަމަށާއި އޭނާގެ މައްޗަށް ކުރާ ދައުވާއަކީ އޭގެ ފޯކަސް އަނބުރާލުމަށް ސަރުކާރުން ކުރާ ކަންކަމުގެ ތެރޭގައި ހިމެނޭ ދައުވާއެއްް ކަމަށް ވެސް އަދުރޭ ވިދާޅުވިއެވެ.
"މަތި މައްޗަށް ދައުވާ އުފުލިޔަސް އަޅުގަނޑުމެންގެ އަޒުމަށް ބަދަލެއް ނާންނާނެ. އަޅުގަނޑުމެން ކުރާ މަސައްކަތް ހުއްޓައެއް ނުލާނަން. [އިދިކޮޅު ކޯލިޝަންގެ ލީޑަރު] ރައީސް [އަބްދުﷲ] ޔާމީން މިނިވަން ކުރުމަށް ޓަކައި ކުރަން ޖެހޭ މަސައްކަތްތަކަށް ނިމުމެއް ނާންނާނެ." އަދުރޭ ވިދާޅުވިއެވެ.
އޭނާގެ މައްޗަށް ފެށި ޝަރީއަތަކީ އަހަރެއްހާ ދުވަސް ކުރިން ކުރި ދައުވާއެއް ނަމަވެސް އޭގެ ލިޔެކިޔުންތައް ލިބުނީ މިއަދު ކޯޓަށް ވަޑައިގަތުމުން ކަން ފާހަގަކޮށް އަދުރޭ ވިދާޅުވީ އެކަމުން ވެސް މިއީ ސިޔާސީ ދައުވާއެއް ކަން ހާމަވެގެންދާ ކަމަށެވެ.
