ބަލިވެދާނެތީ ބިރުން، އުމުރުން 87 އަހަރުގެ މިމީހާ ފެން ނުވަރާތާ 67 އަހަރުވެއްޖެ
ދުނިޔޭގައި އުޅެނީ ތަފާތު އެކި ވައްތަރުގެ، އެކި މިޒާޖުގެ މީހުންނެވެ. އެއްބަޔަކީ ހުރިހާ ކަމެއް ވެސް ވަރަށް ތަރުތީބުން ކުރަން ބޭނުންވާ، ވަރަށް ސާފު ޠާހިރު މީހުންނަށްވާއިރު، އަނެއް ބަޔަކީ އޭގެ ދިމާ އިދިކޮޅަށް އުޅެން ލޯބިކުރާ މީހުންނެވެ.
ސާފު ޠާހިރުކަން ބައެއް މީހުންގެ ކިތަންމެ ކުޑަ ނަމަވެސް، ގައިން ޠާހިރު ނުވެ ނުވަތަ އެއްވެސް ވަރަކަށް ފެން ނުވަރާ މީހަކަށް އުޅެވިދާނެ ހެއްޔެވެ؟ ޤަބޫލު ކުރަން ދަތި ނަމަވެސް، އެފަދައިން އުޅެފައިހުރި މީހަކު ވެސް އެބަހުއްޓެވެ. މިއީ އެމީހާގެ ވާހަކައެވެ.
އީރާނުގެ ކެރްމާން ޝާހް ޕްރޮވިންސްގެ އަވަށެއްގައި ދިރިއުޅޭ، އުމުރުން 87 އަހަރުގެ އަމޫ ޙާޖީ އެއްގޮތަކަށް ވެސް ފެން ނުވަރާތާ 67 އަހަރު ވެއްޖެކަމަށް ބޭރުގެ ބައެއް ރިޕޯޓުތަކުން ބުނެފައިވެއެވެ. ފެންނަ ފެނުމަށް އަމޫ ޙާޖީ ހީވަނީ ދުން ހޮޅިއެއްގެ ތެރެއިން ވެއްޓިފައިވާ މީހެއްހެން ކަމަށް ވެސް ރިޕޯޓުތަކުން ބުނެފައިވެއެވެ.
އަމޫ ޙާޖީ އަބަދުވެސް ހުންނަނީ ހިރަފުހާއި ވެލިން ތަތްތެޅިފައެވެ. އޭނާ ބުނި ގޮތުގައި އޭނާ ފެން ނުވަރަނީ ފެން ދެކެ ބިރުގަންނާތީއެވެ. އަމޫ ޙާޖީ ޤަބޫލުކުރާ ގޮތުގައި، ފެން ވަރައިފިނަމަ އޭނާ ބަލިވެދާނެއެވެ.
ފެން ނުވެރުމުގެ އިތުރުން އަމޫ ޙާޖީ ކައި އުޅެނީ މަރުވެފައިވާ ޖަނަވާރުންގެ ކުނި މަސް ކަމަށް ވެސް ރިޕޯޓުތަކުން ބުނެއެވެ.
ތެހްރާން ޓައިމްސް އިން ބުނެފައިވާ ގޮތުގައި އަމޫ ޙާޖީ އެފަދަ ނަޖިސް ދިރިއުޅެއް އުޅެން އިޚްތިޔާރު ކޮށްފައިވަނީ އޭނާގެ ޒުވާން އުމުރު ކުރިމަތިވީ ކަންތައްތަކެއްގެ ސަބަބުންނެވެ.
