އައްޑޫގައި ޒަރޫރީ ބޭނުންތަކަށް ނޫނީ ނުކުމެ ނޫޅެން އަންގައިފި
އެޗްޕީއޭގެ މޮނިޓަރިންގެ ހާލަތުގައި އޮތް އައްޑޫ ސިޓީގެ ރަށްތަކުގައި ޒަރޫރީ ބޭނުންތަކަށް ނޫނީ ބޭރަށް ނުކުމެ ނޫޅެން އަންގައިފިއެވެ.
އެ ސިޓީގެ ކައުންސިލް އިދާރާއިން ވަނީ ޒަރޫރީ ބޭނުންތަކަށް ނޫނީ ގެއިން ބޭރަށް ވަޑައިނުގެންނެވުމަށާއި، ބޭރަށް ނިކުމެވަޑައިގަންނަވާ ކޮންމެ ވަގުތަކު މާސްކު އަޅުއްވައިގެން ނުކުތުމަށް އިލްތިމާސް ކޮށްފައެވެ. އަދި އެޗް.ޕީ.އޭގެ ގައިޑްލައިނަށް ފުރިހަމައަށް ޢަމަލު ކުރެއްވުމަށް ވެސް އައްޑޫ ސިޓީގެ ރައްޔިތުންނަށް އެ އިދާރާއިން ވަނީ އިލްތިމާސް ކޮށްފައެވެ.
މީގެ އިތުރުން، ޑޮކްޓަރަށް ދެއްކެވުމަށް ހޮސްޕިޓަލަށް ވަޑައިގަންނަވަންޖެހޭ ފަރާތްތަކުން އެ އަވަށެއްގެ އެސް.އެސް.ޑީ އާ މަޝްވަރާ ކުރައްވައިގެން ޑޮކްޓަރަށް ދެއްކެވުމުގެ އިންތިޒާމު ހަމަޖެއްސެވުމަށް ވެސް އެ އިދާރާއިން ވަނީ އަންގާފައެވެ.
އައްޑޫ ސިޓީގައި މޮނިޓަރިންގެ ހާލަތު އިއުލާން ކުރީ އެ ސިޓީގެ ވެރިރަށް ހިތަދޫން ދެ މީހަކު ފައްސިވުމާ ގުޅިގެންނެވެ. އެގޮތުން އެ ދެމީހުންނަކީ ކަރަންޓީނުގައި ތިބި ދެމީހުންނަށް ވެސް ނުވާތީ ކޮންޓެކްޓް ޓްރޭސިންގެ މަސައްކަތްތައް ނިމެންދެން އެރަށް ވަނީ މޮނިޓަރިންގެ ހާލަތަށް ލެވިފައެވެ.
އައްޑޫ ސިޓީ ހުޅުމީދޫން ވެސް ވަނީ ގިނަބަޔަކު ކޮވިޑް-19އަށް ފައްސިވެފައެވެ. އެރަށުން ފައްސިވެފައި ވަނީ 28 ބިދޭސީންނެވެ. އެމީހުންނަކީ އެރަށަށް ގޮސް އުޅޭ އެމްޓީސީސީގެ މުވައްޒަފުން ތަކެކެވެ.
