ރައީސް ވަހީދާއި އެމަނިކުފާނުގެ އަނބިކަނބަލުން ވެސް ކޮވިޝީލްޑް ވެކްސިން ޖައްސަވައިފި
ކުރީގެ ރައީސް ޑރ. މުޙައްމަދު ވަހީދު ޙަސަން މަނިކާއި އެމަނިކުފާނުގެ އަނބިކަނބަލުން އިލްޙާމް ޙުސެއިން ވެސް ކޮވިޑް-19 އިން ރައްކާތެރިވުމަށް ވެކްސިން ޖައްސަވައިފިއެވެ.
މިކަން ހާމަކުރައްވަމުން ރައީސް ވަހީދު ކުރެއްވި ޓްވީޓެއްގައި ވިދާޅުވީ އެމަނިކުފާނާއި އެމަނިކުފާނުގެ އަނބިކަނބަލުން މިއަދު ކޮވިޑަށް ވެކްސިން ޖައްސަވައިފި ކަމަށެވެ.
ރައީސް ވަހީދު ވިދާޅުވީ ކޮވިޑް-19 އަކީ މުޅި ދުނިޔެއަށް ފެތުރިފައިވާ ބަލިމަޑުކަމެއް ކަމަށާއި މިބަލިމަޑުކަމުގެ އަސަރު އެންމެންގެ ދިރިއުޅުމަށް ވެސް ފޯރައި، އެތައް ބައެއްގެ ފުރާނަ ވެސް މިބަލިމަޑުކަމުގައި ގެއްލިގެން ގޮސްފައިވާ ކަމަށެވެ.
"އެންމެންގެ ފުރާނައާއި ދިރިއުޅުން ސަލާމަތް ކުރުމަށް، އަޅުގަނޑު އިލްތިމާސް ކުރަނީ އެންމެން ވެސް ވެކްސިން ޖެހުމަށް" ރައީސް ވަހީދު ވިދާޅުވިއެވެ.
ރައީސް ވަހީދު އާއި އެމަނިކުފާނުގެ އަނބިކަނބަލުން އިލްހާމް ވެސް ޖައްސަވާފައި ވަނީ އިންޑިއާގެ ސެރަމް އިންސްޓިޓިއުޓުން ރާއްޖެއަށް ހަދިޔާކުރި ކޮވިޝީލްޑް ވެކްސިނެވެ.
