ޢަލީ ވަހީދު ފުރުވާލީ ކޯޓުން އަމުރު ނުނެރެނީސް!
ޖިންސީ ގޯނާ ކުރިކަމުގެ ތުހުމަތު އުފުލިފައިވާ ކުރީގެ ޓޫރިޒަމް މިނިސްޓަރު އަލީ ވަހީދު ރާއްޖެއިން ބޭރަށް ފުރުވާލީ، އޭނާގެ ޕާސްޕޯޓު ހިފަހައްޓަން ކްރިމިނަލް ކޯޓުން ކުރިން ކުރި އަމުރު އެކޯޓުން ބާތިލު ކުރުމުގެ ކުރިން ކަމާމެދު ސުވާލު އުފެދިއްޖެއެވެ.
ޓޫރިޒަމް މިނިސްޓްރީގެ މުވައްޒަފުން ތަކަކަށް ޖިންސީ ފުރައްސާރައާއި ޖިންސީ ގޯނާ ކުރިކަމުގެ މައްސަލައިގައި އަލީ ވަހީދުގެ މައްޗަށް ވަނީ ހަތް ދައުވާއެއް އުފުލާފައެވެ.
އެދައުވާތަކާ ގުޅިގެން އޭނާގެ ޕާސްޕޯޓު ކުރިން ހިފެހެއްޓި ނަމަވެސް، މިމަހުގެ 9 ވަނަ ދުވަހު އަލީ ވަހީދު ވަނީ ބޭސް ފަރުވާއަށް ރާއްޖެއިން ބޭރަށް ފުރައިވަޑައިގެންފައެވެ.
މިކަމާ ގުޅޭގޮތުން ޕްރޮސެކިއުޓާ ޖެނެރަލް (ޕީޖީ) ހުސައިން ޝަމީމް ކުރި ޓްވީޓެއްގައި ވިދާޅުވީ އަލީ ވަހީދުގެ ޕާސްޕޯޓު ދޫކޮށްލުމާ ގުޅޭގޮތުން އަޑުއެހުމެއް ބާއްވާ އަމުރު ނެރުނީ މި މަހުގެ ނުވަ ވަނަ ދުވަހު ކަމަށާއި، ނަމަވެސް ކްރިމިނަލް ކޯޓުގެ އަމުރުގައި ތާރީހެއް ކަމަށް އޮތީ 10 ފެބުރުއަރީ ކަމަށެވެ.
އެ އަމުރުގައި އަލީ ވަހީދުގެ ޕާސްޕޯޓް ދޫކޮށްލީ 10 ފެބްރުއަރީގައި ކަަމަށް ބަޔާން ކޮށްފައި ވީނަމަވެސް، ނުވަ ވަނަ ދުވަހުގެ ރޭ އަލީ ވަހީދު ފުރައިގެން ގޮސްފައިވާކަން ޕީޖީ ޝަމީމް ވަނީ ފާހަގަ ކުރައްވާފައެވެ.
Ads by STO
