"އާ މީހުން" ލިބުމުން، "ބާ މީހުން" ބާކީ ކޮށްލުން..؟!
ދުނިޔޭގެ އެކި ކަންކޮޅުތަކަށް ބެލިނަމަވެސް، މިއީ ވަރަށް ގިނައިން ހިނގާ ކަމެކެވެ. މީހެއްގެ ދިރިއުޅުމަށް އަލަށް މީހަކު އައުމުން، އޭނާއާއެކު ކުރިން އުޅުނު މީހުން މަތިން ހަނދާން ނެތެނީއެވެ. އެމީހުން ދުރުކޮށްލާ، ދެރަކޮށްލާ، އެމީހުންގެ އިޙުސާސްތަކާމެދު އެއްގޮތަކަށް ވެސް ވިސްނާނުލެވެނީ އެވެ.
މިހެން ބުނުމުން މިދައްކަނީ ދެ ލޯބިވެރިން، ނުވަތަ ދެމަފިރިންގެ ޙަޔާތަށް އެހެން މީހަކު އައުމުން އެމީހުންގެ ދެމެދުގައި މައްސަލަޖެހި ވަކިވާންޖެހޭ ވާހަކަ ކަމަށް ހީވެދާނެއެވެ.
އެއްގޮތަކަށް ވެސް އެހެނެއް ނޫނެވެ. އާ މީހަކު ލިބުމުން ބާ މީހުން ބާވަނީ ނުވަތަ ބާކީވާ ހަމައެކަނި ގޮތަކީ އެއީ އެކަންޏެއް ވެސް ނޫނެވެ.
ހަގީގަތަށް ބުނަންޏާ، ލޯބީގައި ބާކީވުމުގެ އިތުރުން، އާއިލާ ތެރޭގައާއި ރައްޓެހިންގެ މެދުގައި އަދި ބައެއްފަހަރު އަދާކުރާ ވަޒީފާގައިވެސް މިފަދައިން ކަންތައް ވެއެވެ.
މިއީ ހަމަ ވަރަށް ބޮޑު ހަގީގަތެކެވެ. އެކުގައި އެތައް ވާހަކަތަކެއް ދެކެވި، ޚިޔާލު ބަދަލު ކުރެވި، ކަންކަމުގައި މަޝްވަރާކުރަން ބައްދަލު ކުރުމާއި އުފާވެރި އެތައް ވަގުތުތަކެއް ހޭދަ ކުރާ ދެ ރައްޓެހިންގެ ދެމެދަށް ވެސް އިތުރު މީހަކު ވަނުމުން، ނުވަތަ އިތުރު މީހަކާ ގާތް ވެވުމުން، ކުރީގެ އެ ރަޙްމަތްތެރިޔާ މަތިން އިސާހިތަކު ހަނދާން ނެތޭ މީހުން އުޅެއެވެ. އެ ރަޙްމަތްތެރިން ގުޅިޔަސް ފޯނު ނުނެގުމާއި ކުރާ މެސެޖުތައް ވެސް "ސީންޒޯން" ކުރުމާއި "އިގްނޯ" ކުރުން ވެސް ހިމެނެއެވެ. އާ މީހަކު ލިބުމުން ބާ މީހާ ބާކީ ވީއެވެ.
ވަޒީފާގެ މާޙައުލުގައި ވެސް، ކުރިން ވަރަށް ރަނގަޅަށް މުވައްޒަކު މަސައްކަތް ކޮށްކޮށް ހުއްޓާ، އަލަށް ވަންނަ މީހަކު ކުރާ މަސައްކަތަށް އެކަނި މާބޮޑަށް ތައުރީފުކޮށް އެމީހަކާ އެކަނި މަސައްކަތްތައް ވެސް ހަވާލު ކުރާނަމަ، ކުރިން ރަނގަޅަށް މަސައްކަތް ކުރި މީހާ މާޔޫސް ވާން ފަށާނެއެވެ. އޭނާ ބާކީ ވެއްޖެ ކަމުގެ އިޙުސާސްވެ، އަލަށް ވަތް މީހާއާމެދު ހަސަދަ ވެރިކަން ވެސް އުފެދޭނެއެވެ. އެކަމުގެ ނޭދެވޭ އަސަރު ވަޒީފާގެ މާޙައުލަށް ވެސް ކިތަންމެ ފަހަރަކު ފޯރާނެއެވެ.
މީހުންނާމެދު އިންސާފުވެރިވެ، އަދުލުވެރިވާންވީ މިހެންވެއެވެ. މިފަދައިން އެއްވެސް މީހަކު ހިތުގައި ނުޖެއްސުމަށެވެ. އަބަދުވެސް ހަނދުމަ ކުރަންވީ އެއް ކަމަކީ، މީހަކަށް ދެރައެއް ދީގެން، ނުވަތަ މީހަކު ދެރަ ކޮށްގެން ތިމާއަށް ލިބޭނެ އެއްވެސް މޮޅެއް ނެތް ކަމެވެ.
ބާސްކެޓް ބޯލް އެސޯސިއޭސަންގެ ފިލޯސަފީ ގެވާހަކަ ތިބުނީ
ފިލޯސަފީ ގެވާހަކަ ދެއްކިޔަސް ބޯޅައެއްގެ ވާހަކަ ދެއްކިޔަސް ހަގީގަތް ވާނީހަމަ ހަގީގަތައް ދޯ
ވަރަށް ބޮޑު ތެދެއް. އަހަރެންވެސް މި ތަޖުރިބާކުރަނީ ތިކަންތައް. ދެރަވޭ ވަރަށް އަސަރުކުރޭ.