ޤައުމުތަކުގެ މެދުގައި ވެކްސިންތައް ބަހާފައިވާ ގޮތާމެދު އދ ގެ ހިތްހަމަނުޖެހުން
ކޯވިޑުން ރައްކާތެރިވުމަށް އުފައްދާފައިވާ ވެކްސިންތައް ޤައުމުތަކުގެ މެދުގައި ބަހާފައިވާ ގޮތާމެދު އދ. އިން ހިތްހަމަނުޖެހުން ފައުޅުކޮށްފިއެވެ.
ވެކްސިންތަކުގެ އެންމެ ޑޯޒެއްވެސް ނުލިބޭ 130 ޤައުމެއް އެބައޮތް ކަމަށް އދ.އިން ބުނެއެވެ. 193 މިލިޔަން ޑޯޒުގެ ވެކްސިން މިހާތަނަށް އެކި ގައުމުތަކުގައި ދެވިފައިވެއެވެ.
މަދު ޤައުމުތަކަކުން ކޯވިޑް-19 ވެކްސިން ފޮރުވާނަމަ އޭގެ ސަބަބުން ނޭދެވޭ ގިނަ ނަތީޖާތަކެއް ނިކުތުމުގެ ފުރުޞަތު އޮތްކަމަށް އދ. އިން އެއްބަސްވާކަމަށް ބޭރުގެ ހަބަރުތަކުން ބުނެއެވެ. އަދި މުއްސަނދި ޤައުމުތަކުގެ ރައްޔިތުންނަށް ކޯވިޑް ވެކްސިން ދިން ކަމުގައި ވިޔަސް ދުނިޔޭގެ އެކި ސަރަޙައްދުތަކުގައި ވެކްސިން ނުދެވޭނަމަ ކޯވިޑްގެ ވަބާއިން ސަލާމަތް ނުވެވޭވެ ކަމަށް ވެސް އެ ޖަމްއިއްޔާއިން ބުނެއެވެ.
ހުރިހާ ޤައުމަކަށް ހަމަހަމައަށް ވެކްސިން ލިބޭނެ އިންތިޒާމް ހަމަޖެއްސުމަށް ބޭނުންވާ މާލީ ވަޞީލަތްތައް ހޯދުމަށް ބޭނުންވާ ކަންކަން ފަހިކޮށްދިނުމުގެ ބާރު ޖީ7ގެ ތެރޭގައި ހިމެނޭ ޤައުމުތަކަށް ލިބިފައިވާކަމަށް އދ އިން ބުނެއެވެ.
އެމެރިކާގައި 81 އިންސައްތަ މީހުންނަށް ކޮވިޑް ވެކްސިން ދެވިފައިވާކަމަށް ތަފާސް ހިސާބުތަކުން ދައްކައެވެ. އިނގެރޭސި ވިލާތުގައި ދުވާލެއްގެ މައްޗަށް 1،588،755 މީހުންނަށް ވެކްސިން ދެވެއެވެ.
ދުނިޔޭގެ ނިސްބަތަށް ބަލާއިރު މިހާތަނަށް 110،900،696 މީހުންނަށް ކޮވިޑް ބަލި ޖެހިފައިވެއެވެ. އަދި ބަލީގައި މަރުވި މީހުންގެ އަދަދު 2،456،087 އަށް އަރައެވެ.
